Read Mongondow YOSUA 10 Bible Online

YOSUA 10 - Mongondow bible

YOSUA 10

¹Ki Adoni-Zedek, datu in Yerusalem,[2] nokodongog kon ki Yosua ain nogagow bo norimumud kon bayongan kotá in Ai, poḷat noḻimod kon i datu monia ná inta ain pinogogaidnea kon Yerikho bo kon i datu monia. Dinongognea domandon kon intau in Gibeon nomia domandon kon dodandian yoyobayatan takin intau mita in Israel bo nogutun kon yua-yuak monia.

²Intau mita in Yerusalem in noondokdon totok, sin Gibeon tua in kotá inta moḷobenbí; notongkai in koḷoben in kotá mita inta oyúon in datu, nodapot in Gibeonbí tua in moḷobe-ḷoben in Ai. Bo intaunea mita in mongotorindog bo mongopandoi doman moparang.

³Tuamai in ki Adoni-Zedek nopotabá in intau minayá kon i Datu Hoham kon Hebron, ki Datu Piream kon Yarmut, ki Datu Yapia kon Lakhis, ki Datu Debir kon Eglon, takin nokidia in koyow nanaa,

⁴“Koḻigai angoipa bantungai in akuoi in monubu kon Gibeon, sin mosia in nomiadon kon dodandian yoyobayatan takin i Yosua bo in intau mita in Israel.”

⁵Dá datu in Amori taya ḻima tatua, inta datu in Yerusalem, Hebron, Yarmut, Lakhis bo Eglon noyopakatdon bo takin bayongan in tontara monia, mosia moḻibut bo monubu kon Gibeon.

⁶Intau mita in Gibeon nopotaau in habar tanaa kon i Yosua inta kon pinononḷoḷaigan kon Gilgal, “Dika pomayá mako in kami tontaní, Tuang! Ḷagidon angoi bantungai in kami, sin tontara nongkon bayongan datu in Amori kon buḷud ain noyodondon sin monubu kon inami!”

⁷Bo ki Yosua takin bayongan in tontaranea, noitakin doman in tontaranea mita inta mongopia totok, nobuat nongkon Gilgal sin mayá moparang.

⁸Ki TUHAN noguman kon i Yosua, “Dika moondok kon i monia. Kauntungan inogoi-Kudon kon inimu, tuamai in diábí tobatúmai in intau mokotahang in monayow kon inimu.”

⁹Tonggobii tua ki Yosua takin tontaranea mita nobuat nongkon Gilgal nopobayá in Gibeon, bo baḷú nonubu kon intau mita in Amori.

¹⁰Binaḻí i TUHAN in intau mita in Amori notoboḻingo naonda in nokoontong kon tontara mita in Israel. Nobarong intau in Amori in iḻimod kon Gibeon, bo inta nobiagpa dinuduran nosiḻig kon buḷud in Bet-Horon nodapot in Azeka bo Makeda kon dotá in toḷatan.

¹¹Kon tungkuḷ in intau mita in Amori nosiḻig kon buḷud tatua sin moḷagui nongkon tontara mita in Israel, ki TUHAN nopoḷabú in uyan eis inta moḷoben nongkon ḷangit kon i monia kinoouputbí in daḷan nodapot kon Azeka. Inta minatoibí kinoḷabúan in uyan eis in mobayo-bayong nongkon inta iḻimod in intau mita in Israel.

¹²Kon singgai tatua kon tungkuḷ in ki TUHAN nopountung kon intau mita in Israel nongkon intau mita in Amori, ki Yosua noyosingog i TUHAN. Bo kon tayowon in intau Israel, ki Yosua noguman, “Ei mata in singgai! Pogogaipa kon tombutung in Gibeon. Bo iko buḷan! Dikapa momamping nongkon tombutung in Ḷopá in Ayalon.”

¹³Dá nogogaidon mata in singgai bo buḷan diádon nomamping nodapot in intau mita in Israel nopaḷut nonaḷow kon bayongan in musungnea mita. Onu inta nobaḻí tatua pinais kon bonu in Buk Yasar. Tosinggai nouput mata in singgai nogogai kon yua-yuak in ḷangit, bo noonggot totok bodongka sinumoyop.

