Read Mongondow RUM 11 Bible Online

RUM 11 - Mongondow bible

RUM 11

¹Akuoi in moḻibó: Degá sinaḷáandon i Allah in umat-Nea tatua? Diábí! Sin akuoipa naa in intaubí doman in Israel nongkon buí i Abraham, bo nongkon suku i Benyamin.

²Diábí! Ki Allah in diábí noḷumbú kon umat-Nea inta ain piniḻí-Nea muna-munamai. Bo kinotaauan bidon monimu utat mita in onu inta pinoguman kon bonu in Buk Motusi soaḷ ki Elia, wakutu in sia nopongadu kon i Allah soaḷ Israel. Ki Elia in noguman nanaa,

³“Tuhan, nabi-Mu mita ain iḻimod monia, bo meja mita inta pototuduan kon sosumba kon ini-Mu ain pinoguyaat monia. Dongkadon akuoi tontaní in nobiag bo ḷongasion doman monia ḻimodon in akuoi.”

⁴Onu in pinotubag i Allah kon i Elia? “Pitupa noribu in intau in sinaḷáan sin gamáan-Ku mobaḻí kapunyaan-Ku. Mosia tua inta diá kon dodai in onda nosumba kon i Baal.”

⁵Natua doman in mobaḻí tanaa mako: Oyúonpa doman topiḻik in intau mita inta ain piniḻí i Allah sin barakat-Nea.

⁶Ki Allah in nomiḻí kon i monia sin pinodoyon kon tabi-Nea, deemanbí pinodoyon kon aid monia. Sin aka Sia nomiḻí kon i monia pinodoyon kon aid in intau, dá tabi tatua in deeman bidon totu-totuu tabi.

⁷Dá naonda degá? Intau in Israel diá nokouḻí kon onu inta sinayak monia. Tongábí topiḻik in intau mita inta ain piniḻí i Allah in nokouḻí. Intau mita ibanea aindon notogat in gina monia in mokodongog kon oiní i Allah.

⁸Sin kon bonu in Buk Motusi ain pinais nanaa, “Binaḻídon i Allah in mosia naonda bo nosiug; bo dapot kon singgai naa mata monia in diá mokoontong bo bongoḷan monia in diá mokodongog.”

⁹Ki Daud in noguman doman nanaa, “Pomayádon mako in rame monia tua mobaḻí naonda bo poyogaḷap kon i monia tontaní bo mobaḻí bubú inta koḷabúan monia bo morimumud!

¹⁰Bo pomayádon mako in mata monia mobilog, sahingga in mosia in diá mokoontong; bo pomayádon mako in mosia in tantú mobungkut.”

¹¹Ḻibóonku doman: Wakutu intau in Yahudi noḷabúdon, yo degá nobaḻí intua sinbá mosia in morimumud? Deemanbí natua! Táe popisíbí in mosia ain nogaid kon mokobaradosa, manangka intua intau mita ibanea in pinosaḷamat, sahingga intau in Yahudi nointoi kon bangusa mita ibanea tua.

¹²Popisí in intau Yahudi kotaḷá bo doí dumudui kon kinoibog i Allah, dá intau mita ibanea in binarakatan i Allah. Apa doman hubungan in bangusa Yahudi bo i Allah in motompiadon bui; tantú lebebí moḷoben in barakat ogoi i Allah kon i monia!

¹³Tanaa akuoi in mogumandon kon i utat mita inta deeman intau in Yahudi! Saḷaku rasul kon intau mita deeman Yahudi, totokbí in untuonku in oaidanku tanaa.

¹⁴Haraponku mako akuoi in mokopomuká kon intoi kon intau mita tobangusaku, sin aka natua yo motaau posaḷamatonku in tongonumai intau nongkon i monia tua.

¹⁵Sin mosia ain sinolak i Allah, dá hubungan in intau kon dunia naa takin i Allah in motompiadon bui; apadoman aka mosia in tarimaan i Allah! Tantú tua in notongkaibí in naonda bo intau minatoi inta nobiagdon bui!

¹⁶Aka roti tobatú inta muna bo ain inogoi kon i Allah, yo tua in mangaḻenea bayongan roti tatua in inogoidon komintan kon i Allah doman. Bo aka uakat in pangkoinea kapunyaan i Allah, dá mangaḻenea kon tua, tanganea mita in kapunyaanbí doman mita i Allah.

¹⁷Tosilai in tanga mita in kayu Zaitun — tuata intau mita in Yahudi — ain pinongkó. Bo kon paḷot in pinomongkóan tatua pinopokompitdon in tanga in pangkoi zaitun ḷoḷog, tuata in ki utat mita inta deeman Yahudi. Ki utat pinopokompitdon kon tua sinbá ki utat in mokorasa kon bayongan inta mopia nongkon kobobiag in rohani in intau mita Yahudi.

¹⁸Tuamai in dikabí moiko in diá mopandung kon tanga mita inta ain pinongkó tatua. Toropbí kon moiko in tongábí tanga. Deemanbí tanga in mobogoi in kaanon kon uakat, táe uakatbí in mobogoi in kaanon kon tanga mita.

