Read Mongondow KORINTUS 2 10 Bible Online

KORINTUS 2 10 - Mongondow bible

KORINTUS 2 10

¹Akuoi ki Paulus, inta kain intau in diá mobarani moyogintayow mako, tongá mobarani aka moyogiyayúan monimu. Tanaa mako pinodoyon kon koaḷus bo kopopia in gina i Kristus,

²poigumonkudon kon inimu sinbá moiko in diá momakisa kon inakó mopoontong in kabaranianku aka akuoi in mamangoidon kon i monimu. Sin tomayáku in torúankubí totok in intau mita inta mosingog kon kami in mogaid kon naa sinbá mokouḻí kon kauntungan kon dunia naa.

³Totuubí kon kami in nobiagpabí kon dunia naa, táe kami in diábí moramuji sinbá mokouḻí kon kaoyúonan in dunia naa.

⁴Sin ḷoḷutam mita inta pinaké nami kon usaha tanaa in deemanbí ḷoḷutam in dunia naa, táe ḷoḷutambí mita inta inogoi i Allah inta mokosanggup momoguyaat kon onu inta mokooḻingoi

⁵kami in momutoḷ kon tomayá mita inta diá mopia bo mogumpag kon onu inta pinosindog noidoyon kon kaḷakuang in intau sin pomayow kon ibog monotaau kon i Allah. Bo mopotaḷá in raian in intau mita inta diá mopia bo aidan sinbá moitungkud kon tayowon i Kristus.

⁶Bo aka moiko bo totu-totuu motoindudui, dá kami in mokobaḻí bidon in mohukum kon intau mita inta diá mongotoindudui.

⁷Indoiaidon kopira onu inta nobaḻí kon tayowonmai monimu nion. Aka oyúon intau in moyakindon totu-totuu kon sia tua in kapunyaan i Kristus, yo musti in sia morai kon bonu in ginanea kon kami doman naa in kapunyaanbí doman i Kristus, naonda bo sia.

⁸Akuoi in diábí mooyá aka akuoi tantú moduí mako kon kawasa inta ain inogoi i Tuhan kon i nami, sin kawasa tatua in ogoibí pomiag kon i monimu, deemanbí pomatoi.

⁹Diábí moibog in akuoi anggapon monimu kon suratku tatua in mopogogondok kon i monimu.

¹⁰Sin oyúon intau noguman nanaa, “Bonu in surat mita i Paulus tua in motogat bo mokobangkaḷ, táe aka siadon tontaní in kon yua-yuak naton, yo moyangkodon in sia bo singognea mita tua in diádon in mangaḻenea!”

¹¹Táe maníka bo morai in intau mita inta mosingog tatua, kon aka kami bo kon yua-yuakdon monimu, yo aidanbí nami ná inta pinais kon bonu in surat mita nami.

¹²Oo! Totuubí kon kami in diábí mokobaḻí mopoyobanding ande mokipotongkai kon intau mita inta norai kon mosia tua in moḷantu-ḷantud. Nobodok totok in mosia! Mosia in mogaid kon ukuran monia tontaní bo ponilai kon i monia tontaní podudui in ukuran inta inaidan monia tua.

¹³Kami in doíbí natua. Aka kami bo dumui-duí, yo doíbí moiḻiu kon onu inta ain sinantú i Allah kon i nami. Kami in mogaid tongábí komangoi in batas inta ain sinantú i Allah. Bo moiko in noibonubí kon batas tatua.

¹⁴Sin wakutu in kami namangoi kon i monimu, bo nopotaau in Habar Mopia i Kristus, kami in diábí iḻimimpat kon sigad inta ain sinantú pogaidan nami.

¹⁵Kami in diábí dumuí tontaní sin oaidan in intau ibanea inta ain noiḻimpat kon sigad inta ain sinantú i Allah kon i nami. Táe kami in tantú mogaid kon bonu in sigad inta ain sinantú i Allah kon i nami, bo kami tantú moharap mako kon bá umuran modugang in pirisaya monimu kon i Kristus. Sinbá kami in motaau mogaid kon oaidan inta moiḻiu kon oaidan mita tatua kon sigad monimu.

¹⁶Sin kami in sinantú bidon kon mopohaba-habar mako in Habar Mopia kon ḻipu-ḻipúannea inta moyayu-yayú kon ḻipú monimu. Tongá diábí dumodia in kami lantaran oaidan nami tatua.

¹⁷Sin kon Buk Motusi ain pinais nanaa, “Intau inta moibog duíon, yo maníka bo poduí kon onu inta inaidan i Allah.”

¹⁸Sin deemanbí intau inta dinumuí tontaní in mokotahang kon totungkuḷ, táe intaubí inta dinuí i Tuhan.