Read Mongondow RUM 16 Bible Online

RUM 16 - Mongondow bible

RUM 16

¹Popokanalkudon kon i monimu in ki utat naton bobay, ki Pebe in tangoinea, sia in nobantung kon jamaat inta kon Kengkrea.

²Tarimadon in sia saḷaku tobatú umat i Tuhan. Mustibí natua in intau mita inta mopirisaya mositarimaan. Tuḷungai in sia aka oyúon in paraḷunea kon i monimu, sin sia tontaní ain notuḷung kon intau mobayong bo kon inakó doman.

³Poyaputpa in salamku kon i Priskila bo kon i Akwila, bo kon yobayatku mita inta tumpaḷa nogaid kon oaidan i Kristus.

⁴Mosia tua ain nopotaru in nyawa monia sin moposaḷamat kon inakó. Akuoi takin jamaat mita inta deeman intau in Yahudi mopoyaput in sukur moantó kon i monia tua.

⁵Poyaputpa in salamku kon jamaat mita inta noyosipun kon baḷoi monia. Salam doman kon i utatku ki Epenetus inta kinotabiku, tuata in intau inta muna-munamai nopirisaya kon i Kristus kon Asia.

⁶Poyaputpa doman in salamku kon i Maria. Sia ain irumoriga totok in nogaid sin kopontingan monimu.

⁷Poyaputpa doman in salamku kon i Andronikus bo kon i Yunias.[18] Mosia tua in toḻipúanku bo nokoimontandon in sinumuot kon ponjara takinku. Wakutu in akuoi diápa nopirisaya kon i Kristus mosia in munadon nopirisaya. Tangoi monia tua in kinotaauan bidon totok in rasul mita.

⁸Salampa kon i Ampliatus, inta kotabiku sin sia ain noyotakinku notobatú takin i Tuhan.

⁹Poyaputpa in horomatku kon i Urbanus, yobayat topogaidan naton sin kopontingan i Kristus. Bo horomatku doman kon i Stakhis inta kinotabiku.

¹⁰Salam kon i Apeles. Kotoinduduinea kon i Kristus aindon nouji. Salam doman kon motoḷuadí i Aristobulus,

¹¹bo kon i Herodion. Sia tua in tosukuku. Salam doman kon i utat naton inta mopirisaya kon i Kristus inta tombonu in baḷoi i Narkisus.

¹²Salam doman kon i Tripena bo kon i Triposa inta ain noramuji totok in nogaid sin kopontingan i Tuhan, bo salam doman kon i Persis inta kinotabiku. Sia doman tua inta ain noramuji totok in nogaid sin kopontingan i Tuhan.

¹³Salam kon i Rupus bo kon i inánea inta inanggapkudon ná ki ináku tontaní. Ki Rupus tua in intau inta ain piniḻí i Tuhan bo mopia doman in oaidnea.

¹⁴Poyaputpa doman in salamku kon i Asinkritus, kon i Plegon, kon i Hermes, kon i Patrobas, kon i Hermas bo kon bayongan intau inta mopirisaya kon i Kristus inta noyotakin monia.

¹⁵Salam doman kon i Pilologus bo kon i Yulia; kon i Nereus bo kon i bobaynea; kon i Olimpas bo kon bayongan intau mopirisaya inta noyotakin monia.

¹⁶Posisalamanbí takin tabi saḷaku tumpaḷa utat inta mopirisaya kon i Kristus. Bayongan jamaat i Kristus kon naa nopoyaput in salam kon i monimu komintan.

¹⁷Utatku mita! Indongogaipa in tongginaku tanaa: Mokopoingatdon kon intau mita inta moibog moropatoi kon jamaat bo inta mopotombauk in pirisaya intau kon i Tuhan. Sin soaḷ tatua in noyoposibí in inta ain sinundú kon i monimu. Dikadon moyobayat in intau mita natua!

¹⁸Sin intau mita inta momia kon natua, deemanbí mogaid sin kopontingan i Kristus inta Tuhan naton, táe tongábí motayak kon kasanangan in gina monia tontaní. Dondouḷug bo singog monia moaḷus inta kodongogan tua in tongábí pakéon monia monguboḷ kon intau mita inta diápa nonotaau in onu bo onu.

¹⁹Bayongan in intau ain nonotaau kon ná onda in kotoindudui monimu kon totundú soaḷ Habar Mopia inta nongkon i Allah. Nokotaaumai kon natua in aid monimu, nopia totok in ginaku. Ibogonku mobijaksana in moiko in mogaid kon soaḷ mita inta mopia, bo diá motaau mogaid kon soaḷ mita inta moraat.

²⁰Ki Allah inta mobogoi in kobiagan motompia kon intau, mopotungkudbí in Ibilis kon ḻimonag in kawasamu bo rimumudonmu in sia. Poigumon doman mako, moiko in umuran barakatan i Yesus Kristus, Tuhan naton![19]

²¹Yobayat topogaidanku ki Timotius, nopoyaput doman in salamnea kon i monimu. Ná doman tua in ki Lukius, ki Yason bo ki Sosipater, inta tosukuku.

²²Nomais kon surat tanaa in akuoi ki Tertius. Akuoi in mopoyaput in salam pogogutat kon i monimu.

²³Ki Gayus nopoyaput doman in salam kon i monimu. Akuoi in nongandupa kon baḷoinea, bo jamaat nami nongandupa doman noibada kon tua. Ki Erastus, tobatú itoi in mokokadai kon doit kon kotá nokipoyaput doman in salamnea kon i monimu. Ná doman tua in ki Kwartus, ki utat naton. [

²⁴Poigumondon mako, ki Tuhan naton ki Yesus Kristus in momarakat kon i utat mita. Amin.]

²⁵Dinayo-dayowdon in ki Allah! Sia in mongawasa moginrigon kon pirisaya monimu podudui in Habar Mopia nongkon i Allah inta pinotaauku soaḷ ki Yesus Kristus. Habar inta pinotaauku tua in notongkai in onu inta pinoontong i Allah kon inakó; tuata in soaḷ tomayá i Allah inta noonggotdon totok in kinotaauan intau.

²⁶Táe masai naa, podudui in parenta i Allah inta mononoi, tomayá tatua ain pinoniata bo ain pinotaau kon bayongan intau, inta pinongin onu inta ain pinais in nabi mita, sinbá mosia komintandon mopirisaya bo motoindudui kon i Allah.

²⁷Tongábí Sia-sia mita in Allah, mobijaksana totok in Sia. Poigumondon mako Sia in umuran duíon bo dayowon pomuḷoi mako pongin i Yesus Kristus! Amin.[20] Horomat nami, Ki Paulus, mogogaid kon oaidan i Kristus Yesus