Read Mongondow TESALONIKA 1 2 Bible Online

TESALONIKA 1 2 - Mongondow bible

TESALONIKA 1 2

¹Utatku mita! Kinotaauan bidon monimu tontaní kon oyúonbí in mangaḻe kinoangoian nami kon sigad monimu.

²Bo kinotaauan bidon monimu kon wakutu in kami diápa namangoi kon i monimu kon Tesalonika, kami in muna bidon pinogutú bo siningkuḻe kon kotá in Pilipi. Táe umpaka nobayong in intau moḷawang kon i nami, táe umuranbí inogoian i Allah naton in kabaranian in kami mopotaau kon i monimu in Habar Mopia inta nongkon i Allah.

³Totundú nami in noitutuibí. Deemanbí makusud inta diá mopia andeka monombodok.

⁴Deemanbí natua! Kami in diábí mosingog sin moposanang kon gina in intau, táe moposanangbí in gina i Allah inta umuran noguji kon gina nami. Sin inanggap-Nea kon kami naa in motaaubí mopotaa-taau mako in Habar Mopia tatua.

⁵Kinotaauan bidon monimu kon diábí dodai onda in kami tongá mopia kon ouman andeka monombodok kon i monimu, sin mobuni kon makusud inta tongá motayak kon kauntungan tontaní. Ki Allahbí in nonotaau kon tua komintan!

⁶Bo diábí doman dodai onda in kami moramuji sinbá duíon monimu ande duíon in intau ibanea. Umpaka sabanarnea motaaubí aidan nami intua, sin kami in rasul i Kristus, bo motaaubí doman tuntuton nami kon i monimu.

⁷Táe kami in tongábí umuran mokopopia kon oaid wakutu in kon yua-yuakpa monimu, naonda bo guyanga bobay[1] monompia kon i adínea.

⁸Natua in kaadaan nami. Popisí in tabi nami totok in moḷoben kon i monimu, dá nobayagbí in gina nami in mobogoi kon i monimu. Naaibí in tongá Habar Mopia nongkon i Allah, nodapotbí in kobiagan nami yo ogoi nami potaru

⁹Tantú kinotoropanpabí monimu uḻe utat mita naonda in pinogogaid bo pinororamuji nami. Doḷom bo singgai kami in mogaid sinbá diá tobatúmai in kon sigad monimu in mororiga wakutu in kami nopoyaput in Habar Mopia inta nongkon i Allah kon i monimu.

¹⁰Motusi in kobobiag nami, mobanar bo diá in yagi-yagi inta diá mopia in inaidan nami kon i monimu inta ain nopirisaya kon i Kristus. Inontong bidon monimu tontaní in kami bodongka bidon ki Allah in nonotaau kon tua komintan.

¹¹Kinotaauanbí monimu in kinototabi nami kon i monimu. Naonda bo guyanga bo adí.

¹²Kami umuran mononggina bo mobogoi in moginrigon kon gina monimu bo mondodak sinbá moiko in moidudui kon inta kinoibog i Allah. Inoiní-Nea in moiko sinbá mobaḻí umat kon Dunia-Nea inta Mobagu bo mokorasa kon kawasa-Nea inta moḷoben.

¹³Oyúon in totok mokopia-pia kon gina nami, sahingga in kami tantú mosukur kon i Allah. Tuata wakutu in kami nopoyaput in Habar Mopia nongkon i Allah kon i monimu. Habar Mopia tatua in diábí tongá inanggap monimu habar nongkon intau, táe totu-totuubí Habar Mopia nongkon i Allah. Sin Roho-Neabí in pinopopaké-Nea kon inimu nogaid kon tua mita, intau inta mopirisaya kon i Yesus.

¹⁴Bayongan ginaḷum jamaat i Allah, onu inta kinorasaan monimu, kinorasaanbí doman in jamaat mita i Allah inta kon Yudea inta nopirisaya domandon kon i Kristus Yesus. Moiko in pinogutú doman in yobayat mita monimu tongoḻipúan, naonda bo inta kinorasaan in jamaat mita i Allah kon Yudea. Mosia in pinogutú doman in intau mita Yahudi.

¹⁵Intaubí mita tatua inta noḻimod kon i Tuhan Yesus bo nabi mita bo inta nomogutú doman kon i nami. Mosia in mosaturu kon bayongan intau, bo beresibí diá mosanang in gina i Allah kon i monia.

¹⁶Modapot in mosia moramuji totok in moḷamboi kon inami mopoyaput in Habar Mopia kon intau mita inta deeman Yahudi, Habar Mopia inta mokosaḷamat kon i monia. Intau mita in Yahudi tatua, umuran mogaid kon inta diá mopia kinobobúbí monia. Pangabisannea hukumon i Allah in mosia!

¹⁷Bayongan ginaḷum jamaat i Allah, wakutu in kita noyotanga diá noonggot — noyayú kon mata táe nodiugbí kon gina — totokbí in kinotanoban nami in moiko bo tantú ramujion nami sinbá buipa moyodungkuḷ monimu in kami!

¹⁸Kami in nonomayádon mamangoi mokipodungkuḷ kon i monimu; kotongonumaidon degá nonungkuḷ táe umuran ḷamboian Ibilis in tomayá nami tatua.

¹⁹Totuubí kon tongábí moiko nion in nobaḻí harapan bo inta nobaḻí batoḷ in dodob nami aka ki Yesus inta ki Tuhan naton mamangoi bui!

²⁰Totuu kon moikobí nion batoḷ in dodob bo inta nobaḻí dodoyonan pia in gina nami!