Read Mongondow RUM 2 Bible Online

RUM 2 - Mongondow bible

RUM 2

¹Manangka intua, utat mita ki inebí in iko nion sin mohakim kon intau ibanea? Iko tontaní in kotaḷábí doman! Aka iko bo mopotaḷá kon intau ibanea, bokaka tumpaḷa nogaid kon ná inta inaidan monia tua, dá in mangaḻenea kon tua, ikodon tontaní in nopoḷabú in hukuman kon inimu tontaní.

²Kinotaauan bidon naton kon aka ki Allah in mopoḷabú in hukuman kon intau mita inta nogaid kon soaḷ mita ná tatua, yo noitutuibí in kaputusan i Allah tatua.

³Táe moiko in nomia doman kon soaḷ mita inta pinonapud monimu kon intau ibanea! Degá iraimai monimu, moiko nion in diábí kotugatan in hukuman i Allah?

⁴Andeka diá pandungonmai monimu in totabi, kososabar-Nea bo kopopia in gina-Nea in notarima kon i monimu? Tantú kinotaauan bidon monimu kon ki Allah in nopoontong in kopopia in gina-Nea, sin ibogon-Nea moiko in mogogaidon mogaid kon dosa mita.

⁵Táe moiko totok motogat in gina bo doí momaḷui kon gogutú. Dá mangaḻenea kon tua moiko bidon tontaní in modugang kon roriga in hukuman kon i monimu kon Singgai Tumi, aka popoontongdon i Allah in torú-Nea bo hukuman inta moadil.

⁶Ki Allah in mobogoibí in tontuḻínea podudui in oaid monia.

⁷Bo ki Allah in mobogoibí in kobiagan mopia bo mononoi kon i monia inta umuran mogaid kon inta mopia, kon i monia inta motayak kon inta momulia, inta motayak kon kahoromatan bo inta motayak kon inta mononoi.

⁸Táe intau inta tongá morai kon kopontingannea tontaní bo diá doman motoindudui kon i Allah, bo tongá doman umuran dumudui kon inta moraat, intau mita natua in kosakibí totok in gina i Allah.

⁹Intau inta moibog mogaid kon inta moraat in mosikisa bo moyoyiga, muna-munamai intau in Yahudi bo moiduduimai in bangusa doman ibanea.

¹⁰Tongá bayongan intau inta moibog mogaid kon inta mopia, ogoianbí i Allah in kamuliaan bo kahoromatan takin kobiagan motompia, muna-munamai intau in Yahudi, moiduduimai kon tua bangusa doman ibanea.

¹¹Sin diábí poyoposion i Allah in bayongan intau.

¹²Intau mita inta deeman bangusa in Yahudi binaradosabí doman umpaka mosia in diá monotaau kon hukum agama Yahudi. Dá mosia in hukumonbí tongá diá pinodoyon kon hukum tatua. Táe intau mita in Yahudi binaradosa naonda in kinotaauan monia in hukum tatua. Dá mosia ihukum pinodoyon kon hukum tatua.

¹³Sin hubungan in intau takin i Allah in moyoguḻit bui, deemanbí popisí in intau tatua nonotaaudon kon hukum agama in Yahudi, táe popisíbí in sia nogaidon kon onu inta pinais kon bonu in hukum tatua.

¹⁴Intau mita ibanea in diá nonotaau kon hukum agama Yahudi. Táe aka intau mita tatua bo moibogbí mogaid kon onu inta pinarenta kon hukum tatua, yo mosia bidon tua in mobaḻí hukum kon i monia tontaní, umpakabí mosia in diá nonotaau kon hukum agama Yahudi.

¹⁵Aid monia moponiatadon kon onu inta pinarenta in hukum tatua noipaisdon kon bonu in gina monia. Gina monia mobogoi doman in katarangan kon soaḷ tatua, sin mosia tontaní oyúon in potaḷáan bo oyúon doman in totuuon in raian monia.

¹⁶Natuata in mobaḻí kon singgai inta ain sinantú tua. Kon Singgai tatua, podudui in Habar Mopia inta pinoyaputku naa, ki Allah pongin i Yesus Kristus mohakim kon bayongan inta noibuni kon bonu in gina bo raian in bayongan intau.

¹⁷Táe tanaa naonda in moiko uḻe utat? Moiko in mongaku intau Yahudi. Moiko in kinumadai kon hukum agama Yahudi bo mopia totok in gina monimu kon hubungan monimu takin i Allah.

¹⁸Moiko in nokouḻí kon totundú mita nongkon hukum tatua, dá kinotaauanmudon onu in kinoibog i Allah bo motaau domandon monantú kon onda inta mopia.

¹⁹Bo moiko noyakinbí kon moiko nion itoi in intau bilog bo nobaḻí bayag kon i monia inta nobiagpa kon sindip;

²⁰bo nobaḻí doman guru kon i monia inta nobodokpa, bo kon i monia inta nobogápa. Yo iko in noyakin bidon kon bonu in hukum agama Yahudi, mokouḻí bidon in iko kon bayongan pongotahuan bo totundú inta nobanar.

²¹Ki utat in motundú kon intau ibanea, yo nongonu sin iko in diábí motundú kon inimu tontaní? Ki utat in motundú kon dika monakow, yo nongonu sin iko in monakowbí!

²²Iko motundú kon intau dika monuaḻing, yo nongonu sin iko tontaní in monuaḻingbí! Iko morongó kon bayongan in berhala, táe nongonu sin iko in mayábí mogamá kon barang mita inta kon bonu in baḷoi in berhala mita tatua.

²³Moiko in dumodia sin oyúon in hukum i Musa kon i monimu, táe nongonu sin moiko in moningkuḻebí kon i Allah takin oaid doí dumudui kon hukum-Nea mita.

²⁴Kon bonu in Buk Motusi pinais nanaa: “Popisí moiko intau mita in Yahudi, dá tangoi i Allah iromu-romúmaidon kon sigad in intau ibanea.”

²⁵Aka iko bo motoindudui kon hukum in agama Yahudi, dá oyúonbí in mangaḻe in sunat tatua kon i monimu. Táe aka iko bo doí dumudui kon soaḷ mita inta pinarenta kon bonu in hukum tatua, yo totokbí in diá in mangaḻe in sunat tatua kon inimu.

²⁶Aka intau deeman Yahudi inta diá sinunat dinumudui kon hukum agama in Yahudi, yo sia in inanggap bidon i Allah naonda bo intau inta ain sinunat?

²⁷Bo intau inta diá sinunat tua in mopotaḷá kon i monimu intau in Yahudi, sin oyúondon in hukum agama monimu bo sinunat domandon in moiko, táe moiko tontaní in doíbí dumudui kon hukum tatua. Mosia tua in diábí sinunat táe totu-totuubí dinumudui kon hukum in agama Yahudi.

²⁸Sin aka totu-totuu intau in Yahudi; yo deemanbí tongá tangoinea intau in Yahudi, ná doman tua intau inta ain totu-totuu sinunat deemanbí tongá kai intau sinunatdon in sia.

²⁹Sin nanaabí, intau inta totokanea in Yahudi in intaubí inta ginanea totu-totuubí jiwa intau Yahudi. Ná doman tua, sunat inta totokanea in sunatbí kon gina inta pinomia in Roho i Allah, deemanbí inta pinais kon bonu in buk. Bo intau natua in dayowon i Allah, deemanbí dayowon in intau.