Read Mongondow RUM 9 Bible Online

RUM 9 - Mongondow bible

RUM 9

¹Onu in pogumanku tanaa in totuubí, akuoi in diábí monguboḷ, sin ki Kristus in nongawasadon kon inakó. Ginaku inta sinakinan in Roho i Allah, mopoyakin kon inakó doman kon singogku tua in totuubí.

²Totok moajar bo mororiga in ginaku

³sin moiko in intau mita tobangusaku. Bo popisí in moiko dá morelabí in akuoi in kutukon i Allah bo poyoguaton nongkon i Kristus.

⁴Mosia tua in intau inta piniḻí bo binaḻí-Neadon ki adí-Nea mita tontaní. Sia in noponiatadon in kawasa-Nea kon i monia. Sia in nomia kon dodandian[11] takin i monia bo nobogoi in hukum in agama. Pinoguman domandon i Allah kon i monia in soaḷ pooibada bo mosia in notarima domandon kon dandi mita i Allah.

⁵Mosia in buíbí doman in mogoguyang naton. Awak i Kristus naa in nongkon bangusabí monia tua. Táe Siabí in moḷantu-ḷantud nongkon bayongan in yagi-yagi. Dinayo-dayowdon in ki Allah modapot in kopaḷutannea![12] Amin.

⁶Deemanbí makusudku moguman kon dandi i Allah in diádon pakéon; táe deemanbí komintan intau Israel in umat inta piniḻí i Allah.

⁷Deemanbí doman komintan buí i Abraham in nobaḻí ki adí mita i Allah. Sin ki Allah ain noguman kon i Abraham nanaa, “Tongábí buí i Ishak in tangoion buímu.”

⁸Tua in mangaḻenea, kon buí i Abraham inta nobaḻí adí mita i Allah in tongábí inta noilahir sin podudui in dandi i Allah; deemanbí bayongan buínea.[13]

⁹Sin nanaabí in dandi i Allah, “Kon wakutu inta ain sinantú,[14] Akuoi in mamangoi, bo ki Sara in mokouḻí kon tobatú adí ḷoḷaki.”

¹⁰Nanaa doman in singog i Allah: Ki Ribka mopononggadí in adí ḷoḷaki doyowa nongkon tobatú guyanga ḷoḷaki, ki Ishak in tangoinea, mogoguyang naton.

¹¹Wakutu in adí doyowa tatua in diápa pinononggadí, sinantúdon muna i Allah ki ine in piḻíon-Nea kon singgai moiduduimai. Onu in piniḻí i Allah, deemanbí noidoyon kon onu inta komampuan aidan in intau, táe pinodoyonbí kon ibog i Allah tontaní. Sin kon wakutu in ki adí i Ribka doyowa tatua diápa motaau mogaid kon onu inta mopia ande inta moraat,

¹²munadon pinoguman i Allah kon i Ribka kon, “Inta guya-guyang mobantung kon inta ai-ai.”

¹³Kon bonu in Buk Motusi ain pinais nanaa, “Ki Yakub in kotabi-Ku, táe ki Esau in kodoí-Ku.”

¹⁴Aka natua yo onu in singogon naton? Diá moadil degá in ki Allah? Ki Allah in moadilbí!

¹⁵Sin ki Allah ain noguman kon i Musa nanaa, “Akuoi in mopoontong in barakat kon intau inta kinoibog-Ku popoontongan in barakat tatua, bo Akuoi in mopoontong in tabi-Ku kon intau inta kinoibog-Ku popoontongan in tabi-Ku tatua.”

¹⁶Dá tuamai kaputusan i Allah diábí noidoyon kon ibog in intau ande kon ḷopí in intau, táe pinodoyonbí kon onu inta kinosanangan in gina-Nea kon intau inta piniḻí-Nea tatua.

¹⁷Sin kon Buk Motusi ain pinais doman nanaa, “Ki Allah in noguman kon i Piraun, datu in Mesir, ‘Akuoi in mopobaḻí kon inimu datu, sinbá popoontongan in kawasa-Ku bo tangoimu moiwayadon kon sinangkub in dunia naa.’ ”

¹⁸Dá ki Allah in motabi kon intau inta kinoibog-Nea. Bo popotogaton-Nea in gina intau tobatú aka tua in kino ibog-Nea doman.

