Read Mongondow KORINTUS 1 11 Bible Online

KORINTUS 1 11 - Mongondow bible

KORINTUS 1 11

¹Duduiaidon onu in inaidanku, ná doman akuoi dinumudui kon onu inta inaidan i Kristus.

²Pujionkubí totok in moiko sin umuran mokotorop kon i nakó. Bo onu inta sinundúku kon i monimu, umuran doman duduian monimu.

³Tongá ibogonku in bá kotaauan doman monimu in atorang mita kon bonu in jamaat. Tongguḷu i Kristus in ki Allah. Tongguḷu in ḷoḷaki in ki Kristus. Yo tongguḷu in bobay tuata in ḷoḷaki.

⁴Ḷoḷaki inta mosambayang ande inta mopoyaput in Habar Mopia nongkon i Allah kon tayowon intau mobarong bo mogi koḷob in uḷu, yo tua in mangaḻenea moningkuḻe kon i Kristus in sia.

⁵Tongá aka bobay bo mosambayang ande mopoyaput in Habar Mopia nongkon i Allah bo diá mogi koḷob in uḷu, yo tua in mangaḻenea diá hargaannea in ki buḷoinea ḷoḷaki inta nobaḻí tongguḷunea. Bobay tatua in naonda bo intau inta nokiḷogatdon.

⁶Sin podudui in kabiasaan kon jamaat, aka bobay bo doí mogikoḷob in uḷu yo maníka poki ḷogatdon in buoknea tua. Táe aka mokiḷogat ande mokigonsing domandon in sia, yo tua in notongkai bidon in mokopohinamai kon inia tontaní. Manangka intua sia in musti mogi koḷob in uḷu.

⁷Aka ḷoḷaki yo diábí nongonu aka diá mogi koḷob in uḷu, sin bayongan kaadaan bo kawasa i Allah in ontongonbí kon inia. Táe kahoromatan in ḷoḷaki ontongonbí kon bobay,

⁸sin ḷoḷaki in deemanbí inaidan nongkon bobay, táe bobaybí in inaidan nongkon ḷoḷaki.

⁹Bo ḷoḷaki in inaidan, deemanbí lantaran oyúon in bobay, táe bobaybí in inaidan lantaran oyúon in ḷoḷaki.

¹⁰Tuamai bá mopia in gina in malaekat mita, dá bobay in mustibí mogi koḷob in uḷu, saḷaku tanda kon sia tua in kon bonupabí in kawasa i buḷoinea.

¹¹Umpaka natua in kabiasaan naton saḷaku intau Keresten, táe bobay in diábí mobiag aka diá in ḷoḷaki. Natua doman, ḷoḷaki in diábí doman mobiag aka diá in bobay.

¹²Sin umpaka inaidan nongkon ḷoḷaki in bobay inta muna, táe noiduduimai kon tua ḷoḷaki in noilahir bidon nongkon bobay; sin bayongan in yagi-yagi komintanbí nongkon i Allah.

¹³Raika monimu: Umpaka yo mopia in bobay inta mosambayang kon i Allah kon tayowon intau mobayong bo diá mogi koḷob in uḷu?

¹⁴Kinotaauan bidon naton komintan, kon aka ḷoḷaki bo buok moḷanggó yo diábí mopia.

¹⁵Táe aka bobay bo moḷanggó in buok, yo tua in tobatúbí kahoromatan kon inia, sin buok tatua in inogoi kon inia, sin pogoḻingoi kon uḷunea.

¹⁶Tongá aka oyúon in momayow kon soaḷ tanaa yo nanaa in pogumanku kita andeka jamaat mita i Allah ibanea, komintanbí tongá tobatú tatua in nobaḻí kabiasaan kon bonu in jamaat i Allah, diábí in ibanea mako.

¹⁷Aka soaḷ moiduduimai naa, yo diábí dayowonku in moiko. Sin aka moyosipun mosambayang in moiko, yo deemanbí mokopoangoi kon inta mopia táe inta diábí mopia.

