Read Mongondow KORINTUS 1 7 Bible Online

KORINTUS 1 7 - Mongondow bible

KORINTUS 1 7

¹Tanaa in insilangankudon kon i monimu onu inta pinais monimu kon surat inta kinirim monimu kon inakó. Aka tobatú ḷoḷaki bo diá nobuḷoi, sabanarnea mopia intua.[5]

²Táe bá diá moigonú in oaid inta diá patus aidan, dá maníka mobuḷoi andeka mokipobuḷoi.

³Buḷoi ḷoḷaki in mustibí mogaid kon onu inta ain sinantú aidannea. Natua doman in buḷoi bobay; tumpaḷabí mogaid kon onu inta ain sinantú aidannea.

⁴Buḷoi bobay in diábí motaau in mongawasa kon awaknea tontaní; sin awaknea tatua in kon bonubí in kawasa i buḷoinea ḷoḷaki. Natua doman in ki buḷoinea ḷoḷaki in diábí doman motaau mongawasa kon awaknea tontaní; sin ki buḷoineabí in mongawasa kon awaknea tatua.

⁵Doyowa motonibuḷoi in diábí motaau in mosiyayúan. Motaaubí asaḷbo muna moyosingog bo diá motaau moonggot. Aka natua yo doyowa motonibuḷoi in tumpaḷa motaau mosisambayangan. Tongá naonda intua moiko in mustibí bui motobatú saḷaku doyowa motonibuḷoi. Sin aka diá natua yo koonggotannea kogonúanbí in roho inta diá mopia, sin diá mokotahang kon ibog in awak.

⁶Onu in pinogumanku kon i monimu naa in deemanbí parenta, táe tongginabí.

⁷Sabanarnea in mopiabí in ginaku aka komintan intau bo mobaḻí ná akuoi. Táe komintan intau ain bidon inogoian i Allah in totabi inta noyo-noyoposimai. Tobatú nokouḻí kon totabi nanaa, tobatú doman nokouḻí kon totabi natua.

⁸Manangka intua nanaa in tongginaku kon intau inta diápa nobuḷoi bo kon bobay mita inta dongkadon boba-bobay: Maníka in moiko bo umurandon mobiag bata-batangan ná akuoi.

⁹Táe aka moiko bo diá mokotahang kon ibog mobuḷoi, yo maníka pobuḷoi. Sin maníka bo mobuḷoi dika in monahang kon ibogmu inta moiḻiu tua.

¹⁰Kon i monia inta ain nobuḷoi, naa in parentaku: (Sabanarnea in deemanbí akuoi in nobogoi in parenta tanaa, táe ki Tuhanbí.) Tobatú bobay inta ain pinobuḷoi in donaaibí monaḷámai kon i buḷoinea ḷoḷaki.

¹¹Tongá aka sinaḷáanneadon in ki buḷoinea ḷoḷaki, dá bobay tatua in donaai bidon mokipobuḷoi bui, andeka maní bui mamangoi kon i buḷoinea. Natua doman in ḷoḷaki. Diábí doman motaau in ḷoḷaki mogaat kon i buḷoinea.

¹²Bo tanaa in tongginaku kon intau mita ibanea mako, naa in tongginakubí tontaní, deemanbí i Tuhan, aka intau Keresten bo kobuḷoi kon bobay inta diá mopirisaya kon i Kristus, bo ki buḷoinea bobay tatua in moibog mobiag moyotakinnea, yo diábí motaaunea gaaton in ki buḷoinea bobay tatua.

¹³Bo aka oyúon doman in bobay Keresten kobuḷoi kon intau inta diá mopirisaya kon i Kristus, bo ki buḷoinea ḷoḷaki tatua in moibog mobiag moyotakinnea, yo diábí motaau gaatonnea in ki buḷoinea tatua.

¹⁴Tantú ḷoḷaki tatua in motaaubí mobaḻí umat i Allah sin aindon notonibuḷoi takin intau inta ain nobaḻí umat i Allah. Natua doman in buḷoi bobay, tantú motaau bidon doman mobaḻí umat i Allah sin ain notonibuḷoi in intau inta ain nobaḻí umat i Allah. Sin aka diá natua, yo tantú ki adí mita monia in naonda bo ki adí mita in intau inta diá nonotaau kon i Allah, táe aka duduian monimu in tongginaku naa, yo ki adí mita monimu tua in mobaḻí bidon umat i Allah.

¹⁵Tongá aka intau inta diá mopirisaya kon i Yesus monaḷámaidon kon i buḷoinea bobay andeka kon i buḷoinea ḷoḷaki inta ain nopirisaya kon i Yesus, yo donaaibí mako bo dikabí ampagan sin diábí nongonu. Sin ibogon i Allah in mobiagbí motobatú in moiko komintan.

¹⁶Sin moiko utat saḷaku buḷoi bobay — inta ain nopirisaya kon i Kristus ki Tuhan naton — naondabí in kototaau monimu, kon diá mokosaḷamat[6] in iko kon i buḷoimu ḷoḷaki? Natua doman in iko buḷoi ḷoḷaki inta nopirisayadon kon i Yesus, naondabí in kototaau monimu kon iko in diá mokosaḷamat kon i buḷoimu bobay?

¹⁷Naa in atorang inta pinobayáku kon bayongan jamaat: Pomuḷoi in intau musti mobiag tumompia podudui kon inta kinoibog i Allah, ná inta ain sinantú-Nea wakutu in nogoiní kon i monimu kon bá mopirisayadon kon i-Nia.