¹⁹Utat mita, moiko in mogumanbí nanaa kon inakó, “Aka natua yo nongonu sin ki Allah in moibogpabí mopotaḷá in intau? Ki ine in mokoḷamboi kon ibog i Allah?”

²⁰Táe, Utat! Iko in tongábí intau ilo-ilow, bo iko in diábí mokobaḻí momayow kon i Allah! Pot in bungang motaau degá in moḻibó kon intau inta nomia kon inia, “Nongonu sin inaidanmubí nanaa in akuoi?”

²¹Intau inta mogogaid kon pot tatua oyúonbí in haknea momia kon butá ḷamentong podudui in ibognea tontaní? Nongkon ḷamentong tobonsig motaauneabí pomiaan pot doyowa; tobatú in pomiaannea kopiraan, bo tobatú doman in pomiaannea diá totok kopiraan.

²²Ná doman tuata in pinomia i Allah. Sia moibog mopoyaput in torú-Nea bo mopoontong in kawasa-Nea. Táe Sia in mosabar in mokoontong kon i monia inta musti hukumon sin ain nogaid kon onu inta mokosakí kon gina-Nea.

²³Ki Allah in moibog doman mopoontong in kobiagan mopia kon i naton inta kinotabi-Nea. Kita in sinadia-Neadon motarima kon kobiagan mopia tatua.

²⁴Kitabí naa inta ain inoiní-Nea. Deemanbí tongá intau in Yahudi, táe bangusabí doman mita ibanea.

²⁵Sin kon bonu in buk i Nabi Hosea, ki Allah in noguman nanaa, “Intau mita inta deeman umat-Ku, in tangoion-Kudon ‘Umat-Ku’. Bangusa inta diá kotabi-Ku, tangoion-Kudon ‘Kinotabi-Ku.’

²⁶Bo kon tampat inta pinonangoian kon intau, ‘Moiko in deeman umat-Ku,’ kon tampat tatuata intau mita in tangoiondon ki adí mita i Allah inta nobiag.”

²⁷Ki Nabi Yesaya nosingog nanaa kon soaḷ intau in Israel, “Umpakabí kobayong in intau Israel ná kobayong in bungaion kon dagat, táe tongábí topiḻik in mosaḷamat;

²⁸sin ki Tuhan in ḷagidon mopoḷabú in hukuman kon tombonu in dunia naa.”

²⁹Ki Yesaya in noguman doman nanaa, “Aka kuma bo ki Allah inta Totok in Mokawasa diá nonaḷámai kon i naton in buí, yo notantú bidon kon kita komintan in nobaḻí bidon naonda bo Sodom bo Gomora.”

³⁰Dá, nanaa in kasimpulannea: Bangusa mita ibanea inta deeman Yahudi in diábí moramuji konbá motompia bui in hubungan monia takin i Allah. Táe popisí in mosia mopirisaya, dá sinompiadon bui i Allah in hubungan monia takin-Nea.

³¹Táe aka intau in Yahudi umuran moramuji dumudui kon hukum in agama sinbá motompia bui in hubungan monia takin i Allah. Táe diá in mosia mokodapot.

³²Nongonu sin diá mokodapot in mosia? Soaḷnea moramuji in mosia, táe diá pinodoyon monia kon pirisaya kon i Allah, tongábí pinodoyon monia kon oaid monia tontaní. Dá mosia in noḷabú kon “Batu inta Kopopintudan.”

³³Kon Buk Motusi ain pinais nanaa soaḷ batu tatua, “Tarukiradon in naa: Ain inukatan-Ku in Sion tobatú batu inta mokopopisí kon intau moipintud; tobatú batu moḷoben inta mokopopisí kon intau moidompaḷak. Táe intau inta mopirisaya kon i-Nia in diábí pokopooyáan-Neamai.”