Read Mongondow PILIPI 3 Bible Online

PILIPI 3 - Mongondow bible

PILIPI 3

¹Pangabisannea, pogumanku kon i monimu utatku mita, kosanangdon in gina monimu, sin moiko ain notobatú i Tuhan. Diábí mobú in akuoi in momais bui kon onu inta ain pinaisku koḻipod kon i monimu; sin kopiaanbí monimu intua.

²Mokopoingatdon kon i monia inta umuran mogaid kon inta diá mopia, mosia inta motaaudon tangoion ‘ungkú’. Mosia inta umuran momakisa kon bá sunatondon mita in bayongan intau.

³Bokaka kitabí naa in intau mita inta notarima kon sunat nongkon i Allah. Kitabí naa in intau inta ain dinia i Allah sin mosumba kon i-Nia, bo umuran mosukur mako in kita sin notobatúdon i Kristus Yesus. Diá bidon in kita moitogot mako kon upacara inta sipatnea in tongábí samantara.

⁴Sabanarnea akuoi naa in motaaubí doman tumogot mako kon upacara mita natua, sedang bo moiḻiubí kon i monia, aka kuma bo oyúon in dodoyonan monia in mogaid kon soaḷ mita inta koontongan tatua.

⁵Akuoi naa in sinunatbí doman wakutu in umurpa waḷu nosinggai. Akuoi in pinononggadí saḷaku intau in Israel, nongkon suku i Benyamin; akuoi in taakanpabí intau in Ibrani. Bo aka soaḷ kododudui kon hukum mita in agama Yahudi, yo akuoi naa in noigolong kon intau in Parisi.

⁶Popisí in moḷoben totok in ibogku dumudui kon hukum in agama tatua, dá ḷongasionku pogutúon in jamaat. Aka nilaion podoyon kon hukum in agama Yahudi yo akuoi naa intaubí mopia bo motoindudui.

⁷Tongá popisí in nopirisayadon kon i Kristus, dá onu in koḻipod inta inanggapku mobogoi in kauntungan kon inakó, tanaa mako inanggapkudon diá in mangaḻenea.

⁸Deemanbí tongá kon soaḷ mita tatua; táe kon bayongan doman in rupa-rupa inanggapkudon diá in mangaḻenea. Sin naonda in akuoi nonotaaudon kon i Kristus Yesus, yo kinorasaanku kon tuabí in mopia-pia nongkon bayongan in rupa-rupa. Lantaran ki Kristus, dá bayongan in rupa-rupa sinaḷaankudon sin tua komintan diábí in mangaḻenea, bo bá mouḻíkudon in ki Kristus,

⁹bo akuoi in totu-totuudon notobatú takin-Nea. Hubungan mopia takin i Allah in diábí nouḻíku sin popisí in dinumudui kon hukum in agama, táe tua in nouḻíkubí sin akuoi in nopirisayadon kon i Kristus. Dá tuamai hubungan mopia tua in namangoibí nongkon i Allah sin pinodoyon kon pirisaya kon i Kristus Yesus.

¹⁰Soaḷ inta totok in kinoibogku in monotaaubí kon i Kristus bo mokoalami kon kawasa inta nokobiag kon i-Nia nongkon kinopatoian. Bo moibog doman in akuoi mokoalami kon roriga ná inta kinorasaan-Nea bo notongkai doman ná kopopatoi-Nea,

¹¹sinbá mobiag doman in akuoi nongkon sigad in intau minatoi.

¹²Akuoi in diábí moguman kon nosompurnadon in akuoi. Táe umuranbí batukonku in tombuinag inta sinadia i Yesus Kristus. Sin tuabí in mangaḻe pinodomokan-Nea kon inakó bo binaḻí-Neadon in akuoi kapunyaan-Nea.

¹³Utatku mita, totuubí kon diábí[5] inanggapku kon nouḻíkudon intua komintan. Táe naa in inaidanku; iḻiongkudon onu inta ain nobaḻí koḻipod bo batukonku in onu inta kon tayowonku.

¹⁴Tuamai umuran in akuoi moribatuk mogaḷow mopobayá in tujuan pangabisan sinbá mouḻíku in tombuinag, tuata in kobiagan kon soroga; sin tuabí in mangaḻe pinogoinían i Allah kon i naton inta pinongin i Kristus Yesus.

¹⁵Manangka intua kita inta ain noguyang in pirisaya umuran morai natua. Bo aka oyúon in kon sigad monimu in diá notongkai in raiannea, dá insilanganbí i Allah intua kon i monimu.

¹⁶Táe umurai tarukira in tanaa: Musti in kita umuran mobiag dumudui kon atorang inta ain dinuduian naton dapot in tanaa mako.

¹⁷Utat mita! Duduiai in onu inta ain inaidanku bo tarukira in mosia inta nobiag naonda bo kami inta ain nobaḻí dodayanan kon i monimu.

¹⁸Akuoi in umurandon noguman kon i monimu, táe tanaa in takindon ombaḷ akuoi in moguman kon nobayongdon in intau inta kobobiagnea momoguyaat kon mangaḻe in kinopatoian i Kristus kon kayu pinoyotaḻempang.

¹⁹Intau mita natua in moputúbí, sin tuhan monia in sianbí monia, bo aid monia inta moromú tua duíonbí monia; sin tongábí bonu in dunia naa in umuran raion monia.

²⁰Táe kita in mobaḻíbí umat in soroga. Nongkon tua doman Datu Mopoposaḷamat naton, ki Tuhan Yesus Kristus in mamangoi. Sia tuata inta tantú oḷaton mako naton.

²¹Awak naton inta ilo-ilow bo inta diá mononoi naa, baḷuian i Kristus mobaḻí naonda bo awak-Nea tontaní inta momulia. Motaau-Neabí aidan intua, sin oyúonbí in kawasa nongkon i-Nia mopotungkud in bayongan yagi-yagi.