¹⁸Umpamanea, tobatú intau bo sinunatdon kon wakutu in inoiní i Allah, dá dikabí ramujion inggamáan in paḷot mita in sunat tatua. Natua doman, aka oyúon in diápa sinunat kon wakutu in inoiní i Allah, dá dika bidon poigumon konbá sunatonpa.

¹⁹Sin sinunat andeka diá, diábí moponting intua. Dumuduibí kon atorang mita i Allah in moponting.

²⁰Tuamai, kobiagdon moiko ná kon dodai in inoiní i Allah.

²¹Aka wakutu inoiní bo moiko in nogaid saḷaku ata, yo diábí nongonu intua. Tongá aka komintanmai bo mokouḻídon kon kasampatan moiḷuatdon, yo popobaragunadon in kasampatan tatua.[7]

²²Sin ata inta mopirisaya kon i Tuhan, nobaḻí bidon intau i Tuhan inta nobebas. Bo intau nobebas inta nopirisayadon kon i Tuhan, nobaḻí bidon mogogaid kon oaidan i Tuhan Yesus Kristus.

²³Moiko ain bidon sinaḷui i Tuhan bo nodait-Nea bidon inuboḻian. Tuamai, dikabí moibog in mobaḻí ki ata in onukadon kon dunia naa.

²⁴Táe naonda in kaadaanmu kon wakutu in inoiní i Allah, tantúbí kobiag natua takin i Allah.

²⁵Sabanarnea akuoi in diábí notarima kon parenta i Tuhan kon soaḷ intau mita inta diápa nokipobuḷoi. Táe saḷaku intau inta mopirisaya inta ain inogoian-Nea in totabi inta motaau pirisayaanmai, dá mononggina in akuoi.

²⁶Moindoimai kon kaadaan masai naa, yo maníka ki ine in diápa pinobuḷoi yo tantúpa natua.

²⁷Táe aka iko bo noiḷautdon nobuḷoi, dá dikabí ramujionmu bo gaaton in ki buḷoimu tatua. Táe aka diápa in iko noiḷaut nobuḷoi dá maníka bo dikadon motayak kon buḷoi.

²⁸Táe aka iko bo tantúbí moibog mobuḷoi, yo diábí doman nongonu. Natua doman in mongodeaga, diábí doman baradosaan aka mokipobuḷoi. Tongá intau inta nobuḷoi tua mokouma kon roriga inta ibogonku in moiyayúbí mita kon i monimu intua komintan.

²⁹Nanaa in makusudku uḻe utat mita: Nopoḷokdon in wakutu naton. Tuamai nongkon masa in tanaa, intau inta kobuḷoi, kobiagdon naonda bo intau inta diápa kobuḷoi;

³⁰intau inta nongombaḷ, musti in sia tumon intau inta ná diá in yagi-yaginea. Intau inta noḷunganga in gina; musti in sia tumon intau inta ná diá noḷunganga in gina. Bo intau inta ain notaḷui, musti in sia tumon intau inta diá koonu bo onu;

³¹bo intau inta umuran nobaḻí ki ata in onu inta kon dunia naa, yo donaaidon in sia moibog tonggataan in dunia naa. Sin dunia naa in motoyong bidon moyoyang takin kaadaannea masa in tanaa!

³²Ibogonku moiko komintan moiyayúdon kon bayongan roriga. Tuamai, intau inta diá kobuḷoi in musti mokopotantú kon raiannea bo mogaid kon onu inta kinoibog i Tuhan, bo moposanang in ginanea.

³³Táe intau inta kobuḷoidon, moantóbí totok in raiannea soaḷ in dunia naa, sin moibog in mosia moposanang in gina i buḷoinea;

³⁴tuamai in diá motantú in raiannea. Bobay inta diá kobuḷoi, andeka inta mongodeagapa, moantó in raiannea kon soaḷ ki Tuhan. Sin ibogonnea in kobiagannea tua in komintandon posarakan kon i Tuhan. Táe bobay inta kobuḷoidon, umuranbí in sia morai kon soaḷ mita in dunia naa, sin moibog in sia moposanang in gina i buḷoinea.

³⁵Naa komintan in pinaisku sin kopiaanbí monimu tontaní, deemanbí molarang kon bayongan ibog monimu. Táe ibogonku in bá umuran mogaid kon inta mopia bo inta mokosanang kon bayongan in intau bo umuran motantú in raian kon i Tuhan.

³⁶Tongá aka tobatú intau bo nogaid kon inta diápa patus aidan kon i kantangnea sin diádon mokotahang kon ibognea, táe oyúonbí in niat monia motonibuḷoi yo aidaibí.[8] Sin diábí baradosaan aka motonibuḷoibí in moiko.

³⁷Táe aka intau tatua bo mogamádon kon kaputusan kon bonu in ginanea, kon diábí tonibuḷoionnea[9] in ki kantangnea tua sin mokotahangbí in sia in diá mobuḷoi, dá oaidnea tatua in mopiabí.

³⁸Simpodon mako kon singog intau inta mobuḷoi[10]in mopiabí doman, bo intau inta diá mobuḷoi[11] in mopia-piadon doman.

³⁹Bobay inta ain nokipobuḷoi notobatúdon i buḷoinea ḷoḷaki komangoi in nobiagpa in ki buḷoinea tua. Táe aka matoidon in ki buḷoinea tatua, dá bobay tatua in mobebasbí in mokipobuḷoi bui kon intau inta kinoibognea; asaḷ tonibuḷoi tatua in tonibuḷoi Keresten.

⁴⁰Tongá mopia-piabí kon aka diádon bui mokipobuḷoi in sia. Tua in podudui in raianku, táe iraiku kon onu in pinogumanku naa komintanbí kon bonu in kawasa in Roho i Allah.