Read Mongondow KORINTUS 1 4 Bible Online

KORINTUS 1 4 - Mongondow bible

KORINTUS 1 4

¹Anggapbí in kami naa mogogaid mita kon oaidan i Kristus inta motanggung jawab mopotaau in tomayá mita i Allah inta diápa kinotaauan in bayongan intau kon dunia naa.

²Inta muna-munamai igumon kon intau mita inta mogogaid kon oaidan natua in kototoinduduibí monia kon i tuangnea.

³Sin aka kon inakó, yo diábí pusingonkumai onu in singogon monimu — ande i inekadon — bo raian doman soaḷ akuoi. Nodapotbí in inta iraikumai soaḷ akuoi tontaní yo diá bidon nobaḻí soaḷ.

⁴Iraikumai, diábí kon dodai in onda akuoi in nogaid kon inta diá mopia, tongá tua in deemanbí bukti kon diá kotaḷá in akuoi. Sin tongábí ki Tuhan in motaau monantú kotaḷá andeka diá.

⁵Popisí in deemanpabí wakutunea dá dika ḻimika-ḻikat in mohakim kon intau, kotaḷá andeka diá. Oḷatdon dapot moiangoi in ki Tuhan. Bambí Sia in mobuká kon onu inta nongoibuni kon sindip bo mobuká kon onu inta kon bonu in gina mita in intau. Bain kon wakutu in tuata bo duíon i Allah in intau mita podudui in oaid mita monia.

⁶Utatku mita! Onu inta mopia, nodaitdon inaidan naminda i Apolos kon i monimu. Makusudnea kon tua, onu inta inontongdon monimu kon inaminda motaau monimu balajaron mangaḻe in singog tanaa, “Tantú kumadai kon atorang inta oyúon.” Aka natua yo diábí in intau in dumodia bo mopohinamai kon intau ibanea.

⁷Diábí in inanggap totok moponting kon sigad monimu? Sin onu in kon i monimu, komintanbí nongkon i Allah? Manangka intua diábí motaau in dumodia, sin tua mita in diábí nouḻímu tontaní?

⁸Oobí kon diá bidon moparaḷu kon onu bo onu in moiko! Sin nooyúondon bo nobaḻídon datu in moiko! Yo kami in diá. Mopiabí totok aka moiko bo totu-totuudon nobaḻí datu, sinbá motaau in kami momarenta moyotakin monimu.

⁹Sin aka kon raianku, kami inta ain binaḻí i Allah rasul naa in intaubí moompá totok, nábí ondabo intau inta iḷabúan in hukuman mokopatoi kon tayowon intau moantó bo totok in giowan bayongan intau sin mopia-pia in gina monia.

¹⁰Kami in sinumon bodok lantaran ki Kristus. Táe moiko in nopandoidon lantaran ain nopirisaya kon i Kristus! Kami in diádon mokopongonu, táe moiko in noropotdon! Kami in tantú irebeg in intau, táe moiko in umuran dinuí!

¹¹Umaai in naa umuranpabí in kami gogoyon bo moyogang in bayongan yagi-yagi; ḷambung dongkadon kon awak bo rorigaanpa doman in intau; bo diá doman kotampat pogutunan;

¹²táe umuranbí doman moramuji motayak in kami. Aka odi-odian intau in kami, tongábí tuḻían nami barakatan; aka pogutúon monia, mokoposabar in kami;

¹³aka singo-singogonmai intau in kami, yo koḷukóon nami in motubag. Kami naa in diábí noiḻiu kon yoyatan in dunia naa; bo inanggap bonok in dunia.

¹⁴Akuoi in nomais kon naa deemanbí makusud mokopooyámai kon i monimu, táe monongginabí kon i monimu saḷaku ki adíku mita.

¹⁵Umpaka ribuandon intau in Keresten guru monimu, táe kon bonu in pirisaya monimu kon i Kristus, tongábí akuoi in nobaḻí ki amá monimu sin akuoibí naa in nopoyaput in Habar Mopia kon i monimu nodapot in nopirisayadon moiko kon i Kristus.

¹⁶Tuamai poigumonku, moiko in umuran dumayan kon kobobiagku.

¹⁷Manangka intua pinotabákudon mangoi kon i monimu in ki Timotius. Saḷaku dumodudui i Kristus, sia in inanggapkudon ná ki adíku tontaní inta totok in kotabiku. Sia naa in adí inta totok in mojujur. Bain sia in mongonguman bui kon i monimu soaḷ kobobiagku wakutu in nopirisayadon in akuoi kon i Kristus, tuata in kobobiagku inta sinundúkudon kon bayongan in jamaat kon ondakadon.

¹⁸Tongá tongonudon degá in kon sigad monimu in nobaḻídon mododia, sin kai monia kamai dá diá bidon mamangoi bui kon i monimu in akuoi.

¹⁹Aka diá in ḷabot yo diá bidon moonggot in akuoi bo bui mamangoi mokipodungkuḷ kon i monimu. Bain kon wakutu intua bo indoianku mongo onu in motaau aidan in intau inta mongododia tatua; deemanbí tongá kon bibig monia.

²⁰Sin aka ki Allah in momarenta kon intau tatua, dá buktinea in deemanbí tosingogon in intau tatua, táe kobobiagneabí.

²¹Tuamai piḻídon onu in koibog monimu! Moibog in moiko sinbá mamangoi takin sambok in akuoi andeka mamangoi takin pia in gina?