Read Mongondow OUMAN IN RASUL MITA 27 Bible Online

OUMAN IN RASUL MITA 27 - Mongondow bible

OUMAN IN RASUL MITA 27

¹Naonda in notantú kon tumakoidon kon kapaḷ in kami sin mayá in Italia, ki Paulus takin tahanan mita ibanea pinosarakandon kon i Yulius, tobatú porwira in tontara in Rum inta tangoionmai “Totabá i Kaisar.”

²Kami in sinumakoi kon kapaḷ inta nongkon Adramitium, kapaḷ tatua in nongandu-ngandupa doman mako kon bayongan totubuan in kapaḷ kon propinsi Asia. Ki Aristarkhus, intau tobatú in Makedonia inta namangoi nongkon Tesalonika, in kotaki-takin doman nami.

³Naonda in nopoikoḷomaidon kon singgai, noiyaputdon in kami kon Sidon. Mopiabí totok in ki Yulius kon i Paulus. Inogoineabí in sia minaya-mayá mako mokipodungkuḷ kon yobayatnea mita sinbá ogoian monia onu in kaparaḷuannea.

⁴Nongkon tua, buidon in kami sinumakoi kon kapaḷ bo nongingguput kon bobayáan. Tongá tompot totok in mogirup dá kapaḷ inta sinakoian nami tua in tongá umuran mongin bingkí in dagat kon ḻipú in Siprus sin tua in noioḻingoi topí kon tompot.

⁵Bo naonda in kami iḷumopotdon kon dagat inta noyogintayow in ḻipú Kilikia bo Pampilia, noiyaputdon in kami kon Mira, butá in Likia.

⁶Kon tua porwira tatua nokouḻí kon kapaḷ nongkon Aleksandria inta mopobayá in Italia. Dá pinotabáneadon nomamping in kami kon kapaḷ tatua.

⁷Ain tongonumai nosinggai in kapaḷ inta sinakoian nami in minayá táe totok i mooḷoi. Totokdon iyumoyiga in kami sahingga in pangabisannea kami kodiug-kodiugdon kon kotá in Knidus. Táe tompot in umuran diá mopia, dá kami in nongin bingkí in pulau Kreta sinumaḻib kon Tanjung Salome.

⁸Totokdon iyumoyiga in kami nongin bingkí in pulau tatua dá pangabisannea noiyaput kami kon tobatú Totubuan in kapaḷ. Tangoinea Totubuan Mogaga, inta diá noyayú kon kotá Lasea.

⁹Wakutu intua Singgai Moḷoben Podamean[36] ain noitaḻib. Nobayongdon in wakutu in pinaké kon tua, tongá mokoondokdon totok aka momakisa mayá turus in kapaḷ. Tuamai in ki Paulus nononggina kon i monia, kai-nia,

¹⁰“Utatku mita, indoiankumai totokbí in mokobahaya aka kapaḷ inta sinakoian naton naa mayá turus. Sin aka mayá turus yo moḷoben in karugian naton, deemanbí tongá pakakat naton bo datog in kapaḷ tanaa táe kitabí doman.

¹¹Táe porwira tatua in mopiri-pirisayabí kon mododia kon kapaḷ tatua bo kapitennea bo dika in inta pinoguman i Paulus.”

¹²Totubuan kapaḷ tatua in diá doman mopia pongandupan kon sempo in tumping. Tuamai in moantó in intau kon kapaḷ tatua in noguman kai monia in maníka bo diá mongandup bo momakisadon mayá modapot in Peniks bo kon tuapa in kon dodai in sempo in tumping naa. Peniks tua in totubuan kapaḷ kon Kreta inta noitayow in toyopan barat daya bo barat laut.[37]

¹³Wakutu intua tompot nongkon Toḷatan mogirup táe monyangkópabí, dá kai monia kamai yo motaau bidon mayá in kapaḷ. Dá binuatdon monia in jangkar bodongka pinobayá in kapaḷ táe nongin bingkí totok in pintad in pulau Kreta.

¹⁴Táe diá noonggot kon tua tompot in nogirup noropot — tuata in tompot inta sinangoian tompot Timur Laut — nogirup nongkon toba,

¹⁵bo nondangat kon kapaḷ nami tatua. Tuamai in diádon motaau in kapaḷ mayá turus moyogintayow in tompot moropot. Dá nopasradon in kami bo pinomayádon mako nami in kapaḷ tatua diaan magí mako in tompot.

¹⁶Kami dinia in tompot noidapot in tobatú pulau mointok, pulau Kauda in tangoinea. Kon tua iyoyigaanmai nami dá kinokawasaan nami in sikoci in kapaḷ nami tua.

¹⁷Naonda in pinoponikdon in sikoci kon kapaḷ, kapaḷ inta sinakoian nami tua iḻibu sinogotan in tali sin moondok dika bo moidumpak kon batu karang Sirtis sin nobabow in kon tua. Layar in pinoponagdon bo pinomayádon mako in podiaan in tompot mamagí mamako.

¹⁸Táe lantaran tompot umuran mogirup moropot, dá nopoikoḷomai kon singgai datog in kapaḷ ginaatandon monia iḷumbú kon dagat.

¹⁹Bo kon singgai intoḷunea, takin ḻima monia tontaní, mosia in nomangkoidon noḷumbú kon pakakat mita in kapaḷ tatua.

²⁰Tongonumaidon nosinggai in kami diádon mokoontong kon mata in singgai, bo tundi sin tompot in umuran doman mogirup moropot. Pangabisannea diádon in harapan nami kon mosaḷamatpa.

