Read Mongondow OUMAN IN RASUL MITA 28 Bible Online

OUMAN IN RASUL MITA 28 - Mongondow bible

OUMAN IN RASUL MITA 28

¹Naonda in kami nosaḷamat dapot in toba, bain tua bo kinotaauan nami kon naanta Maltabí in tangoi in pulau tatua.

²Intau mita kon tua totok mongopia kon inami. Mosia in nonontuḷú kinoborambang bodongka inoiní monia in kami nonayang kon tua sin momangkoidon monguyan bo motumpingdon.

³Naonda in ki Paulus nopuyut kon tanga mita bo pinondudub kon tuḷu tatua. Koyogot in sia nopondudub in kayu indoianmai iḷumuaidon magí in uḷag mobisa sin mopatúdon. Uḷag tatua in nongaḷut kon ḻima i Paulus.

⁴Naonda intau mita kon pulau tatua nokoontong kon uḷag tatua noibambé mako kon ḻima i Paulus, mosia in nosingo-singogan, “Intau tanaa pasti kon moḷoḻimodbí, sin umpaka nosaḷamatdon in sia nongkon bahaya kon dagat, táe ki Dewi inta Moadil in diábí mopomayá mako kon inia mobiag.”

⁵Táe pinomisik i Paulus kon tuḷu in uḷag tatua bo topiḻikmai diábí nogamui kon monakit.

⁶Kon raian monia in topípa bo mobobagádon in ḻima i Paulus andeka daḻídon matoi in sia. Táe naonda in noonggotdon in pinogoḷatan mako monia kon tua diábí in nobaḻí kon inia, dá nobaḷui domandon in raian monia. Mosia in nogumandon kon ki Paulus tua in dewabí.

⁷Diá noyayú kon tua in butá i gubernur inta kon pulau tatua. Ki Publius in tangoi i gubernur tatua. Mopia totok in pinototomu monia kon inami. Kami in nogutunpa bo nongaan kon tua toḷu nosinggai in koonggotnea.

⁸Wakutu intua ki amá i Publius notakit pinonikan in patú bo momorubut. Dá ki Paulus sinumuot bo noindoi poḷat nosambayang bodongka nomarakat kon i amá i Publius bo kon dodaipa doman tua nopia in sia.

⁹Naonda in dinongogdon in intau mita kon tua in onu inta ain nobaḻí tatua dá namangoidon in intau mita bo nodia kon intau mita inta notakit kon pulau tatua. Bo mosia komintan inundaman.

¹⁰Kami i horomat totok monia in kon tua bo naonda in kami nobuatdon nongkon tua yagi-yagidon inogoi monia inta paraḷu pakéon nami.

¹¹Naonda in toḷudon nobuḷan kon tua, kami in nonaḷámaidon kon pulau tatua. Kami in sinumakoi kon kapaḷ nongkon Aleksandria inta sinumubu kon tua kon dodai in sempo in tumping. Kapaḷ tatua in nomaké in lambang Dioskuri, mangaḻenea: “Dewa apang ki Kastor bo ki Poluks.”

¹²Kami in nongandup kon Sirakusa bo nogutunpa kon tua toḷu nosinggai.

¹³Nongkon tua kapaḷ inta sinakoian nami minayá nongin bingkí in dagat nodapot kon kotá in Regium. Nopoikoḷomai kon singgai tompot nomangkoidon nogirup nongkon Toḷatan dá kon singgai induanea kami in noiyaputdon kon Putioli.

¹⁴Kon tua kami noyodungkuḷ in jamaat mita. Bo kami in inoinípa monia nogutun kon tua noyotakin monia pitu nosinggai. Naonda intua kami in minayádon in Rum.

¹⁵Utat mita inta kon Rum aindon nokodongog kon habar kon naonda in kami, dá mosia in namangoi noidapot in Pasar Apius bo Pasanggrahan Tiga sin monontomu kon inami. Naonda in ki Paulus noyodungkuḷ monia, sia in nopoyaput in sukur kon i Allah bo noropotdon bui in ginanea.

¹⁶Naonda in kami noidapotdon in Rum, ki Paulus in inogoi nogutun tontaní táe sinakinan in tontara tobatú inta moḷoḷukad.

