Read Mongondow KORINTUS 2 2 Bible Online

KORINTUS 2 2 - Mongondow bible

KORINTUS 2 2

¹Tuamai in akuoi ain nonantú kon diádon bui in akuoi mamangoi kon i monimu, sinbá diádon tongá mopoajarmai in gina monimu.

²Sin aka popoajarku in gina monimu, yo ki inepabí in motaau moposanang kon ginaku, koḻikudbí intau mita inta ain pinopoajarku tua?

³Manangka intua akuoi in nomais kon surat tanaa kon i monimu. Sinbá aka akuoi mamangoi, yo diá yoyigaan monimu in ginaku, sin tongábí moiko in haraponku mako motaau mopoḷunganga in ginaku. Sin moyakinbí in akuoi kon aka ginaku bo mosanang, yo moiko in mosanangbí doman komintan.

⁴Moajar totok in ginaku in nomais kon surat tanaa kon i monimu, nodapot in koomba-ombaḷ akuoi in nomais. Deemanbí makusudku kon bá moajar doman in gina monimu, táe bá kotaauan doman monimu kon motabibí totok in akuoi kon i monimu komintan.

⁵Aka oyúon in intau inta nokopopisí sahingga noajar in gina monimu, yo tua in deemanbí akuoi in tujuan monia, táe moikobí utatku, andeka diá bo diá yo intaubí inta kon sigad monimu nion. Dá doíbí in akuoi mobogoi in hukuman mobogat kon inia tua.

⁶Intau natua motaaubí in tongápa intau inta kon sigad monimu in mohukum.

⁷Musti ampungan monimu in taḷánea tatua bo tongginaai, sinbá diádon totok moyoyiga in ginanea sahingga kobuḻiandon harapan in sia.

⁸Poigumonku doman, totu-totuubí kotabi monimu in sia tua.

⁹Suratku tanaa in monungkuḷbí kon i monimu, mongo moibogpa ande doídon degá in moiko mokidongog kon onu inta pinogumanku kon i monimu.

¹⁰Aka moiko bo mongampung kon intau inta ain nogaid kon taḷá kon i monimu, yo ampungankubí doman in intau tatua. Sin onu inta ain inampunganku — aka totu-totuubí oyúon in paraḷu ampungan — yo ampungankubí kon tayowon i Kristus sin tua in kopiaanbí monimu.

¹¹Akuoi in mongampung sinbá Ibilis in diá mogamá kon kasampatan mongawasa kon i naton; sin kinotaauan bidon naton in tomayánea.

¹²Kon wakutu in noiyaputdon kon Troas sin makusud mopoyaput in Habar Mopia soaḷ ki Kristus, akuoi in inogoian i Tuhan in daḷan mogaid kon tua.

¹³Táe mogagawang totok in ginaku sin diápa noyodungkuḷ i utat naton ki Titus in akuoi. Tuamai akuoi nogumandon kon intau mita kon tua bo akuoi nopobayádon in Makedonia.

¹⁴Táe sukur mako kon i Allah! Sin tantú-Neabí dinia in kami dinumudui kon daḷan inta mokosaḷamat, sin notobatúdon i Kristus in kami. Pinaké-Nea in kami sinbá habar soaḷ ki Kristus moibaya-bayádon mako ná bó inta mobondu inta kobóan kon bayongan in tampat.

¹⁵Sin kami naa in ná bí onda bo in kamania nobondu, inta sinubá i Kristus kon i Allah. Táe aka kon intau mita moraat, yo kami naa in nabi onda bo rasum inta mokopatoi; táe aka kon intau mita inta mopirisaya, yo kami naa in nabi onda bó mobondu inta modia kon kobiagan. Dá aka natua, yo ki ine in mokosanggup mogaid kon oaidan tanaa?

¹⁷Sin kami in diábí ná intau ibanea inta tongá moibog motayak kon kauntungan nongkon habar i Allah tatua. Motuḻidbí totok in tujuan nami, sin ki Allahbí in nokiaid intua komintan kon i nami. Bo inontongbí i Allah tontaní kon kami in nopoyaput in habar tatua nogaidbí saḷaku mogogaid mita i Kristus.