Read Mongondow KORINTUS 1 16 Bible Online

KORINTUS 1 16 - Mongondow bible

KORINTUS 1 16

¹Moiduduimai naa, soaḷ doit inta ogoi monimu posumbang kon intau mita Keresten. Anjuronku sinbá aidan monimu podudui in totundú inta pinogumanku kon jamaat mita inta kon Galatia.

²Kon singgai dungkuḷ pomuḷoi in diminggu, moiko in munadon monondí kon doit inta posumbang tua podudui onu in mouḻí monimu tontaní. Tagú intua modapot in moiangoi in akuoi, sinbá diá bain mamangoi in akuoi bodongka mulai mosipun in moiko.

³Aka akuoi mamangoidon yo potabákudon mayá in Yerusalem in intau mita inta kinoibog monimu mayá. Mosia tua in pokidiaankubí in surat saḷaku ḷouna in singog.

⁴Bo aka paraḷuon monimu kon bá takinankupa in mosia, dá takinankubí doman.

⁵Akuoi in mamangoibí mokipodungkuḷ kon i monimu naonda in moitaḻib kon Makedonia, sin tomayáku in mongintuapa.

⁶Moyotaḷá mako kon Korintus akuoi in mogutunpa moḻin onggot takin monimu, degá kon dodai in sempo in tumping. Onda intua akuoi mokituḷungpa kon i monimu mongingguput kon bobayáanku.

⁷Akuoi in doíbí mokipodungkuḷ kon i monimu tongá sakadar mongandup mako natua. Aka ogoian i Tuhan in kasampatan, yo mogutunpabí moḻin onggot in akuoi takin i monimu.

⁸Táe akuoi in mogutunpa kon Epesus modapot kon singgai Moḷoben Pentakosta.

⁹Sin moantó in kasampatanku kon naa in mogaid kon oaidan mita inta baraguna, umpaka mobayong doman in intau momayow.

¹⁰Aka ki Timotius mamangoi yo kopiaanbí in motomu, sinbá diá moondok in sia bo mopia in ginanea kon yua-yuak monimu, sin sia tua in notongkaikubí, tumpaḷa mogogaid kon oaidan i Tuhan.

¹¹Ḷukadai sinbá diá in kon sigad monimu in mopoompámai kon inia. Bo tuḷungai in sia sinbá motaaupa bui mamangoi kon inakó takin mosaḷamat, sin akuoi in mogoḷat mako kon koangoiannea takin i utat mita naton ibanea.

¹²Aka soaḷ ki utat naton ki Apolos, yo ain binui-buikumai inanjur sinbá sia bo takin utat mita ibanea mamangoipa mokipodungkuḷ kon i monimu. Táe doípa in sia tanaa mako[17] tongá aka oyúon in kasampatan mopia yo tantú sia in mamangoibí mokipodungkuḷ kon i monimu.

¹³Umuran mokopoingat! Sindog kotorindog kon bonu in pirisayamu saḷaku intau Keresten. Mokopobarani bo mokoporopot!

¹⁴Bo onu in aidan monimu aidai takin tabi.

¹⁵Tantú kinotaauan bidon monimu in ki Stepanus bo motoḷuadínea; mosia tua inta muna-munamai nobaḻí Keresten kon Akhaya. Mosia tua in totu-totuudon nogaid nobantung kon umat i Allah.

¹⁶Manangka intua duduiaibí in intau natua takin intau mita ibanea inta nogaid bo nobantung noyotakin monia tua.

¹⁷Nosanang totok in ginaku in kino angoian i Stepanus, i Portunatus bo i Akhaikus, sin mosia tua in nonoḻiu kon i monimu namangoi kon inakó.

¹⁸Mosia tua in noposanangdon in ginaku, bo noposanang doman in gina monimu. Intau mita natua in musti hargaan.

¹⁹Jamaat mita kon Asia in nokidia in salam kon i monimu. Ná doman tua, ki Akwila bo ki Priskila takin jamaat mita inta noyosipun kon baḷoi monia, nokidia doman in salam inta totok in mopia saḷaku intau in Keresten.

²⁰Bayongan utat kon naa nokipoyaput doman in salam kon i monimu. Posisalaman kopiaan totok in moiko saḷaku tumpaḷa utat Keresten.

²¹Akuoi tontaní in nomais doman kon salamku tanaa: Salamku, ki Paulus.

²²Intau inta diá motabi kon i Tuhan, pomayádon mako baḷáan! Maranatha — Tuhan nami, angoidon!

²³Poigumon mako ki Tuhan Yesus in momarakat kon i monimu.

²⁴Tabiku in umuran kotaki-takin monimu komintan inta notobatú i Kristus Yesus. Horomat nami, Ki Paulus