Read Mongondow KORINTUS 1 14 Bible Online

KORINTUS 1 14 - Mongondow bible

KORINTUS 1 14

¹Poigumonku mako moiko in umuran motabi kon intau ibanea bo tantú doman moramuji sinbá motarima kon totabi mita inta ogoi in Roho i Allah, muna-munamai in totabi mopotaau in tomayá mita i Allah kon intau.

²Intau inta mosingog mopomaké in bahasa inta mokoherang, deemanbí in sia moyosingog in intau; táe moyosingogbí i Allah. Sin diábí komangaḻean in intau onu in siningognea tatua, lantaran Rohobí i Allah in nosingog bo noguman kon soaḷ mita inta tongá doman ki Allah in nonotaau.

³Táe aka intau inta mopoyaput in habar nongkon i Allah, yo tua in mopoyaputbí in habar kon intau; sin moginrigon kon pirisaya monia, mobogoi in ropot bo mohibur kon i monia.

⁴Intau inta momaké in bahasa inta mokoherang, tongábí moginrigon kon pirisayanea tontaní, táe intau inta mopoyaput in habar nongkon i Allah in motuḷungbí kon jamaat sinbá mobiag.

⁵Mopiabí doman in ginaku aka moiko in motaau moposingog in bahasa inta mokoherang. Táe mopia-piabí kon motaau mopoyaput in habar nongkon i Allah. Sin intaubí inta motaau mopoyaput in habar nongkon i Allah in moponti-ponting nongkon intau inta nonotaau kon bahasa inta mokoherang; koḻikudbí in aka kotaauannea in mangaḻe in bahasa tatua, sahingga in komangaḻean doman in jamaat intua bo modugang morigon in pirisaya monia.

⁶Utatku mita, aka akuoi in mamangoi kon i monimu bo momaké in bahasa norupa-rupamai inta mokoherang kon intau, umpaka yo baraguna kon i monimu intua? Topiḻikmai yo diábí in mangaḻenea! Noyoposibí in aka akuoi mamangoi mopoyaput in koyow nongkon i Allah, ande moginsilang kon soaḷ mita nongkon i Allah, ande mopomangaḻe kon i monimu.

⁷Sin ná bí onda bo alat mita in musik inta diá moḻiai táe motaaubí posingogon. Naonda bo bansí ande gambus, aka tongá kinoiru-irupnea, bo kinokuti-kutinea yo kotaauanbí naonda in dondong inta pinodondongnea tatua?

⁸Andeka torompet inta diá kodongogan motarang in singognea, yo ki inebí in mobasadia moparang?

⁹Natuabí doman in moiko inta mosingog takin bahasa inta mokoherang. Aka moiko bo mosingog takin bahasa inta diá komangaḻean, yo diábí doman komangaḻean intau in makusud in singogmu tatua. Dá singogmu mita tua in tongábí asaḷ bo dinongog.

¹⁰Kon dunia naa noantó totok in bahasa, táe diábí in tobatúmai bahasa tatua in diá in mangaḻenea.

¹¹Táe aka diá komangaḻeanku in bahasa inta siningog in intau ibanea, yo intau tatua inanggapkubí diá nogogintaauan; natua doman in anggapannea kon inakó.

¹²Natua doman in moiko, kinotaauankubí kon moiko in moibogbí doman moramuji motayak kon totabi mita nongkon Roho i Allah. Tongá mopia totok aka moiko moramuji doman mopobaraguna in totabi mita tatua sin pobangon kon jamaat sinbá mobiag.

¹³Tuamai, ki ine in mosingog kon bahasa inta mokoherang, yo musti doman in sia moramuji mopoigum kon i Allah sinbá motaau doman mopomangaḻe kon onu inta siningog tatua.

¹⁴Sin aka akuoi mosambayang bo momaké in bahasa inta mokoherang, dá tongábí rohoku in mosambayang, táe raianku in diábí.

¹⁵Dá onubí in musti aidanku? Tanaa in aidanku: Aka rohoku mosambayang yo akuoi in dumudui doman mosambayang kon bonu in raianku. Akuoi in modondong takin rohoku táe akuoi in moibog doman modondong takin raianku.

¹⁶Sin aka tongá rohonea in mosukur kon i Allah, bo oyúon in intau in diá nonotaau in bahasa pinakému tua, yo intau tatua in diábí moguman, “Amin” kon dodai in nokodongog kon sukurmu tatua, sin diá kinotaauannea in siningogmu tatua.

¹⁷Sin umpakabí mopia totok in sambayang pinosukurmu kon i Tuhan, táe kon intau ibanea diá in mangaḻe in sambayangmu tatua.

¹⁸Akuoi in mosukur kon i Allah sin akuoi tontaní in nonotaaubí in bahasa inta mokoherang noiḻiu kon i monimu komintan.

¹⁹Táe aka wakutu in jamaat moyosipun mosumba kon i Tuhan, mosana-sanangbí in ginaku in mopoyaput in ḻima notontagá inta komangaḻean in intau dika in moantó in singog inta kon bonu in bahasa mokoherang táe diá komangaḻean in intau. Tuabí in totok kinoibogku sinbá motaau in akuoi motundú kon intau.

