Read Mongondow KORINTUS 1 1 Bible Online

KORINTUS 1 1 - Mongondow bible

KORINTUS 1 1

¹Utat mita jamaat i Allah kon Korintus! Moiko inoinídon i Allah mobaḻí umat-Nea sin moiko kapunyaan i Kristus Yesus, moyotakin in bayongan intau nongkon ondakadon inta nosumba kon i Tuhan naton ki Yesus Kristus, ki Tuhan monia bo ki Tuhan naton doman. Akuoi ki Paulus, bo ki utat naton ki Sostenes, mopoigum mako sinbá ki Allah, Amá naton bo ki Tuhan Yesus Kristus in umuran mobogoi in barakat bo kobiagan motompia kon i monimu. Akuoi in nomais kon surat tanaa saḷakubí rasul i Kristus Yesus inta inoiní i Allah tontaní podudui in ibog-Nea.

⁴Akuoi in umuran mosukur kon i Allah sin moiko in nokouḻídon kon totabi-Nea bo nopirisaya domandon kon i Kristus Yesus.

⁵Popisí in moiko bo nopirisayadon kon i Kristus, dá bayongan in yagi-yagi komintanbí mouḻí monimu. Moiko aindon inogoian in totabi motundú kon onu in kinotaauan monimu.

⁶Bo tua komintan mangaḻenea in moponiatabí kon naanta habar mopia i Yesus Kristus tua in totu-totuu bidon noitonop kon bonu in ginamu.

⁷Tuamai barakat kon i monimu in diábí modai-dait kon dodai in moiko mogoḷat mako kon koangoian i Tuhan naton ki Yesus Kristus.

⁸Bo ki Kristusbí doman tua inta tantú moginrigon kon gina monimu modapot kon singgai pangabisan; sahingga aka mamangoidon bui in Sia yo diá kouḻían-Nea in moiko kon taḷá tobatúmai.

⁹Ki Allah nogoiní kon i monimu sinbá moiko motobatúdon i Adí-Nea ki Yesus Kristus, Tuhan naton. Bo Siabí doman tua inta tantú mobogoi kon onu inta ain pinodandi-Nea.

¹⁰Utatku mita! Podoyon kon tangoi i Tuhan naton ki Yesus Kristus, poigumonku sinbá moiko umuran mosiduduian bo mokokidongogan; donaai umuran mobobayowan. Tantúbí kotobatúon in gina bo raian.

¹¹Sin nodaitdon inouman in ginaḷum i Kloë kon inakó, kon naanta oyúonbí in yogenggeng kon sigad monimu.

¹²Nanaa in makusudku, kon sigad monimu oyúon in noguman, “Akuoi in dumoduduibí i Paulus,” bo oyúon doman in moguman, “Akuoi in dumoduduibí i Apolos,” bo ibanea doman in moguman, “Akuoi in dumoduduibí i Petrus,” bo ibanea mako in moguman kon, “Akuoi naa in dumoduduibí i Kristus.”

¹³Bá kotaauandon monimu, kon ki Kristus in tongábí tobatú, diábí nosila-silai![1] Ná doman tua, ki Paulus in diábí pinopopakú kon kayu pinoyotaḻempang sin motobut kon i monimu! Bo moiko in diábí binaptis kon bonu in tangoiku.

¹⁴Mosukur totok in akuoi sin koḻikudbí in ki Krispus bo ki Gayus in binaptisku kon sigad monimu,

¹⁵sahingga diábí in moguman kon binaptiskudon in sia sinbá mobaḻí dumoduduiku. (

¹⁶Oo anta, ki Stepanus bo bayongan ginaḷumnea akuoi doman in nobaptis, aka toro-toroponkumai yo diá bidon ibanea mako in binaptisku.)

