Read Mongondow KORINTUS 2 7 Bible Online

KORINTUS 2 7 - Mongondow bible

KORINTUS 2 7

¹Utat mita inta kinotabiku! Dandi mita tatua in pinopomakusudbí kon i naton komintan. Tuamai koḻigai in kita mondaritdon kon oaid mita naton inta mokokotor kon awak naton. Bo koḻigai mobiag motoguondok kon i Allah, sinbá mobiagdon motompia takin-Nea in kita.

²Tarimadon in kami kon bonu in gina monimu. Sin kami in diábí kotaḷá kon tobatúmai in intau, bo diápabí doman dodai onda in noporugimai kon tobatúmai intau. Natua doman, diápabí doman dodai onda in kami notayak kon kauntungan kon intau tobatúmai.

³Akuoi in moguman kon natua, deemanbí makusud mopotaḷá kon i monimu, sin nádon kain singogku inta muna, kon moiko in totok bidon kinotabi nami, sahingga in kita tantú notobatú kon dodai in nobiagpa nodapot in matoika bidon.

⁴Akuoi in mopirisaya bidon totok kon i monimu. Moiko nion inta totok mokoḷunganga kon ginaku! Umpakabí mobayong in yoyiga korasaanku, táe noundambí in ginaku, sin lantaran moiko nion. Totuu moḷunganga in ginaku!

⁵Wakutu in kami in noidapotdon kon Makedonia, diádon in kami nokopogogai. Kami in tantú nokouḻí kon kasulitan: sin tantú oyúon in ropatoi, sahingga in gina nami tantú moondok.

⁶Tongá sukur mako, sin ki Allah in tantú nobogoi in gina moropot kon intau inta moompá in dodia; bo pinopoangoi-Nea in ki Kristus, sinbá mosanang totok in gina nami.

⁷Gina nami in nosanang, deeman tongá lantaran kinoangoian i Titus, táe lantaranbí doman nongonguman in sia kon kopopia in ginanea wakutu in sia kon yua-yuakpa monimu. Pinogumannea kon inami kon totok in mokotanob bo moibogdon totok in moiko moyodungkuḷku; bo oyúondon in panasaḷan monimu kon bayongan in aid mita monimu inta koḻipod dapot in moibogdon mobela kon i nakó in moiko. Tua komintan in nokodugang kon ḷunganga in ginaku.

⁸Uḻe, umpakabí suratku tanaa mokojar kon gina monimu, táe diábí nomanasaḷ in akuoi in nomais. Totuubí kon nokoimontanbí doman in akuoi nomanasaḷ in nomais, wakutu in inindoiankumai suratku tatua mokoajar kon gina monimu — umpaka diá noonggot — táe oyúonbí doman in panasaḷanku topiḻik.

⁹Táe tanaa mako in mosanangdon in ginaku — tongá deemanbí nosanang in gina lantaran noajar in gina monimu. Táe lantaranbí naonda in nokorasa kon ajar in gina tatua, dodia monimu in nobaḷui. Tua komintan in totundú mita i Allah, sahingga in diábí norugi topiḻikmai in moiko.

¹⁰Sin ajar in gina natua mopomungaibí in mopia bo mokosaḷamat. Bo tua in diábí mokomanasaḷ kon intau. Táe aka ajar in gina inta pinodudui in ibog in intau, yo tua in mokopatoibí.

¹¹Tungkuḷaika tarukira monimu onu in bungai in ajar in gina inta pinodudui kon ibog i Allah kon i monimu! Naa in bungainea; moiko in totu-totuubí moramuji moginsilang kon onu inta diápa notarang! Bo moyaatbí in gina monimu kon onu inta diá mopia, oyúon in porasaan moondok, mokotanobbí, tantú moropot in gina, bo oyúon in ibog mohukum kon inta kotaḷá! Kon bayongan soaḷ mita tanaa in moponiata bidon kon moiko in diá bidon kotaḷá.

¹²Tuamai, umpakabí akuoi in nomaisdon kon surat tatua, táe pinaisku intua deemanbí lantaran intau inta kotaḷá tatua. Bo deemanbí doman lantaran intau inta nororiga sin pinopisí in taḷá tatua. Akuoi in nomais kon surat tatua sinbá kon tayowon i Allah, kotaauandon monimu tontaní kon moḷobenbí totok in perhatian monimu kon i nami.

¹³Tuabí manangka in noonow in gina nami. Koḻikud in moonow, nodugang doman totok ḷunganga in gina nami sin nokoontong kon ḷunganga in gina inta kinorasaan doman i Titus; nopia in ginanea lantaran moiko.

¹⁴Totu-totuubí kon moiko in dinui-duíku bidon kon tayowon i Titus. Bo sukurdon sin moiko in diá tongá mokopooyámai kon i nakó. Bayongan inta ain inouman nami kon i monimu tua in totuubí. Natua doman onu inta dinui-duí nami soaḷ moiko kon tayowon i Titus in noitotuubí doman.

¹⁵Sahingga in tanaa nodugangdon totok in tabinea kon i monimu, sin tantú kotoropannea naonda in kototoindudui monimu kon inia bo sinarima monimu in sia takin horomat.

¹⁶Mopia totok in ginaku sin moiko motaaudon pirisayaan kon bayongan in yagi-yagi.