Read Mongondow PILIPI 1 Bible Online

PILIPI 1 - Mongondow bible

PILIPI 1

¹Utatku mita umat i Allah inta nogutun kon Pilipi, inta notobatúdon i Kristus Yesus bo inta ain nobaḻí itoi bo diaken kon jamaat! Akuoi, ki Paulus bo ki Timotius inta mogogaid kon oaidan i Kristus Yesus,

²mopoigum mako kon bá ki Allah, ki Amá naton bo ki Tuhan Yesus Kristus in umuran mobogoi in barakat bo kobiagan motompia kon i monimu.

³Pomuḷoi in akuoi mokotorop kon i monimu akuoi mopoyaput in sukur kon i Allah.

⁴Bo pomuḷoi doman mako sambayanganku in moiko komintan takin sanang in gina.

⁵Akuoi in mopoyaput in sukur kon i Allah sin nongkon pinomangkoianmai nodapot in kon tanaa mako, moiko in umuran nobantung kon inakó nopotaa-taau mako in Habar Mopia inta nongkon i Allah.

⁶Ki Allahbí in nomangkoi kon oaidan mopia tatua kon inimu, bo moyakinbí in akuoi, kon tantú-Neabí ingguputan in oaidan-Nea tatua modapot kon singgai ki Kristus Yesus in mamangoidon bui.

⁷Totuubí kon diábí moitaḷá in raianku tanaa kon i monimu, sin moiko umuran kon gina-ginaku mako, popisí in moiko ain nokouḻí domandon kon totabi bo barakat i Allah inta inogoi kon inakó; kon tungkuḷ in akuoi kon bonupa in ponjara tanaa mako ande kon tungkuḷ in kon ḷuaidon mobela kon kinobobanar in Habar Mopia tatua.

⁸Kinotaauanbí i Allah kon nongkon i Kristusbí tontaní in tanob bo tabiku kon i monimu.

⁹Naabí in sambayangku kon i monimu: Igumon mako doa, moiko in totu-totuudon motabi kon i Allah bo kon tumpaḷa intau bo umuran doman modugang in pongotahuan monimu kon soaḷ inta mopia bo pororai inta mobijaksana.

¹⁰Sahingga in kotaauandon monimu in momiḻí kon onu inta totok in mopia, bo kobobiagmu in diádon singkuḻeon ande poponapudan in onuka kon singgai ki Kristus moiangoidon bui.

¹¹Moiko in mobiag takin oaid mita inta totu-totuu mopia inta tongábí mouḻí nongkon i Yesus Kristus tontaní, dá ki Allah pomuliaan bo dayowon.

¹²Ibogonku in kotaauandon monimu komintan, kon soaḷ mita inta ain nobaḻí kon inakó tuabí in nokopopisí dá nobayongdon in nokidongog bo nopirisaya kon Habar Mopia tatua.

¹³Tuamai in bayongan intau kon komaḻig bo intau mita ibanea inta kon kotá tanaa nonotaaudon kon akuoi in pinobonu kon ponjara popisíbí in dinumudui kon i Kristus.

¹⁴Pinomonjaraan kon inakó in nobaḻídon dodoyonan sahingga in nobayong intau in Keresten kon kotá tanaa in nobaḻí nopirisaya totok kon i Tuhan, dá diádon moondo-ondok in mosia mopotaau in koyow i Allah.[1]

¹⁵Totuubí doman kon oyúonbí in tongonumai in kon sigad monia tua inta mopotaau in habar soaḷ ki Kristus popisí in mointoi bo moibog mobobayowan, táe oyúonbí doman in totu-totuu motuḻid in gina in nopoyaput in habar soaḷ ki Kristus tua.

¹⁶Intau mita tatua in nogaid kon tua sin mosia in motabi kon i Allah bo kon inakó, sin kinotaauandon monia kon ki Allahbí in nokiaid intua kon inakó sin moponiata kon totuubí in Habar Mopia tatua.

¹⁷Táe oyúon doman intau ibanea in nopotaau in habar soaḷ ki Kristus takin makusud inta diá mopia, mosia in nopotaau sin kopontingan tontaní. Sin irai monia kon oaid monia tatua in mokodugang kon yoyigaku kon bonu in ponjara.

¹⁸Táe diábí nongonu! Naondakabí in pogogaid monia kon mopotaau in Habar Mopia soaḷ ki Kristus; makusud mopia ande diá, tatap habar soaḷ ki Kristus pinotaaubí doman, dá mosanangbí in ginaku,

¹⁹sin kinotaauankubí kon barakat in sambayang mita monimu takin totuḷung doman in Roho i Yesus Kristus, dá mobebasbí in akuoi.

²⁰Inta totok in kinoibogku bo iharapku mako in bá diá mokoimontanmai in akuoi in diá mokopogaid kon oaidanku. Táe haraponku bá pomuḷoi mako, torutama totok in tanaa mako mobaranidon totok in akuoi sahingga in bayongan onu inta kon inakó — mobiag andeka matoi — ki Kristus in pomuliaan.

²¹Sin aka kon inakó, tujuan in kobiaganku tongábí ki Kristus! Aka matoi yo kauntunganbí intua.

²²Táe aka akuoi bo mobiagpa kon dunia naa, dá motaaupa in akuoi mogaid kon oaidan inta baraguna, dá diádon kotaauanku mongo onda in piḻíonku.

²³Doyowa norupa naa in morigugut kon bonu in ginaku. Moibogdon in akuoi monaḷámai kon dunia naa bo mayá mogutun takin i Kristus, sin tuabí inta totok in mopia;

²⁴táe, popisí in kopontingan monimu, dá mopiabí doman aka kon duniapa naa in akuoi.

²⁵Moyakinbí in akuoi kon soaḷ tatua. Tuamai kotaauankubí kon umuranpabí in kita moyotakin, sinbá motaaupa motuḷung moginropot bo modugangdon sanang ginamu kon onu inta ain pinirisayamu kon i Tuhan.

²⁶Sahingga aka akuoi mobuidon mangoi kon i monimu, dá modugangdon ḷoben in dodoyonan porasaan pia in gina monimu tua kon inakó.

²⁷Dá tuamai naa in poigumonku, kobiagbí in moiko podudui in onu inta pinoigum kon bonu in Habar Mopia i Kristus, sinbá aka moiangoi in akuoi yo diá bo diá kodongogankudon, kon moiko in umuranbí notobatú kon gina bo raian in moramuji mogaid kon onu inta pinirisaya podudui in Habar Mopia nongkon i Allah.

²⁸Bo topiḻikmai dikabí moondok kon saturumu mita; sin aka diá moondok in moiko, yo tua in mopoontong kon mosia in taḷowonbí bo moiko in mountung, sin ki Allahbí tontaní in mobogoi intua kon i monimu.

²⁹Sin moiko inogoian bidon i Allah in totabi inta deemanbí tongá mopirisaya kon i Kristus, táe poḷatbí doman motanggung kon roriga-Nea.

³⁰Tanaa, moiko in noyotakinku nogaid kon oaidan inta notongkai; tuata in oaidan inta nokoimontandon inontong monimu iramujiku totok in koḻipod, bo inta tantúku doman ramujion dapot kon tanaa mako, ná inta dinongogdon monimu masa in tanaa.