Read Mongondow PILIPI 2 Bible Online

PILIPI 2 - Mongondow bible

PILIPI 2

¹Moiko in noropot, sin ain notobatú i Kristus. Diádon moajar in gina monimu sin ki Kristus in motabi kon i monimu! Bo Roho i Allah umuran kotaki-takin monimu,[2] sahingga moiko tantúdon mototabian bo motabi doman kon tumpaḷa intau.

²Tuamai bá totu-totuudon mosanang in ginaku, dá aidai in naa: Tantúdon kobiag motobatú kon gina, motobatú kon raian, oyúon kototabian, motobatú kon jiwa bo motobatú kon tujuan.

³Dika motayak kon kauntungan tontaní andeka dumodia kon intau. Táe pokopoompábí kon dodia bo anggapdon kon intau ibaneabí in mopia-pia nongkon inaton.

⁴Pikirdon doman in kopontingan in intau ibanea, donaai tongá momikir kon kopontingan tontaní.

⁵Kon kobiagan monimu, pakébí in raian bo porasaan i Kristus Yesus:

⁶Aka podudui in kaadaan-Nea sabanarnea, Sia tua in notongkaibí i Allah, táe kaadaan-Nea tatua in diábí binaḻí-Nea patokan.[3]

⁷Táe tua komintan inukatan-Neapabí bo nobaḻí naonda bo tobatú ata. Sia nobaḻí naonda bo intau, bo tua pinoniata-Nea doman kon kobiagan-Nea.

⁸Sia in diábí motosiḷantud, bo nobiag motoindudui kon i Allah dapot in minatoi minatoi kon kayu pinoyotaḻempang.

⁹Tuamai in pinoḷantud totok i Allah in Sia, bo inogoian in kawasa inta moḷobe-ḷoben nongkon kawasa ibanea mako.

¹⁰Sinbá kon bonu in tangoi Yesus, bayongan in mahaḷuk inta kon ḷangit, kon butá ande kon ḻimonag in butá,[4] komintandon mosumba kon i-Nia.

¹¹Bo akúonbí monia komintan kon ki Yesus Kristus tua in Tuhanbí; takin natua dá ki Allah, ki Amá naton in pinomuliadon.

¹²Utat mita inta kotabiku, moiko umuranbí kodu-kodudui kon inakó wakutu in akuoi koyota-yotakinpa monimu, tuamai poigumonku kon i monimu, umpaka in kita nogiyayúandon táe umuranbí ramuji aidai onu inta kinoibog i Allah. Sin moiko aindon pinosaḷamat i Allah, tuamai umuran ramuji sinbá iko in mobiag mosompurna. Mokopoendar in mogaid kon tua komintan podudui kon inta kinoibog i Allah.

¹³Sin ki Allahbí in mopogonú kon ginamu sinbá moibog bo mokosanggup moposanang in gina i Allah in moiko.

¹⁴Aidaibí in oaidan tatua takin pia in gina bo dika mosirogian andeka mobobayowan.

¹⁵Sin aid natua in mopoontongbí kon moiko in ki adí mita i Allah inta diá kotaḷá, inta nobiag kon yua-yuak in intau mita masa naa inta gina diá mongotuḻid bo nobiag diá mongotoḷutui. Sahingga in moiko umuran monimbayag kon yua-yuak monia tua, naonda bo tundi mita kon ḷangit, táe dika taḷaan in pirman i Allah inta nobaḻí dodoyonan in kobiagan, sinbá oyúon in mokosanang kon ginaku aka moiangoidon singgai i Kristus, sin moniatadon kon onu inta iramujiku tua in komintanbí nobaraguna bo oyúon in mangaḻe irorigaankumai tua.

¹⁷Matoikabí in akuoi sin mobaḻí kuruban in sambayangmu kon i Allah inta pinirisayamu, yo diábí moyaat in ginaku kon i monimu.

¹⁸Ná doman tua, ibogonku in mosanang doman gina monimu takin ginaku.

¹⁹Mopirisayabí totok in akuoi kon takin totuḷung i Tuhan Yesus motaaudon bui potabáku mangoi kon i monimu in ki Timotius, sinbá moonowdon in ginaku mokodongog kon habar soaḷ moiko.

²⁰Tongábí ki Timotius in intau inta tongoraianku inta totu-totuu monarukira kon kopontingan monimu.

²¹Sin ibanea mako in tongábí morai kon kopontingan monia tontaní, deemanbí morai kon kopontingan i Kristus Yesus.

²²Sin inontong bidon monimu tontaní kon ki Timotius tua in nokobaragunabí kon inakó. Sia in totu-totuudon nogaid takinku nopotaau magí-mako in Habar Mopia inta nongkon i Allah. Kaminda naa in nádon onda guyanga bo adí.

²³Tuamai naonda in kotaauankudon kopaḷutan pelekaraku tanaa, dá ḷagikudon potabá mangoi kon i monimu in sia.

²⁴Bo mopirisayabí doman totok in akuoi kon takin totuḷung i Tuhan, akuoi in ḷagi bidon moiangoi kon i monimu.

²⁵Soaḷ ki Epaproditus ki utat naton inta pinotabá mangoi monimu motuḷung kon inakó, rasaankumai sia in paraḷukudon potabá bui mamangoi kon i monimu. Sia ain notuḷung kon inakó nogaid kon oaidanku.

²⁶Mokotanobdon totok in sia kon i monimu komintan, bo moajar domandon totok in ginanea sin kinotaauandon monimu kon notakit in sia.

²⁷Oo, totuubí kon notakit in sia gogió bo minatoi. Táe sinotabipa i Allah in sia; deemanbí tongá sia, táe akuoibí doman, sinbá diá modugang moajar in ginaku.

²⁸Manangka intua moḷobendon totok in ibogku bá ḷagikudon potabá mangoi bui kon i monimu in sia, sinbá mosanangdon in gina monimu aka ontongondon monimu in sia, bo moonow domandon in ginaku.

²⁹Dá tarimadon in sia takin pia in gina saḷaku utat inta tumpaḷa mopirisaya kon i Tuhan, donaaibí diá pandungonmai intau inta ná sia tua.

³⁰Sin lantaran oaidan i Kristus dá gogió in sia bo minatoi; norelabí totok in sia in nopotaru in nyawanea monoḻiu kon i monimu mobantung kon inakó moginḷapat kon onu inta diápa noḷapat.