Read Mongondow RUM 1 Bible Online

RUM 1 - Mongondow bible

RUM 1

¹Utatku mita kon Rum inta kinotabi i Allah bo inta ain piniḻí-Nea sin baḻíondon umat-Nea. Akuoi in piniḻídon i Allah bo ain binaḻí-Nea intau inta mopotaau in Habar Mopia nongkon i-Nia.

²Habar Mopia tatua aindon pinodandi i Allah kon tungkuḷ intua inta pinongin nabi-Nea mita bo inta pinaisdon kon bonu in Buk Motusi.

³Habar Mopia tatua in soaḷbí ki Adí i Allah, inta ki Tuhan naton, ki Yesus Kristus. Inta aka podudui in awak ilo-ilow naa, yo Sia tua in buíbí i Daud.

⁴Táe podudui kon i Allah yo noniata magí Sia in ki Adíbí i Allah. Tua komintan noniata kon kawasa inta totok in moḷoben inta nokobiag kon i-Nia nongkon kinopatoian-Nea.

⁵Bo pinongin i-Nia doman tua ki Allah in nobogoi in totabi kon i-Nakó nobaḻí rasul, sin mopotutui in daḷan kon bayongan intau sinbá mopirisaya bo motoindudui kon i-Nia.

⁶Imakusud in singog bayongan in intau tua in moikobí doman. Moiko in inoiní domandon sin mobaḻí umat i Yesus Kristus.

⁷Tuamai in akuoi in nomais kon surat kon i monimu. Poigumon mako kon i Allah inta ki Amá naton bo ki Tuhan Yesus Kristus mobogoi in barakat bo kobiagan motompia kon i monimu.

⁸Muna-munamai pongin i Yesus Kristus, akuoi mopoyaput in sukur moantó kon i Allah sin moiko in totok bidon in mopirisaya kon i Kristus.

⁹Umuranku kotoropan in moiko aka mosambayang in akuoi. Kinotaauanbí i Allah kon onu in siningogku tua in totuubí. Sia tua in ki Allah inta oaidan-Nea in inaidanku takin gina motuḻid, oaidan tatua in mopoyaput in Habar Mopia soaḷ ki Adí-Nea.

¹⁰Poigumonkupa doman mako kon i Allah sinbá ogoian-Neapa in kasampatan tanaa mako in akuoi mokipodungkuḷ kon i monimu.

¹¹Akuoi in moibogdon totok in moyodungkuḷ monimu sinbá motaaupa mosilai kon i monimu kon onu inta ain pinonotabi in Roho i Allah sinbá modugangdon moropot in pirisaya monimu.

¹²Nanaa in makusudku, lantaran kita bo tumpaḷadon mopirisaya kon i Yesus Kristus, dá musti umuran mosirigonan in kita.

¹³Utatku mita! Ibogonku in bá kotaauan doman monimu kon mokakitdon in akuoi moibog mamangoi mokipodungkuḷ kon i monimu, tongá tantú oyúon in ḷabot. Sin ibogonku in bá oyúon doman bungai in oaidanku kon sigad monimu ná inta ain nobaḻí kon yua-yuak in intau mita inta deeman Yahudi kon tampat mita ibanea.

¹⁴Sin tuabí in musti aidanku kon bayongan in bangusa: intau nomangarti andeka inta diápa nomangarti, inta nosikoḷa andeka inta diápa nosikoḷa.

¹⁵Tuabí manangka i moibogdon totok in akuoi mopoyaput in Habar Mopia tatua kon i monimu inta nogutun kon Rum.

¹⁶Mopirisayabí totok in akuoi kon Habar Mopia tatua, sin Habar Mopia tatua in ropotbí i Allah moposaḷamat kon bayongan in intau inta mopirisaya; muna-munamai intau in Yahudi, bo bangusa doman ibanea.

