Read Mongondow RUM 12 Bible Online

RUM 12 - Mongondow bible

RUM 12

¹Utat mita! Ki Allah totok in mopia kon i naton. Manangka intua akuoi in mopoigum totok sinbá moiko moposumba in awakmu saḷaku sosumba inta nobiag sin kopontingan i Allah. Sosumba tatua in tongábí ogoi kon i Allah bo inta mokosanang kon gina-Nea. Tuabí in ibadamu inta sabanarnea.

²Donaai in moiko dumudui kon ibog in dunia naa. Pomayádon mako in ki Allah in monoimbagu kon i monimu, sinbá mobaḷui in moiko. Sahingga in kotaauandon monimu onu kinoibog i Allah, tuata inta mopia bo inta mokosanang kon gina-Nea bo inta mosompurna.

³Ki Allah in nobogoidon in totabi-Nea kon i-Nakó. Manangka intua utat mita akuoi in mononggina kon i monimu nanaa: Donaaibí in moiko morasa kon lebedon moḷantud nongkon kaadaanmu sabanarnea. Táe naa in aidai: mokopoompá kon raian bo nilaidon in kaadaan monimu tontaní. Nilai in kaadaan monimu tontaní podudui in komampuan inta inogoi i Allah kon inia, sin sia in mopirisaya kon i Yesus.

⁴Awak naton naa in nobayongbí anggotanea. Bo pomuḷoi in anggota tatua oyúonbí oaidan kon batúannea.

⁵Natua doman in kita. Umpaka kita in nobayong, táe kita in tongoawakanbí monag, sin kita ain notobatú kon i Kristus. Bo kita komintan in noyoguputbí in tobatú bo tobatú saḷaku anggota in awak tobatú.

⁶Kita in inogoianbí in totabi inta noyo-noyoposi. Totabi mita tatua in inogoi i Allah kon i naton pinoduduibí kon ibog-Nea. Manangka intua onu inta pinonotabi tatua in mustibí pakéon naton. Intau inta nokouḻí kon totabi mopohabar in habar nongkon i Allah, mustibí mopohabar in habar nongkon i Allah podudui in komampuannea.

⁷Intau inta nokouḻí kon totabi motuḷung kon intau ibanea, yo musti in sia totu-totuu motuḷung kon intau ibanea. Intau inta nokouḻí kon totabi mobogoi in totundú, dá musti in sia totu-totuu doman mobogoi in totundú.

⁸Intau inta nokouḻí kon totabi mononggina kon intau ibanea, yo musti in sia totu-totuu mononggina kon intau ibanea. Ki ine in mosila-silai mako kon yagi-yagi, yo musti totu-totuu aidannea intua. Intau inta nokouḻí kon totabi mobaḻí itoi, yo musti in sia mobaḻí itoi totu-totuu. Intau inta nokouḻí kon totabi moponiata in tabi kon tumpaḷa intau, yo mustibí aidannea intua takin sanang in gina.

⁹Kotabibí takin gina motuḻid. Poyayú inta moraat bo kadai kon onu inta mopia.

¹⁰Utat mita, moiko in musti umuran mototabian tobatú bo tobatú naonda bo mogutat motoḷuadí kon tombonu in baḷoi, bo mosiunaan mohoromat.

¹¹Tantú mokoporajing in mogaid, donaai mokopomaḷat. Pogaid kon oaidan i Tuhan takin ibog moḷoben inta nongkon Roho i Allah.

¹²Utat, poharapdon kon i Tuhan takin ḷunganga in gina, mokoposabar aka koantugan in susa, bo umuran posambayang.

¹³Tuḷungai bo ogoiai onu in paraḷu in intau mita Keresten ibanea, bo tomubí takin pia in gina in utat mita Keresten umpakabí diá nogogintaauan monimu in mosia. Tarima doman takin sanang in gina in mosia kon baḷoimu.

¹⁴Poigumdon kon i Allah sinbá barakatan-Nea in intau mita inta nomogutú kon inimu. Poigumaibí kon barakat nongkon i Allah, donaaibí mopogodi-godimai.

¹⁵Koḷungangadon in gina monimu takin intau mita inta nongoḷunganga doman in gina, bo pongombaḷdon takin intau mita inta mongombaḷ.

¹⁶Moiko in musti mobiag mototabian tobatú bo tobatú. Donaai morai kon soaḷ mita inta moḷantud.[16] Táe raibí in soaḷ mita inta komampuan aidan. Dikabí tumekeng mopandoi in iko.

¹⁷Aka intau mopoaid in moraat kon inimu yo donaaibí tuḻíanmu in moraat. Aidaibí in onu inta inanggap mopia in bayongan intau!

¹⁸Moiko musti moramuji mobiag mopopiaan takin bayongan in intau.

¹⁹Utatku mita inta kinotabiku, donaai in moiko motagú kon sakí in gina bo monomayá monuḻí, pomayádon mako bain ki Allah in motuḻí. Sin kon bonu in Buk Motusi ain pinais nanaa: “Akuoibí in motuḻí. Hukumon-Kubí in sia, guman i Tuhan.”

²⁰Nanaa in aidai, aka gogoyon in saturumu yo ogoiai in sia in kaanon, aka moyogang in sia, yo ogoiai inumon. Sin aka tua in aidanmu, yo aidmu tatua in mokopooyábímai kon inia.

²¹Dika moibog taḷowon in moraat, táe ḷawangbí in moraat tua takin aid inta mopia.