²⁰Utatku mita! Dika ná pororai in mongoadí. Aka kon soaḷ mita inta mongoromú, dá musti ná pororai in mongoadí in moiko. Táe aka kon soaḷ pororai, yo poraibí ná intau inta nogurangdon.

²¹Sin kon bonu in Buk Motusi in pinais nanaa, “Ki Tuhan in nosingog, ‘Pinongin intau mita ibanea inta bahasanea tolaeng, Akuoi in mosingog kon umat tanaa. Bo pongin bibig in intau mita inta mokokiangoi, Akuoi in mosingog kon umat-Ku; tongá mosia in doí mokidongog kon singog-Ku.’ ”

²²Manangka intua totabi inta mosingog kon bonu in bahasa inta mokoherang tua in tandabí kon intau inta diá mopirisaya, deemanbí kon intau inta mopirisaya. Yo totabi mopotaau in tomayá i Allah kon intau in tandabí kon intau inta mopirisaya, deemanbí kon intau inta diá mopirisaya.

²³Tuamai aka kon bonu in poyosipunan kon jamaat, bo komintan jamaat mosingog takin bahasa inta norupa-rupamai bo inta mokoherang, bo oyúon in mokokiangoi, ande intau mita inta deeman Keresten, yo anggapon monia moiko in intaubí mita inta diá mongoratak!

²⁴Táe aka moiko komintan bo mopoyaput in habar nongkon i Allah bo noiangoi in intau mita inta diá mopirisaya kon i Yesus ande oyúon in mokokiangoi ibanea, yo onu inta pinoyaputmu tua, komintanbí moponiata in oaidnea inta diá mopia bo moposadar kon inia.

²⁵Onu inta noibuni kon bonu in ginanea komintanbí poontong, sahingga in mokopoompá kon dodia in sia bo moibog mosumba kon i Allah. Sia in mobaḻí mopirisaya totok kon ki Allah in umuranbí kotaki-takin monimu.

²⁶Dá uḻe utat mita, onu in mangaḻe intua komintan? Aka moiko moyosipun sin mosumba kon i Tuhan, oyúon in modondong, oyúon in motundú, oyúon mopoyaput in habar nongkon i Allah, oyúon in mosingog kon bonu in bahasa inta mokoherang bo oyúon doman in moginsilang kon onu inta pinoguman in intau tatua. Táe tua komintan in mustibí aidan sin motundú kon ponompia kon i monia komintan.

²⁷Aka oyúon in mosingog kon bonu in bahasa inta mokoherang, yo tongádon doyowa ande toḷu in mopoyo-poyoḷuan. Bo musti oyúon in moginsilang kon onu inta siningog monia tua.

²⁸Aka diá in motaau moginsilang kon mangaḻenea, yo intau mita inta motaau mosingog kon bahasa inta mokoherang tua musti kibio-biómai kon bonu in pinoyodungkuḷan tatua. Pomayádon mako in mosia in mosingog kon bonu in gina takin i Allah.

²⁹Aka oyúon in habar nongkon i Allah in poyaput intau doyowa toḷu, yo musti poyaput, yo intau ibanea in musti mokidongog bo raion kopiaan onu in pinoguman monia tua.

³⁰Táe aka koyogot in mosingog bo oyúon in noiḷabotmai kon intau inta mopoyaput in habar i Allah kon tampat pinoyodungkuḷan tatua, yo intau inta koyogot mosingog tatua, musti mogogai.

³¹Sin aka natua, yo moiko komintan, motaau moyo-moyoḷuan in mosingog sahingga in habar nongkon i Allah motaau poyaput; bo komintan motaau motarima kon totundú tatua bo modugang in pirisaya.

³²Totabi nongkon roho inta mopoyaput in habar nongkon i Allah tua in motaaubí atoron in intau inta nopoyaput in habar tatua.

³³Sin doíbí in ki Allah kon kobobiag intau motombauk. Koibog-Nea in kobobiagbí inta motompia. Ná inta nobaḻídon kon bayongan jamaat i Allah,

³⁴aka kon poyoyodungkuḷan natua, bobay in diábí motaau in mosingog. Mosia in musti kibio-biómai. Mosia in diábí motaau mobaḻí itoi; ná inta kon bonu in hukum i Musa.

³⁵Aka moibog in mosia monotaau kon yagi-yagi, yo motaaubí in moḻibó kon i buḷoinea táe bain kon baḷoi. Sin totokbí in mokooyá in tobatú bobay mosingog kon tayowon intau moantó.

³⁶Ande degá nongkon imonimubí in pirman i Allah? Andeka tongábí moiko in pinopotaauan in pirman mita tatua?

³⁷Aka rasaanmai monimu bo oyúonbí in totabi mopoyaput in habar nongkon i Allah, andeka inogoianbí i Allah in totabi kon soaḷ mita ibanea, yo intau tatua in mustibí mosadar kon onu inta pinaisku tanaa, komintanbí parenta nongkon i Tuhan.

³⁸Táe aka oyúon in doí motarima kon onu inta pinogumanku mita naa, yo donaaibí mako in sia tua.

³⁹Tuamai uḻe utatku mita, poramuji mopoyaput in habar nongkon i Allah, bo dika molarang kon intau inta mosingog kon bonu in bahasa inta mokoherang.

⁴⁰Tua komintan in musti aidan kopiaan bo kotompiaan.