¹⁷Sin pinongin Habar Mopia tatua ki Allah in nopoontongdon kon naonda in pogogaid sinbá hubungan in intau bo i Allah in moyoguḻitdon bui: aidnea kon tua in tongábí mopirisaya kon i Allah nongkon pinomangkoianpamai modapot in pangabisan. Tua in ná inta ain pinais kon bonu in Buk Motusi, nanaa, “Intau in nopirisayadon kon i Allah, sahingga in hubungannea takin i Allah notompiadon bui, bo intau tatua in mobiagbí!”[1]

¹⁸Nongkon soroga ki Allah in nopoontong in torú-Nea kon bayongan dosa bo oaid inta moraat, sin aid inta moraat tua in moḷamboi kon intau monotaau kon totundú mobanar soaḷ ki Allah.

¹⁹Onu in kinotaauan intau soaḷ ki Allah in noniatadon kon gina in intau, sin ain pinoniata i Allah kon intau.

²⁰Pinangkoipamai in Sia nomaḻí kon dunia naa, sipat mita i Allah inta diá koontongan, ná kaadaan-Nea saḷaku Allah bo kawasa-Nea inta mononoi, kinotaauan bidon in intau nongkon bayongan inta pinomia-Nea tua, sahingga intau in diábí motaau in dumodia.

²¹Intau in nonotaau bidon kon i Allah, táe diábí i horomat monia in Sia saḷaku Allah bo mosia in doí doman mosukur kon i-Nia. Sin soaḷbí mita inta diá in mangaḻenea in raion monia; nosindipdon in gina monia.

²²Iraimai monia mobijaksana bidon in mosia, bokaka mosia tua in nobodokbí.

²³Deemanbí ki Allah inta mononoi in sumbáan monia, táe patongbí inta ná batangan in mahaḷuk mita inta mato-matoipabí; umpamanea: intau, ḷagapan, mahaḷuk mita inta opat in sioḷnea, bo mahaḷuk mita inta ḷumandai in mayá.

²⁴Tuamai in pinomayádon mako i Allah in mosia kinawasa in ibog in gina monia mogaid kon inta moromú, sahingga in mosia mogaid kon onu inta mokokotor kon awak monia tontaní.

²⁵Ki Allah inta mobanar toḻiuanbí monia in onu inta diá totuu. Mosia in doíbí mosumba kon inta nomaḻí, táe tongábí inta binaḻí in sumbáan monia. Bokaka inta nomaḻíbí tua in musti dayowon modapot in kopaḷutan in dunia naa! Amin.

²⁶Popisí in nogaidon kon natua, dá pinomayádon mako i Allah in mosia dinumudui kon ibog monia inta mokooyá. Bobay mita in doí bidon kon ḷoḷaki ná biasamai saḷaku tabiat in intau táe mosia in moibog bidon kon tumpaḷa bobay.

²⁷Ná doman tua in ḷoḷaki, mosia monaḷámaidon kon i buḷoi monia bo mongibogdon kon tumpaḷa ḷoḷaki, tuamai in mosia motarima kon tontuḻínea podudui aid monia tatua.

²⁸Bo lantaran irasa in intau kon diábí paraḷu in mosia monotaau kon i Allah, dá pinomayá bidon mako i Allah in kogoguyaatan in raian monia, sahingga in nogaidon mosia kon soaḷ mita inta pinoton aidan.

²⁹Gina monia in nopuḻingdon yagi-yagi inta moraat, inta diá nobanar, moturá, aid mokotor, yoyaatan gina; ibog moḻimod, ibog moropatoi, ibog monguboḷ bo motagú kon gina bo moibo-ibog doman mongonguman kon soaḷ intau ibanea,

³⁰mosia in moibog doman moporaa-raatmai kon tangoi intau ibanea; mokaḷakuang bo diá koendar, mosakí doman gina monia kon i Allah[2] bo moibog doman totok mongonguman kon inta diá totuu. Mosia in mopandoi doman motayak kon cara mita mobagu kon pogaid kon inta moraat. Mosia moibog moḷawang kon guyanga;

³¹mosia in doíbí mosimangartian; diá doman mosatia bo diá doman in totabian kon tumpaḷa intau.

³²Kinotaauanbí monia, kon podudui in hukum i Allah, intau inta mogaid kon bayongan tua in patusbí hukumon modapot matoi. Táe umpakabí natua yo aidanbí doman monia intua komintan; bo nodapotbí in aka intau ibanea in momia kon soaḷ mita ná inta inaidan monia tua yo mosatujubí doman i mosia.