¹⁸Sin ain dinongogku, kon aka aindon moyosipun in moiko mosambayang saḷaku jamaat, yo tantúpabí doman oyúon in bobayowan kon sigad monimu. Bo iraiku kon totuubí in habar tanaa.

¹⁹Tongá oyúonbí doman in pianea kon tua, sinbá koontongandon in intau inta totu-totuu nobaḻí Keresten.

²⁰Kon wakutu in moyosipun, moiko in deemanbí mogaid kon perjamuan i Tuhan.

²¹Sin wakutu in mongaan, moiko tumpaḷabí mogamá kon kaanonnea-kaanonnea, sahingga in oyúon in mokouḻí kon moiḻiu, táe oyúon doman in diá mokouḻí.

²²Nongonu sin natuabí in aid monimu? Eta degá diá in baḷoi tontaní pongaanan bo ponginuman monimu? Andeka degá tumuodbí in moiko mokopohinamai kon jamaat i Allah bo mokopooyámai kon intau mita bogá? Naondapa degá in mopomangaḻe kon i monimu? Onupa in posingogku kon i monimu? Degá dayowonku in moiko? Aka oaid natua yo diábí duíonku!

²³Sin onu inta ain sinundúku kon i monimu, yo nongkon i Tuhanbí intua komintan: kon doḷom tua, wakutu in ki Yesus, Tuhan naton motoyongdon posarakan, Sia in nogamá kon roti,

²⁴bo naonda in sinambayangan-Nea in roti tatua poḷat binonsi-bonsig-Nea bo noguman, “Naa in awak-Ku inta posarakan kon i monimu. Aidai in naa sinbá umuran kotoropan monimu in Akuoi.”

²⁵Ná doman tua, naonda in nopaḷutdon mako nongaan, Sia in nogamá kon palo kobonu-bonu in anggur bo noguman, “Anggur tanaa in dodandianbí mobagu i Allah, bo dugú-Ku in mobaḻí tanda. Tuamai in pomuḷoi monginum kon nanaa, nonginumbí sin monorop kon i-Nakó.”

²⁶Sin pomuḷoi in moiko mokaan kon roti tanaa bo monginum kon anggur tanaa, tua in mangaḻenea moiko in mopotaaudon in kinopatoian i Tuhan, modapot in mamangoi bui in Sia.

²⁷Tuamai intau inta nokaan kon roti i Tuhan ande nonginum kon anggur i Tuhan, táe diá totu-totuu yo baradosaanbí kon i Tuhan inta ain noposarakan in awak bo dugú-Nea sin kopontingan in intau tatua.

²⁸Manangka intua intau in mustipabí muna momirikisa kon awaknea bain tua bo motaau mokaan kon roti bo monginum kon anggur tatua.

²⁹Sin aka intau inta nokaan kon roti andeka nonginum kon anggur, táe diá basí mopirisaya kon perjamuan tatua in noidoyonbí kon awak i Tuhan, yo oo bí kon nongaan bo nonginum in intau tatua, táe tongábí potarimaannea kon hukuman i Allah in aidnea tatua.

³⁰Tuabí manangka in nobayong in kon sigad monimu in notakit bo diádon in ropot, bo nodapot doman kon oyúon in minatoi.

³¹Táe aka akuondon muna naton in aid mita naton inta diá mopia, yo diábí hukumon i Allah in kita.

³²Táe aka hukumon i Allah, yo tua in didikan-Neabí kon i naton, sinbá diá hukumon in kita moyotakin in dunia naa.

³³Tuamai uḻe utatku mita, aka moiko bo notobatú kon gina in mogaid kon perjamuan i Tuhan, yo musti mosioḷatan.

³⁴Bo munapa mongaan kon baḷoi in batangan, sinbá diá ḷagi gogoyon. Sin aka mosi duduian in moiko, yo ibada monimu tua in mopiabí. Diábí mokouḻí kon hukuman i Allah in moiko. Tongápabí naa in insilanganku kon i monimu, ibanea mako in bain moiangoi bui akuoi.