Read Mongondow KORINTUS 2 12 Bible Online

KORINTUS 2 12 - Mongondow bible

KORINTUS 2 12

¹Totuubí kon diábí in mangaḻe dumodia. Tongá mustikubí doman popotaau onu inta ain pinowahyu bo inta pinoontong i Allah kon inakó.

²Kon bonu in oontongon tatua, kinotaauanku in intau inta noibingkat monik kon soroga tatua, mopuḷúbí bo opat notaong inta noitaḻibdon. (Diá doman notarangku totok mongo takin awaknea in noibingkat tatua mongo tongábí noiḷabot magí kon mataku — tongábí ki Allah in nonotaau kon tua.)

³Buionkupa doman: Kinotaauankubí kon intau tatua in noibingkat minayá in Pirdaus. (Diá doman notarangkumai totok mongo takin awaknea in noibingkat tatua mongo tongábí noiḷabot magí kon mataku — tongábí ki Allah in nonotaau kon tua.) Kon tampat tatua intau tatua in nokodongog kon soaḷ mita inta diá motaau oumanon in intau bo inta pinoton kon intau, diá motaau singogon.

⁵Intaubí tatua in nokoḷunganga kon ginaku, deemanbí awakku tontaní. Sin aka kon inakó yo ondabí inta nogaatpa kon awakku, tuabí in duíonku.

⁶Sin aka kuma bo moibog doman in akuoi moduí kon rupa-rupa, yo akuoi in doíbí umambungangaḷ mosingog kon uboḷ; ondabí in totuu, tuabí in poguman. Táe tahangonkupabí, sinbá dika bo anggapon monia in akuoi kon noiḻiudon kon onu inta ain inontong bo inta dinongog monia kon i nakó.

⁷Táe sinbá diá dumodia in akuoi kon soaḷ mita inta ain pinoontong i Allah tatua, dá akuoi in inogoian in naonda bo tobatú panyaki kon bonu in awakku inta nobaḻí alat in Ibilis. Panyaki tatua inogoi pinohukum kon inakó sinbá diá dumodia in akuoi.

⁸Ain kotoḷu in akuoi nopoigum kon i Tuhan sinbá inggamáan-Neadon nongkon awakku in panyaki tatua.

⁹Táe sinubagan i Tuhan nanaa, “Tugatdon in totabi-Ku kon inimu; sin aka naníon kaadaan in awakmu, yo kawasa-Ku in modugangbí moropot.” Tuabí manangka in mopiabí totok in ginaku bo duíonkubí in onu inta nogaat kon awakku. Sin aka akuoi bo diádon mokopongonu, yo kon wakutu intuata korasaanku in kawasa i Kristus inta totok in moḷoben motuḷung kon i nakó.

¹⁰Tuamai mopiabí in ginaku aka umuran moḻemé nanaa in kaadaan in awakku. Bo mopiabí doman in ginaku aka lantaran ki Kristus, akuoi in poponapudan in uboḷ, mokorasa kon rupa-rupa yoyiga, aḷo-aḷowan mako pogutúon. Sin aka korasaanku bo diádon mokopongonu in akuoi, yo kon wakutupa doman tuata bo oyúon ropot in korasaanku.

¹¹Totuubí kon akuoi in sinumon intau bodok — táe moikobí in nomakisa kon i nakó nobaḻí natua. Sabanarnea moikobí in musti moduí kon inakó. Sin umpaka diá baraguna in akuoi kon i monimu, táe kon bayongan yagi-yagi akuoi in noiḻiubí kon rasul mita inta mongotoyang tua.

¹²Bayongan inta mokoherang, inta diá mita in poḻiu tua bo oaidan inta moḷoben, takin kasabaran moḷoben pinoontongdon bá ontongon doman monimu kon akuoi naa in totu-totuubí rasul.

¹³Sin kon soaḷbí degá taonda moiko nion in pinotontumi, aka poyobandingonmai in jamaat mita ibanea? Tongábí koḻikud in soaḷ mita tanaa: akuoi in doí nokiposusamai nokiongkos kon i monimu. Akuoi in mopoigum maap aka tuabí in noitaḷá kon inakó!

¹⁴Kotoḷudon naa akuoi in nonomayá mokipodungkuḷ kon i monimu. Bo akuoi in doíbí mokiposusamai kon i monimu, sin deemanbí kapunyaan monimu in tayakonku, táe moikobí. Sin deemanbí mongoadí in musti motayak kon kaanon in guyanganea, táe guyangabí in musti motayak kon kaanon i adínea mita.

¹⁵Tuamai mopiabí in ginaku bo morelabí in moposarakan in bayongan yagi-yagi, sin kopontingan monimu, nodapotkabí in awakku naa. Dá aka akuoi bo totok in motabi kon i monimu, umpaka yo diápa doman kotabi monimu in akuoi?

¹⁶Oobí kon moiko in nosatujubí kon akuoi in diábí nokiposusamai kon i monimu. Tongá oyúon doman in mosingog kon akuoi naa in diá mojujur, mopandoi mongakaḷ sin motayak kon kauntungan nongkon imonimu.

¹⁷Diábí doman! Eta degá nokoimontandon in akuoi nopotabá in intau sin mayá motayak kon kauntungan kon i monimu?

¹⁸Totuu kon akuoi in nopotabá kon i Titus mayá kon i monimu, takin intau inta ki utat doman naton ibanea inta noyotakinnea. Táe umpaka yo nokoimontandon in ki Titus in motayak kon kauntungan kon i monimu? Mogaid tanaa, tujuan naminda in notongkaibí, natua doman in aid mita naminda!

¹⁹Motaaubí singogon nami kon noonggot bidon moiko in umuran nosangka mako kon i nami, kon kami tantú mobela kon oaid nami inta diá mopia kon tayowon monimu. Kon tayowon i Allah bo kinotaauanbí i Kristus. Kami moguman kon i monimu, kon bayongan naa, uḻe, utat mita inta kinotabiku, inaidan nami naa lantaranbí bá mobiag bo modugang in pirisaya monimu.

²⁰Sin moḻia-ḻiaw in ginaku, dikabo naonda in akuoi mamangoi, koangoiankumai moiko diádon ná inta iharapku mako, ná doman tua in akuoi, koangoianmai monimu, diádon ná inta iharap mako monimu. Sin dikabo mobobayowanmai in moiko, mosiintoian, dumodia, tongá moibog morai kon kopontingan tontaní bo mopotombauk.

²¹Moḻia-ḻiaw doman in ginaku sin dikabo naonda in akuoi mamangoi bui, popoompáan i Allah in akuoi kon tayowon monimu, bo mongombaḷ in akuoi sin nobayongdon in kon sigad monimu in nogaid kon dosa wakutu intua bo diápa doman nobaḷui, bo tantúpa doman nogaid kon oaid mita inta moraat totok bo inta diá patus aidan i intau inta mopirisaya.