¹⁷Naonda in toḷudon nosinggai kon tua, ki Paulus in nogoiní kon itoi mita intau in Yahudi bo naonda in mosia noyosipun, sia in noguman kon i monia nanaa, “Utat mita! Umpakabí in akuoi diá nogaid kon inta noitaḷá kon bayongan intau naton andeka nomaḷawang kon adat in mogoguyang naton, táe akuoi in dinomokbí monia bo pinosarakan kon intau in Rum.

¹⁸Naonda in pinirikisa monia in akuoi, pinobebasdon monia sin diábí kinouḻían monia kon taḷá topiḻikpamai inta motaau baḻíon monia dodoyonan pohukuman kon inakó modapot in matoi.

¹⁹Tongá popisí in intau mita in Yahudi diá mosatuju kon kaputusan tatua dá akuoi in monuntut doman kon bá pelekara tatua angoion pokiadil kon i Kaisar, táe deemanbí makusud mopongadu kon bangusaku tontaní.

²⁰Tuamai in akuoi mopoigum sinbá motaau moyodungkuḷ monimu bo mongonguman takin i monimu; sin akuoi naa in sinokig nanaa tongábí in nopohabar kon onu inta inoḷat mako in intau mita in Israel.”

²¹Dá mosia in noguman kon inia nanaa, “Kami in diápabí kon dodai in onda notarima kon surat nongkon Yudea kon onu in nobaḻí kon inimu, ná doman tua, diápabí doman kon dodai in onda in intau mita inta ki utat naton in namangoi bo nopotaau kon onu inta moraat inaidanmu.

²²Táe kami in moibogbí doman mokidongog nongkon inimu tontaní kon onu inta pinirisaya bo sinundúmu tua sin ain dinongog nami komintan, kon bayongan inta sinundúmu bo inta pinirisayamu nion tatapbí bayowan monia kon ondakabí in bayáanmu.”

²³Dá mosia bo ki Paulus in nonantú kon tobatú singgai poyodungkuḷan monia. Bo kon singgai inta ain sinantú tatua nobayongdon intau in namangoi kon baḷoi inta pinogutunan i Paulus. Bo nongkon doḷo-doḷompa dapot in ḷoḷabungnea ki Paulus noginsilang bo nopotaau kon i monia soaḷ naonda in ki Allah momarenta saḷaku Datu. Sia in nobaca kon tontagá inta pinais kon buk i Musa, bo buk i nabi mita sinbá mosia in mopirisayadon kon i Yesus inta ain pinotaa-taaunea mako tua.

²⁴Oyúon doman in mopirisaya kon onu inta pinogumannea tatua, táe oyúon doman in umuran diá mopirisaya.

²⁵Dá mosia posi-posimaidon minayá nonaḷámai kon tampat tatua takin diábí notantúmai in raian monia. Dá ki Paulus in nosingog kon i monia, “Totuubí in onu inta ain pinoguman in Roho i Allah inta ain pinoyaput i Nabi Yesaya kon mogoguyang monimu!

²⁶Nanaa, ‘bayádon poguman kon bangusa tanaa bo poguman kon imonia: Moiko nion in tantúbí mokidongog, táe diábí momangaḻe; tantúbí doman tarukiraan monimu táe diábí kotaauan monimu mongo onu in nobaḻí.

²⁷Sin raian monia naa ain bidon nobangkung, bongoḷan monia in bongoḷan bo mata monia aindon binilogan. Tanaa in mobaḻí sinbá diá mokoontong in mata monia, bo bongoḷan monia in diá mokodongog, raian monia in diá momangaḻe, sin dika bo mobui kon i-Nakó, bo ampungan-Ku in mosia.’ ”

²⁸Pangabisannea ki Paulus in nosingog, “Tuamai in musti kotaauan monimu, kon habar kasaḷamatan inta nongkon i Allah tanaa aindon pinoyaput kon intau mita inta deeman Yahudi, bo mosia in noibogbí nokidongog kon tua!” [

²⁹Naonda in noguman natua in ki Paulus, intau mita in Yahudi tatua nonaḷámaidon kon tampat tatua sindaḷan mobobayowan.]

³⁰Doyowa notaong ki Paulus in nogutun kon butá in Rum kon baḷoi inta ain sinebaannea tontaní. Sia in notarima kon intau inta mamangoi kon inia.

³¹Bo taran-tarangan doman in sia in nopotaau in Habar Mopia kon naonda in ki Allah momarenta saḷaku Datu bo moginsilang kon soaḷ ki Tuhan Yesus Kristus. Onu in inaidan i Paulus tatua diá bidon in noḷambo-ḷamboi mako.