Read Mongondow GALATIA 6 Bible Online

GALATIA 6 - Mongondow bible

GALATIA 6

¹Utat mita! Aka oyúon intau in kino kadapatan monimu nogaid kon noitaḷá, dá moiko inta nobiag noidudui kon ibog in Roho i Allah, musti modia bui kon intau tatua mongindaḷan inta moitutui. Táe koḷukóon in mosingog, bo moiko in musti mokopoingat sinbá diá kopongaruan doman.

²Mosituḷungan aka mokoontong kon roriga ande oaidan in intau ibanea, sin[8] aka tua in aidan monimu yo dinumuduidon kon parenta i Kristus in moiko.

³Aka tobatú intau bo nosangka kon sia tua intau moponting, bokaka diábí, yo sia in nonguboḷdon kon inia tontaní.

⁴Pomuḷoi intau in mustibí moindoi kon oaidannea tontaní, mopia andeka diá in oaidnea. Aka mopia dá tuabí in mokosanang kon ginanea. Táe donaaibí mopoyobandingmai onu inta inaidan intau ibanea.

⁵Sin pomuḷoi intau in mustibí motanggung jawab kon onu in inaidannea tontaní.

⁶Intau inta notarima kon totundú i Kristus, musti mosilai doman kon i gurunea kon bayongan inta mopia, inta oyúon kon inia.

⁷Dika moibog uboḷan. Sin ki Allah in diábí motaau in pogogitogan! Sin onu in pomuḷaan intau yo tuabí doman in sipuonnea.

⁸Aka ki ine in nomuḷa pinodoyon kon tabiat in intau, yo kopatoian in mouḻínea. Táe aka sia bo nomuḷa pinodoyon kon koibog in Roho i Allah, yo kobiagan mononoi in mouḻínea nongkon Roho i Allah.

⁹Manangka intua donaaibí mokopomaḷat in mogaid kon inta mopia; sin aka kita bo diá mogogai in mogaid kon inta diá mopia, yo korasaanbí doman naton in koonggotannea.

¹⁰Dá tuamai kon dodai in oyúonpa in kasampatan naton, yo koḻigai in kita sinbá mogaid kon inta mopia kon bayongan in intau, muna-munamai kon i utat mita naton inta mopirisaya kon i Tuhan Yesus.

¹¹Tarukiradon totok kopira in onu inta pinaisku takin hurup mita moḷoben.

¹²Intau mita inta mokikoontong kon tumpaḷa intau, mosia inta moramuji momakisa kon i monimu sinbá sunaton. Táe tua in aidan monia sinbá diá pogutúon in intau Yahudi in mosia. Sin mosia in nopoyaput in habar soaḷ roriga i Kristus.

¹³Sin mociapa inta nokisunat diábí doman dinumudui kon hukum i Musa. Táe ibogon monia in moiko musti mokisunat, sinbá mosia in motaau dumodia, sin moiko in noibog dinumudui kon atorang tatua.

¹⁴Táe akuoi in totuu kon doíbí dumodia kon onu inta ain inaidanku, koḻikudbí in modayow kon i Tuhan naton ki Yesus Kristus inta ain minatoi pinopopakú kon kayu pinoyotaḻempang. Lantaran Sia bo ain minatoi pinopopakú kon kayu pinoyotaḻempang, dá dunia naa in diá bidon in mangaḻenea kon inakó. Ná doman tua in akuoi kon tayowon in dunia naa, inanggap monia in akuoi naa naonda bo minatoidon.

¹⁵Sinunat ande diá sinunat, tua in diábí moponting, sin mobaḻíbí intau inta mobiag mobagu takin i Allah in moponti-ponting.

¹⁶Kon bayongan intau inta umuranpa nokadai kon atorang tatua bo bayongan doman intau inta dinumudui kon ibog i Allah, umuran igumonku mako sinbá ki Allah in mobogoi in kobiagan motompia bo barakat-Nea.

¹⁷Moiduduimai kon tua, poigumanku doman, sinbá diá tobatúmai intau in moposusamai kon inakó bui. Sin kon awakku naa in oyúonbí in tanda kon akuoi naa in dumoduduibí i Yesus.

¹⁸Poigumonkudon mako sinbá totabi bo barakat i Tuhan naton ki Yesus Kristus umuran kotaki-takin monimu utatku mita. Amin. Horomat nami, Ki Paulus