Read Mongondow OUMAN IN RASUL MITA 4 Bible Online

OUMAN IN RASUL MITA 4 - Mongondow bible

OUMAN IN RASUL MITA 4

¹Kon wakutu in ki Petrus bo ki Yohanes koyogotpa in nongonguman takin in intau moantó kon tua, indoianmai yo imang mita itoi[5] bo itoi in moḷoḷukad kon Baḷoi Tuhan takin intau mita in Saduki namangoidon kon i monia kon tua.

²Mosia in sinumorú kon i nayadua sin mosia ain notundú bo nopotaau kon intau mita kon ki Yesus aindon nobiag bui nongkon kinopatoian-Nea. Tua in nobaḻí bukti kon intau matoi in mobiagbí bui.

³Dá dinomok monia in mosia bo pinobonu kon ponjara nodapot in nobangon monik sin wakutu intua nodoḷomdon.

⁴Táe intau mita inta ain nokodongog kon onu inta ain sinundú in rasul mita tatua nobayong in nopirisaya. Dá nodugangdon in kobayong monia, kon bonu in ponarukiraan ḻimamaidon noribu in kobayongnea in ḷoḷaki.

⁵Nopoikoḷomai kon singgai, itoi mita in Yahudi, guhanga mita in ḻipú bo mototundú mita kon agama nogaid kon sidang kon Yerusalem.

⁶Mosia in noyodungkuḷ i Imang Moḷoben ki Hanas bo ki Kayapas, ki Yohanes, bo ki Aleksander takin bayongan intau inta buí mita in imang moḷoben.

⁷Ki Petrus bo ki Yohanes in dinia kon tayowon sidang tatua bo mulai pinoḻibo-ḻibóan kon rupa-rupa, kai monia, “Naonda in pinongongundam monimu kon intau inta ḻempeng tatua? Ropot bo kawasa i ine in pinogaid monimu kon tua?”

⁸Bo takin kawasa in Roho i Allah, ki Petrus in notubag, “Tuang mita inta nobaḻí itoi mita in bangusa bo tuang mita inta anggota mita in sidang!

⁹Aka tanaa mako bo kami in dinia mangoi kon naa sin sidangon popisí nogaid kon mopia notuḷung kon intau inta ḻempeng bo ḻibóon monimu mongo kawasa i ine in pinogaid nami kon tua,

¹⁰dá tanaa in pogumankudon kon i monimu bo kon bayongan intau in Israel, kon intau tanaa in nokosindogdon bo nosehatdon in indoian mako monimu popisí in ropot bo kawasa i Yesus Kristus intau in Nazaret inta ain pinopopakú monimu kon kayu pinoyotaḻempang, táe bui biniag i Allah in Sia nongkon sigad in intau minatoi.

¹¹Ki Yesusbí tua inta imakusud in tontagá kon Buk Motusi nanaa, ‘Batu inta iḷumbú in intau mita mogogaid kon bangunan, naanta nobaḻíbí batu inta totok in baraguna.’

¹²Diábí in kasaḷamatan kon ibanea mako koḻikudbí in kon i Yesus tontaní, sin kon dunia naa in diábí in intau ibanea in inogoian i Allah in kawasa moposaḷamat kon i naton.”

¹³Intau mita kon tua inta nosidang kon i Petrus bo kon i Yohanes noherang totok in nokoontong kon kobobarani nayadua, bokaka kinotaauanbí monia kon taya dua tua in intaubí inta diá nosikoḷa. Bain tua bo kinotoropan monia kon taya dua tua in dumoduduibí i Yesus.

¹⁴Mosia in diádon mokobayow kon i nayadua tua, sin intau inta bagu inundaman monia in simindogpa mako kon diug nayadua tua.

¹⁵Dá pinoḷuaidon monia kon yuang sidang tatua in rasul mita tatua, bodongka noyosingog bui in mosia,

¹⁶kai monia, “Onubí in pomiaan naton kon intau mita tatua? Sin bayongan in intau inta kon Yerusalem naa aindon nokotaau kon taya duabí tua in nogaid kon bayongan soaḷ inta mokoherang totok kon intau. Tua in diábí motaau bayowan naton.

¹⁷Táe ḷukadan naton sinbá diá totok in moisiar magí mako kon bayongan intau dá maníka bo ancamon naton in mosia, konbá mosia in diádon mopotaau magí mako kon tangoi i Yesus tatua.”

¹⁸Ki Petrus bo ki Yohanes in inoiní bui sinumuot kon yuang. Onda in noituotmai, totok in dinandi monia kon diádon motaau in taya dua mopotaa-taau mako in tangoi i Yesus tatua.

