Read Mongondow RUM 10 Bible Online

RUM 10 - Mongondow bible

RUM 10

¹Utat mita, ibogonku totok bá bangusaku in posaḷamaton. Dá tuamai akuoi in totokdon in totu-totuu mosambayang kon i Allah sin kopontingan monia.

²Mobaranibí in akuoi in moguman kon mosia tua in totu-totuudon totok in mogaid kon oaidan i Allah. Táe ibog monia tua in diá podoyon kon onu inta sinundú i Allah.

³Diá kinotaauan monia mongo naonda in pogogaid i Allah monompia bui kon hubungan-Nea takin intau. Bo popisí in mosia moibog dumudui kon aid monia tontaní, dá mosia in doíbí dumudui kon aid inta sinundú i Allah.

⁴Hukum agama in Yahudi ain inintompodan i Kristus. Manangka intua intau inta mopirisaya kon i Kristus, hubungannea takin i Allah in motompiadon bui.

⁵Ki Musa in nomais nanaa, Intau inta ain noyodame bui i Allah inta pinodoyon kon hukum in agama, in nobiag sin motoindudui kon hukum in agama tatua.

⁶Táe aka moyodame i Allah sin podoyon kon pirisaya, yo nanaa in pinais kon Buk Motusi, “Dikadon in iko mosingog kon bonu in ginamu, ki ine in momonik in soroga? (mangaḻenea modia kon i Kristus moponag),

⁷ande ki ine in moponag kon dunia intau minatoi? (mangaḻenea mobingkat kon i Kristus nongkon sigad intau minatoi).”

⁸Nanaa in makusudnea, “Habar inta nongkon i Allah tua in nodiug totok kon inimu, kon bibig bo kon bonu in ginamu.” Tuata in habar inta pinoyaput magí-mako nami; habar kon intau in musti mopirisaya.

⁹Sin aka akúon in bibig monimu kon: “Ki Yesus tua in Tuhan”. bo ginamu in mopirisaya kon ki Allah ain nomiag bui kon i Yesus, dá iko in mosaḷamatbí.

¹⁰Sin takin ginanea, intau in mopirisaya, dá tarimaan i Allah in Sia saḷaku intau inta ain noyodame takin-Nea. Bo bibig in pinakénea nongaku sahingga pinosaḷamat in Sia.

¹¹Kon bonu in Buk Motusi ain pinais nanaa, “Intau inta mopirisaya kon i-Nia in diábí pokopooyáanmai.”

¹²Tua in pakéonbí kon bayongan intau, sin diábí in yoposinea kon intau in Yahudi bo bangusa mita ibanea. Sin ki Allah inta tobatú tua in Tuhanbí in bayongan in intau. Sia in mobogoibí in barakat mobayong kon bayongan in intau inta mokituḷung kon i-Nia.

¹³Kon bonu in Buk Motusi ain pinais nanaa, “Bayongan intau inta mokuani kon i Tuhan in mosaḷamatbí.”

¹⁴Táe naondabí in intau mokuani kon i Tuhan aka mosia bo diápa mopirisaya kon i-Nia? Naondabí in popopirisaya monia aka diápa dinongog monia in soaḷ Sia tua? Naondabí in mosia mokodongog kon soaḷ Sia aka diápa doman intau in nopotaau?

¹⁵Bo naondabí intau mayá mopotaau in habar tatua, aka mosia in diá potabá? Ain doman pinais kon Buk Motusi nanaa, “Mopiadon totok in koangoian in intau mita inta nodia kon Habar Mopia nongkon i Allah!”

¹⁶Táe diábí komintan intau in motarima kon Habar Mopia tatua. Sin ki Nabi Yesaya in noguman, “Tuhan ki inebí in mopirisaya kon habar inta pinoyaput nami?”

¹⁷Intau mita in nobaḻí mopirisaya sin mosia ain nokodongog kon habar tatua, bo habar tatua in dinongog sin oyúon in intau nopotaau in habar soaḷ ki Kristus.

¹⁸Táe akuoi in moḻibó: Degá diápa dinongog monia? Pasti dinongog bidon! Sin kon Buk Motusi ain pinais nanaa, “Singog monia ain kinodongogan kon bayongan in dunia naa, bo onu in pinotaau monia noiyaput kon popod in dunia.”

¹⁹Akuoi in bui moḻibó: Degá intau in Israel diápa nokotaau kon tua? Ki Musa in muna notubag kon soaḷ tanaa, kai-nia: “Nanaa in Pirman i Allah, ‘Baḻíon-Ku in moiko sinbá mointoi kon bangusa inta deeman umat bo baḻíon-Ku in moiko tumorú kon bangusa mita inta bodok.’ ”

²⁰Ki Nabi Yesaya nobarani doman in noguman bui nanaa, “Nanaa in pirman i Allah, ‘Intau inta diá motayak kon i-Nakó, ain nokodungkuḷ kon i-Nakó; bo Akuoi in nokipogontongdon kon i monia inta diá nopoḻibo-ḻibó kon soaḷ Akuoi.’ ”

²¹Táe soaḷ bangusa Israel, ki Nabi Yesaya in nosingog nanaa, “Nanaa in pirman i Allah, ‘Tumongo singgai Akuoi in mopoabat in ḻima-Ku kon tobatú bangusa inta motogat in gina bo diá motoindudui.’ ”