Read Mongondow RUM 13 Bible Online

RUM 13 - Mongondow bible

RUM 13

¹Pomuḷoi intau in musti dumudui kon pomarenta, sin diábí in pomarenta in diá nokouḻí kon kawasanea nongkon i Allah. Bo pomarenta masai naa nopobayá in kawasanea podudui in parenta i Allah.

²Tuamai intau inta momaḷawang kon pomarenta in notongkaibí in nomaḷawang kon onu inta ain sinantú i Allah. Bo ki ine in mogaid kon natua hukumonbí.

³Sin ki ine in mogaid kon inta mopia donaai bidon moondok kon pomarenta, tongábí mosia inta mogaid kon moraat tua in musti moondok. Dá aka iko moibog bá diá moondok kon pomarenta, dá aidaidon in onu inta mopia bo pujionbí in iko.

⁴Sin pomarenta tua in mogogaidbí kon oaidan i Allah inta mogaid kon kopiaanmu. Táe aka iko in mogaid kon inta moraat, dá iko in mustibí moondok kon pomarenta, sin deemanbí tongá ibo-ibog sia in inogoian in kawasa mohukum kon intau. Sia tua in mogogaidbí kon oaidan i Allah inta nopoḷabú in hukuman i Allah kon intau mita inta mogaid kon moraat.

⁵Tuamai utat, moiko in mustibí mokopotoindudui kon pomarenta, deemanbí tongá popisí in iko doí hukumon, táe popisíbí doman kon ginamu in moguman kon natua.

⁶Tuabí doman in nobaḻí dodoyonan kon nongonu sin moiko in moguboḻibí kon pajak, lantaranbí pomarenta tua in pogawai i Allah inta nopobayá in oaidan nongkon i Allah.

⁷Dá uboḻiaidon kon pomarenta onu in musti uboḻianmu kon inia. Uboḻiai in pajak, aka mustibí in iko moguboḻi kon pajak; bo uboḻiaidon in bea, aka mustibí uboḻianmu intua. Hargaaibí in mosia inta patus hargaan, bo horomatbí i mosia inta musti horomaton.

⁸Donaaidon monomboḻi kon onuka kon inekabí, táe moiko in musti mototabian. Sin intau inta motabi kon tumpaḷa intau, sia tua ain dinumudui kon bayongan hukum i Musa.

⁹Sin hukum agama in Yahudi in noguman nanaa: Dika monuaḻing, dika moḻimod, dika monakow, dika moibog in kapunyaan intau ibanea, bo bayongan parenta ibanea ain notangkup kon hukum tobatú tanaa, “Kotabibí in tumpaḷa intau, naonda bo kototabimu kon awakmu tontaní.”

¹⁰Intau inta motabi kon intau ibanea, yo diábí in sia mopoaid in moraat kon intau tatua. Manangka intua intau inta motabi kon tumpaḷa intau, sia tua in dinumuduidon kon bayongan inta ain pinarenta kon hukum i Musa.

¹¹Koḻikud intua komintan, kinotaauan monimu kon masai in naa wakutudon monimu mobangon nongkon pinosiugan. Sin wakutu poposaḷamatan kon i naton kodiug-kodiugdon totok nongkon wakutu in kita bagupa nopirisaya.

¹²Doḷom diádon moonggot; topípa mobayagdon. Dá koḻigai mogogaidon in kita in mogaid kon inta diá mopia, bo momakédon in sonjata inta mobayag.

¹³Musti in kita mogaid kon soaḷ mita motompia ná inta biasamai aidan in intau kon tungkuḷ in mobayagpa. Dika mogaid kon rame inta moiḻiu, ande moḷoḷangu. Dika mogaid kon inta mokoromú ande oaid inta diá koendar. Dika moporopatoi, bo dika mosiintoian.

¹⁴Pomayádon mako bá ki Tuhan Yesus Kristus in monantú kon onu in musti aidan monimu. Bo dika dumudui kon ibog in awak inta baradosa naa sin mopoorop in onu inta koibognea.