Read Mongondow RUM 7 Bible Online

RUM 7 - Mongondow bible

RUM 7

¹Utat mita! Moiko komintandon nonotaau kon hukum. Dá kinotaauan bidon monimu kon intau in kotugatanbí in hukum kon dodai in mobiagpa in sia.

²Umpamanea, bobay inta kobuḷoi noyotogotpabí in hukum takin i buḷoinea kon wakutu in ki buḷoinea nobiagpa. Táe aka ki buḷoinea bo matoidon, dá noipilat bidon in sia nongkon hukum inta nopoyotogot kon i nayadua motonibuḷoi tua.

³Tuamai aka bobay tatua bo noyogaḷumdon in ḷoḷaki ibanea kon wakutu in ki buḷoinea nobiagpa, dá bobay tatua in tangoian nokituaḻing. Táe aka ki buḷoinea minatoidon, dá podudui in hukum, bobay tatua noipilat bidon. Bo aka sia in pobuḷoiondon in ḷoḷaki ibanea, dá sia in deeman bidon nokituaḻing.

⁴Natua domandon in moiko utatku mita. Kon hukum agama in Yahudi, moiko ain minatoi, sin moiko ain sinobatú takin awak i Kristus bo nobaḻídon kapunyaan-Nea inta ain biniag bui nongkon kinopatoian. Sia biniag nongkon popatoi sinbá kita in mobaragunadon kon i Allah kon dodai in mobiagpa.

⁵Sin koḻipod kita in nobiag podudui ibog in awak naa. Kon wakutu intua ibog mita inta mokobaradosa in nomuká sin oyúon in hukum agama, bo tua in nokadai kon inaton. Manangka intua kita in mogaid kon soaḷ mita inta mokopopisí kon kopatoian.

⁶Táe tanaa in kita in diádon noitogot kon hukum in agama Yahudi. Kita ain bidon minatoi kon hukum inta koḻipod nongawasa kon i naton. Kita in diá bidon mobantung ná aid tungkuḷ intua, inta pinodudui kon hukum inta pinais. Táe tanaa kita in mobantungbí podudui in aid mobagu inta sinundú in Roho i Allah kon i naton.

⁷Aka natua, yo onu in singogon naton? Moraat degá in hukum agama in Yahudi? Tantú diábí! Sin hukumbí tatua in notundú kon inakó soaḷ dosa. Sin diábí kinotaauanku onu in sinangoian Ibog moiḻiu, aka hukum agama diá noguman, “Donaai motamaa.”

⁸Táe pinongin hukum agama, dosa in nokouḻí kon kasampatan mopomuká kon bayongan ibog moiḻiu kon bonu in ginaku; sin aka hukum in agama bo diá, yo dosa tua in matoibí.

⁹Koḻipod akuoi in nobiag diábí nomaké in hukum agama. Táe naonda in hukum agama oyúondon, yo dosa in mulaidon mobiag

¹⁰bo akuoi in minatoi. Dá hukum agama tatua, inta muna pinopomakusud kon mobogoi in kobiagan, táe naanta mokopoangoibí kon popatoi kon inakó.

¹¹Sin popisí in hukum agama tatua, dá dosa in nokouḻídon kon kasampatan monguboḷ bo moḻimod kon inakó.

¹²Hukum agama tua in nongkon i Allahbí, bo pomuḷoi in parenta kon bonu in hukum tatua namangoibí nongkon i Allah, manangka intua moadilbí bo mopia.

¹³Dá aka natua, yo degá inta mopia tua in mokopatoi kon inakó? Deemanbí tua! Dosabí in nokopoangoi kon popatoi tatua. Pinodoyon kon inta mopia, dosa in mokopoangoi kon popatoi kon inakó sinbá sipat mita in dosa koontongandon motarang. Pinongin parenta mita i Allah, moniatadon kon totokbí in moraat in dosa tua.

¹⁴Kinotaauanbí naton kon hukum in agama Yahudi tua in nongkon Rohobí i Allah; táe akuoi in tongábí intau ilo-ilow. Akuoi ain pinotaḷui mobaḻí ki ata in dosa.

¹⁵Sin diá doman komangaḻeanku in oaidku tontaní. Soaḷ mita inta kinoibogku aidan, diábí inaidanku, táe soaḷ mita inta kinodoíku yo tuabí in aidanku.

¹⁶Dá aka akuoi bo mogaid kon onu inta kinodoíku tua, yo tua in mangaḻenea, akúonkubí kon hukum agama Yahudi in mopiabí.

¹⁷Aka natua, yo deeman bidon akuoi in nogaid kon tua, táe dosa bidon inta nongawasa kon inakó.

¹⁸Kinotaauanku bidon, kon bonu in awakku naa, diábí in tobatúmai in mopia, tuabí in tabiat saḷaku intau ilo-ilow. Sin oyúonbí in ibog kon inakó in mogaid kon inta mopia táe diá mokosanggup in akuoi in mogaid kon natua.

¹⁹Akuoi in diábí momia kon inta mopia inta kino ibogku aidan; táe soaḷbí mita inta moraat inta sabanarnea kinodoíkubí tuabí in aidanku.

²⁰Dá aka akuoi bo mogaid kon soaḷ mita inta kinodoíku aidan, yo mangaḻenea kon tua, deeman bidon akuoi in nogaid kon tua, táe dosa bidon inta nongawasa kon inakó.

²¹Dá nanaa in simpod in tosingogonku kon hukum tanaa; aka akuoi bo moibog mogaid kon onu inta mopia, dá tongábí inta moraat in momuká kon raianku.

²²Batinku in moibogbí kon hukum i Allah,

²³táe kinotaauankubí, kon bonu in awakku oyúon doman in hukum ibanea inta nokadai kon tua, tuata in hukum inta noyoposi in hukum inta kinoibogku. Tuamai in akuoi noitogot kon hukum in dosa inta nongawasa kon awakku.

²⁴Yo, nanaadon in kaadaanku: akuoi in dinumudui kon hukum i Allah takin ginaku motuḻid, táe tabiat in intau ilo-ilow naa, dá akuoi kinawasa in dosa. Mobodito totok akuoi naa! Ki ine in moibog moposaḷamat kon inakó? Sukurdon totok kon i Allah! Sin Sia in noibog noposaḷamat kon inakó pinongin i Yesus Kristus.