¹⁹Táe ki utat in moguman degá nanaa, “Oo, táe tanga mita tatua in pinongkó sinbá akuoi in motaau popokompit kon pangkoinea!”

²⁰Totuubí intua. Táe mosia in iḷumbú sin diá mopirisaya, bo Moiko in sinarima sin mopirisaya. Dá tuamai in dikabí dumodia in Moiko sin sinarimadon; Moiko in mustibí motoguondok.

²¹Sin aka ki Allah bo diá motabi in moḷumbú kon intau mita in Yahudi inta pinoumpama tanga taakan tua, yo dikabí kai monimukamai oyúonbí in tabi-Nea in moḷumbú kon i monimu!

²²Dá kon naa in kinoontongandon naton in koḷoḷoben in tabi i Allah bo kototogat doman in gina-Nea. Diábí irekeng-Neamai mopoḷabú in hukuman kon i monia inta binaradosa, táe Sia in totok doman mopia kon i utat, asaḷ bo ki utat in umuran mobiag nongkon kopopia-Nea. Aka diá yo iko in ḷumbúon-Neabí doman.

²³Bo soaḷ mita intau in Yahudi tatua, aka mosia bo mopirisayadon bui, dá tarimaan bidon bui, sin kawasabí i Allah in motarima bui kon i monia.

²⁴Iko inta deeman nongkon bangusa Yahudi in naonda bo tanga nongkon pangkoi in zaitun ḷoḷog. Dá aka iko inta noyoposi in sipatmu bo notaau pinopokompit kon pangkoi in zaitun taakan, dá apadoman intau mita in Yahudi inta pinoumpama tanga mita in pangkoi in zaitun inta taakan tatua. Tantú mogampa-gampangbí i Allah in mopoyobui kon i monia kon pangkoinea tontaní.

²⁵Utat mita! Haraponku mako moiko in diá monganggap kon ain nonotaau kon bayongan in yagi-yagi. Sin oyúon in soaḷ inta kinoibog i Allah, táe diápa kinotaauan in intau. Bo ibogonku in kotaauan monimu intua; nanaa: tongobotak intau in Yahudi mokopotogat kon gina, táe cara monia tua in tongábí modapot in motompodon in kobayong in intau inta deeman Yahudi in mamangoi kon i Allah.

²⁶Sahingga in bayongan intau in Yahudi posaḷamatonbí sin kon bonu in Buk Motusi ain pinais nanaa, “Datu Mopoposaḷamat in mamangoi nongkon Sion; Sia in momopatbí kon bayongan aid moraat kon buí i Yakub.

²⁷Akuoi in nogaid kon dodandian takin i monia kon wakutu in Akuoi nongampung kon dosa mita monia.”

²⁸Popisí intau Yahudi doí notarima kon Habar Mopia nongkon i Allah, dá mosia nobaḻí saturu i Allah; bo tua in nobaḻí bidon kauntungan i monimu inta deeman intau Yahudi. Táe lantaran mosia bo ain piniḻí i Allah, dá mosia in umuran kinotabi i Allah sin popisí in mogoguyang monia.

²⁹Sin aka ki Allah momiḻí kon intau bo mobogoi in barakat kon intau tatua, yo diábí kon dodai in onda in Sia mogamá bui kon onu inta ain pinomia-Nea.

³⁰Koḻipod in moiko diá motoindudui kon i Allah. Táe tanaa in pinoniatadon i Allah kon moiko in pinilatandon nongkon taḷá monimu, sin popisí in intau Yahudi diá motoindudui.

³¹Natuabí doman in intau mita in Yahudi tatua. Tanaa mako mosia in diá motoindudui kon i Allah, sinbá moiko in pinoponiataan kon noipilatdon nongkon taḷá. Táe bain mosia doman in[15] poniataan doman kon nobebasdon nongkon taḷá.

³²Sin ki Allah in nopomayádon mako kon bayongan intau kinawasadon in aid mita inta diá motoindudui, sinbá Sia in motaau mopoontong in tabi-Nea kon i monia komintan.

³³Totuu motoyang tabi i Allah! Totuu doman moḷoben in kabijaksanaan bo pongotahuan-Nea! Ki inebí in mokotaridi kon kaputusan-Nea mita tatua? Ki ine doman in momangarti kon pogogaid-Nea?

³⁴Kon bonu in Buk Motusi ain pinais nanaa, “Ki ine in nonotaau kon raian i Tuhan? Ki ine in motaau mononggina kon i-Nia?

³⁵Ki inebí in nokoimontan nobogoi in onukadon kon i-Nia, sahingga in Sia musti monoḻiu kon tua?”

³⁶Ki Allah in nomia kon bayongan yagi-yagi. Komintanbí nongkon i Allah bo pinomakusudbí doman kon i-Nia. Dinayo-dayowdon in ki Allah nodapot in kopaḷutan dunia naa! Amin.