²¹Aindon tongonumai nosinggai mosia in diá nongaa-ngaan. Dá ki Paulus in sinimindog kon yua-yuak monia bo nosingog, “Utat mita! Aka kuma bo dinuduian monimu in tongginaku kon donaaipa tumurus in kita kon Kreta, yo tantú diábí in kita nokorasa kon roriga bo karugian nanaa.

²²Táe umpaka nobaḻídon nanaa. Táe akuoi in mononggina bui kon i monimu kon koropoton in gina bo donaai moondok. Sin diábí in tobatúmai in kon sigad naton in matoi; tongábí kapaḷ tanaa in diádon motaau pakéon.

²³Sin kogobíi malaekat i Allah inta sinumbaku, ki Allah inta ki togi kon inakó in namangoi kon inakó.

²⁴Bo noguman, ‘Dika moondok, Paulus! Sin moyotayowbí i Kaisar in iko. Bo totuubí kon popisí in totabi i Allah kon inimu dá bayongan in intau kon kapaḷ tanaa inta noyotakinmu mosaḷamatbí komintan.’

²⁵Tuamai utatku mita, umuran korigonon in gina! Sin akuoi in mopirisayabí totok kon i Allah kon bayongan tua in mobaḻíbí ná inta pinoguman-Neadon kon inakó.

²⁶Táe kita in moitubudon kon pintad in pulau tobatú.”

²⁷Doḷomdon kon mopuḷú bo opat, kami in umuranpabí noiḷantak mako bo poyambáan domanmai in tompot kon dagat in Adria. Táe degá noonggotdon kon doḷom intau mita kon bonu in kapaḷ in nokorasa kon kapaḷ ain kodiug-kodiug kon toba.

²⁸Dá mosia in nopoḷabúdon in tali sin pogukur kon koḻinow in tubig. Inukurmai monia dá dongkadon doyowa nopuḷú noyopa in koḻinownea. Naonda in noiunadon topiḻik in kapaḷ dá buidon inukur monia, bo indoianmai dongkadon mopuḷú boḻima noyopa in koḻinownea.

²⁹Bo popisí moondok in mosia kapaḷ moitongkod kon batu karang, dá mosia in noḷabú kon jangkar kon dampig in tumi in kapaḷ, bo igumon mako nami in ḷagidon mobayag.

³⁰Táe intau mita inta norogaid kon bonu in kapaḷ tatua moḷongasi moḷagui nongkon kapaḷ tatua. Mosia in nopoponag in sikoci inta kon kapaḷ tatua bo ki aka-akaḷmai mopoḷabú in jangkar kon dotá in muna in kapaḷ tatua.

³¹Tuamai in ki Paulus in noguman kon porwira tatua takin tontaranea mita, kai-nia, “Aka intau mita inta norogaid kon bonu in kapaḷ tatua bo diá tantú kon kapaḷ, yo moiko komintan in diábí mosaḷamat.”

³²Dá tuamai binontat in tontara mita tatua in tali kon uangga tatua, dá uangga tatua in diniadon in tompot.

³³Naonda in motoyongdon momuká in mata in singgai, ki Paulus in nonongganut kon bayongan intau kon tua sinbá mongaanpa. Sia in noguman nanaa, “Aindon mopuḷú bo opat nosinggai in koonggotnea moiko in dongkadon mogoḷat mako bo monahang doman mako in gogoy.

³⁴Tuamai akuoi in moguman kon i monimu, mongaanpa umpaka tongá tumongopiḻik. Simbá mosehat in moiko bo moropotpa. Sin mosaḷamatbí komintan in moiko bo diábí in mogaat kon sigad monimu nion.”

³⁵Nopaḷut mako nosingog kon natua ki Paulus in nogamá kon roti bo nosukur kon i Allah kon tayowon monia komintan. Onda intua sinila-silaineadon mako in roti bodongka nongaan.

³⁶Dá noropotdon bui in gina monia bo noibogdon nongaan komintan.

³⁷Kami kon kapaḷ tatua in doyowa nogatut bo pitu nopuḷú bo onom.[38]

³⁸Naonda in nopaḷutdon mako nongaan in mosia, iḷumbúdon monia in gandum kon dagat sinbá mogaandon in kapaḷ tatua.

³⁹Bo naonda in nobayagdon, inontongdon monia in toba táe diábí kinotaauan monia mongo onu in tangoi in tampat tatua. Mosia moramuji mopotubu in kapaḷ tatua kon tua.

⁴⁰Binuká monia in tali mita in jangkar bo sinaḷáandon monia kon yuak in dagat. Táe layar kon dotá in muna in pinoponik monia sinbá irupon in tompot pobayá ná pintad.

⁴¹Táe kapaḷ tatua in noidumpak kon apad in bungaion. Dotá in munanea in noitongkod dá diádon noḻiai, bo dotá in tuminea in nogoguyaat sin dinangatan in bokoḷ noropot.

⁴²Wakutu intua tontara mita inta nodia kon intau mita i hukum monomayádon moḻimod kon intau mita inta i hukum tatua, sin mosia in moondok dikabo oyúon in ḷumanguy mayá in toba bo moḷagui.

⁴³Táe inimaḷowan in porwira tatua sinbá ki Paulus in diá doman ḷutamon monia. Bo pinotabánea in intau mita inta motaau ḷumanguy, bo ḷumanguy muna mayá in toba;

⁴⁴bo ibanea in dumudui takin momaké in dopí andeka bonsi-bonsig in kapaḷ. Dá nosaḷamat komintan in mosia nodapot in toba.