¹⁷Akuoi in pinotabá mangoi i Kristus deemanbí mamangoi mobaptis, táe mamangoibí mopotaau in Habar Mopia. Bo deemanbí doman kapandoianku tontaní in pinakéku sinbá oyúon mangaḻe in kawasa nongkon kinopatoian i Kristus nongkon kayu pinoyotaḻempang.

¹⁸Aka kon raian in intau mita inta diá mopirisaya, yo soaḷ kinopatoian i Yesus Kristus kon kayu pinoyotaḻempang tua in diábí totuu. Táe aka kon i naton inta pinosaḷamatdon i Allah, yo habar tatua totokbí in pinirisaya, kon tua in totu-totuubí aid i Allah noponiata kon kawasa-Nea.

¹⁹Sin kon bonu in Buk Motusi, ki Allah in noguman nanaa, “Poyayingon-Ku in kapandoian intau mita inta mongopandoi, bo onu in kinotaauan in intau mita inta norosikoḷa, daiton-Ku popoḻiong.”

²⁰Dá aka natua yo diá bidon in baraguna monia? Intau mita inta mongopandoi bo intau mita inta nonotaau kon bayongan in yagi-yagi? Sin pinoniatadon i Allah kon kapandoian intau kon dunia naa diábí in baragunanea!

²¹Sin dapot kabí in onda in kapandoian intau, yo diábí in mokopobaḻí kon inia monotaau kon i Allah. Táe popisíbí in ki Allah mobijaksana, dá noibog in Sia in noposaḷamat kon intau mita inta mopirisaya kon i-Nia naonda in nokodongog kon habar inta pinotaau nami inta inanggap in dunia naa tongá uboḷ.

²²Intau mita in Yahudi mopoigum in aid mita inta mokoherang saḷaku bukti, bo intau in Yunani mopoontong in kapandoian monia.

²³Kami naa in tongábí mopoyaput in habar soaḷ ki Kristus inta minatoi pinopopakú kon kayu pinoyotaḻempang. Habar tatua in nokotersinggung kon intau mita in Yahudi, dá inanggap monia diá totuu in habar tatua.

²⁴Tongá aka kon intau mita inta ain sinoko oiní i Allah, pinomayá intau in Yahudi andeka deeman — habar tatua in totokbí in pinirisaya kon aidbí i Allah kon moponiata in kawasa bo kapandoian-Nea.

²⁵Sin onu inta inanggap i Allah totok in moompá, yo tuabí in moḷantu-ḷantud nongkon kapandoian intau; bo inta inanggap i Allah diá mokopongonu, yo tuabí in moropo-ropot nongkon ropot in intau.

²⁶Utat! Toropka bui monimu naonda in kaadaan monimu wakutu inoiní i Allah. Tongábí topiḻik in intau kon sigad monimu in mopandoi, ande oyúon in kawasa, ande koḷoḻitúan moḷantud kon sigad in intau moantó.

²⁷Sin sinuodbí i Allah piniḻí in intau mita inta inanggap in dunia naa nobodok, sinbá mosia in mokopooyámai kon intau mita inta mongopandoi. Bo sinuodbí doman i Allah in momiḻí kon intau mita inta inanggap in dunia naa diá mokopongonu, sinbá mongooyá in intau mita inta mongoropot.

²⁸Ki Allah in nomiḻí kon inta inanggap noompá, nohina, andeka inta inanggap diá moponting in dunia naa.

²⁹Tuamai in diábí tobatúmai intau in motaau kumaḷakuang kon i Allah.

³⁰Sin lantaranbí ki Allah, dá notobatúdon in moiko i Kristus. Bo lantaran doman kita nopirisayadon kon i Kristus dá kita in nonotaaudon kon bayongan in yagi-yagi. Siabí doman tua in nopoyotutui, nomiḻí bo notobut kon bayongan oaid naton inta diá mopia.

³¹Nanaa in pinais kon Buk Motusi, “Intau inta moibog dumodia, maníka in sia dumodia kon onu inta aindon inaidan i Tuhan.”