¹⁹Táe ki Petrus bo ki Yohanes in noguman kon i monia nanaa, “Raidon monimu kopia mongo onda in mopia-pia kon tayowon i Allah: Dumudui kon parenta monimu mongo dumudui kon parenta i Allah.

²⁰Sin diábí motaau in kami in mogogai mopotaau kon onu inta ain inontong bo dinongog nami tontaní.”

²¹Sidang tatua diá nokouḻí kon taḷá tobatúmai inta motaau baḻíon monia dodoyonan pohukuman kon i nayadua. Dá pangabisannea binuḻian monia in rasul mita tatua sin moondokdon in mosia kon intau moantó inta moduímai kon tangoi i Allah sin mosia ain nokoontong kon bayongan inta ain nobaḻí.

²²Sin intau inta inundaman tatua umurnea aindon noiḻiu kon opat nopuḷú notaong.

²³Naonda in pinoḷuai mako monia, ki Petrus bo ki Yohanes in minayá kon yobayat mita monia, bo inouman mita monia in onu inta siningog in imang mita itoi bo itoi mita in Yahudi kon i monia.

²⁴Naonda in yobayat mita monia tatua nokodongog kon ouman monia tatua, mosia in nosambayang kon i Tuhan noyotakin, kai monia, “O Tuhan, Ikobí in nomia kon ḷangit bo butá, dagat bo bayongan tombonunea.

²⁵Ki Daud ki amá nami inta kinawasa in Roho-Mu nokoimontandon in noguman nanaa, ‘Nongonu sin intau mita inta diá mopirisaya kon i Tuhan, tumorúbí; nongonu sin mosia in monomayábí kon inta diá baraguna?

²⁶Datu mita in dunia naa in mosadia mako moparang bo itoi mita in motobatú sin moḷawang kon i Tuhan bo Datu Mopoposaḷamat.’

²⁷Sin totuubí kon ki Herodes bo ki Pontius Pilatus aindon noyosipun kon kotá tanaa takin intau mita inta diá nonotaau kon i Tuhan bo intau mita in Israel sin moḷawang kon i Yesus, simpaḷ-Mu inta ain piniḻí-Mu bo inta kinoibog-Mu.

²⁸Mosia in notobatú in nogaid kon yagi-yagi, inta munadon sinantú-Mu kon mobaḻí. Bo sinantú-Mu intua pinodudui in kawasa bo ibog-Mu tontaní.

²⁹Bo tanaa mako Tuhan, indoiaika in mosia mongancambí kon inami. Poigumon nami kon ini-Mu Tuhan, ogoiaipa in kabaranian in bobantung-Mu mita tanaa in mopoyaput in Pirman-Mu mita.

³⁰Tuḷungaipa in kami sinbá intau mita nongotakit modait mopia bo onu inta diá motaau aidan in intau, yo mobaḻí sin kawasa bo ropot inta pinodoyon kon tangoi i Yesus, simpaḷ-Mu inta ain piniḻí-Mu tua.”

³¹Bo naonda in mosia nosambayang, tampat pinoyosipunan monia tatua in nodandú bo mosia komintan in kinawasa in Roho i Allah, dá mosia in diádon inangoian ondok in nopotaau in Pirman i Allah.

³²Komintan intau inta ain nopirisaya tua in nobiag notobatú kon gina bo porasaan. Diá tobatúmai in kon sigad monia tua in norai kon onu inta kon i monia yo tongábí monia tontaní in kitogi.

³³Takin kawasa moḷoben, rasul mita tatua in nopotaau kon ki Yesus ain nobiag bui. Dá totokdon in binarakatan i Allah in mosia.

³⁴Bo diábí in tobatúmai kon sigad monia tua in nobiag moyoyiga. Sin intau mita inta oyúon in butá andeka oyúon in baḷoi, nopotaḷui in butá andeka baḷoi monia, bo doit inta boḻi in pinotaḷui monia tua diaan monia

³⁵bo posarakan kon rasul mita. Doit tatua sila-silaion mako kon intau mita inta moparaḷu.

³⁶Natua doman in ki Yusup. Sia in nopotaḷui doman in butánea, bo doit boḻinea tatua dinianea inogoinea kon rasuḷ mita. Ki Yusup naa in intau tobatú inta buí in Lewi nongkon Siprus; rasuḷ mita modonoimai kon inia ki Barnabas (inta mangaḻenea, Mohohibur).