¹⁴Diábí kon dodai in onda in nobaḻí in ná singgai tatua, bo diá bidon bui mobaḻí in ná singgai tatua, kon ki TUHAN in dinumudui kon ibog in intau. Ki TUHAN notuḷung kon Israel noparang!

¹⁵Naonda in pinoparangan tatua, ki Yosua bo tontaranea mita nobui kon pinononḷoḷaigan monia kon Gilgal.

¹⁶Tongá datu in Amori taya ḻima nokoḷagui bo nogadop kon angob tobatú kon Makeda.

¹⁷Intau inta nokoontong kon i monia, nopotaau kon i Yosua in tampat inta pinogadopan monia.

¹⁸“Ḻitoidon in batu mita moḷoben kon bibig in angob tatua, bo pokiḷukadon kon pongawal kon tua,” guman i Yosua,

¹⁹“táe moiko in dikabí mogogai kon tua. Aḷowaidon turus, bo tubu in mosia nongkon tumi; dika pomayá mako in mosia tumuot kon kotá mita monia! Ki TUHAN Allahmu ain nobogoi in kauntungan kon i monimu nongkon i monia.”

²⁰Ki Yosua bo intau mita in Israel noḻimod kon intau mita in Amori tatua, táe oyúonpa doman in kon sigad mita monia in noḷagui minayá in kotá notayak kon pinogadopan, dá diá kinoḻimodan.

²¹Onda intua bayongan in tontara i Yosua nobui mangoi kon i Yosua takin saḷamat kon pinononḷoḷaigan kon Makeda. Diá tobatúmai in intau kon butá tatua in mokobaḻí mosingog kon onu bo onu sin monontot kon intau in Israel.

²²Onda intua ki Yosua noguman, “Tanaa in bukádon taḷob in angob tatua bo diá mangoi kon naa in datu taya ḻima tatua.”

²³Dá binuká domandon in angob tatua, bo datu mita in Yerusalem, Hebron, Yarmut, Lakhis bo Eglon dinia pinoḷuai,

²⁴bodongka dinia kon i Yosua. Bo ki Yosua nogoiní kon bayongan intau in Israel noyosipun, bo nomarenta sinbá porwira mita inta sinumakin noparang takinnea in mamangoi moritak kon sindun in datu mita tatua. Porwira mita tatua in namangoi domandon bo noritak kon sindun in datu mita tatua.

²⁵Nopaḷut mako kon tua, ki Yosua noguman kon porwira mita tatua, “Dika moḻia-ḻiaw in gina bo dika moondok. Pokoyakin bo pokobarani in moiko, sin nanaabí in pogogaid i TUHAN kon bayongan in musungmu.”

²⁶Bo ki Yosua noḻimod kon datu mita tatua bo pinopobambé monia kon oigi ḻima. Mayat monia pinomayádon mako kon tua nodapot in ḷoḷabungnea.

²⁷Kon dodai in mata in singgai sinumoyop, podudui in parenta i Yosua, mayat mita tatua pinopoponag bodongka binayá pinogonag kon bonu angob inta pinogadopan monia koina. Onda intua batu mita moḷoben pinopotaḷob kon bibig in angob tatua. Umaai in tanaa batu mita tatua kon tuapa doman.

²⁸Singgai tatua ki Yosua nonubu kon Makeda, bo poḷat nonaḷow kon kotá tatua takin datu monia. Bayongan in intau kon kotá tatua iḻimodnea; diá tobatúmai in pinomayá mako nobiag. Inaidanmai i Yosua in datu in Makeda tatua ná doman pinogogaidnea kon i datu in Yerikho.

²⁹Nopaḷut mako kon tua, ki Yosua takin tontaranea minayá turus nongkon Makeda nopobayá ná Libna bo poḷat nonubu kon Libna.

³⁰Ki TUHAN in nopountung domandon kon intau in Israel nongkon kotá tanaa bo datu monia. Diá tobatúmai in pinomayánea nobiag; bayongan in intau kon bonu in kotá tatua iḻimod. Inaidanmai i Yosua in datu in kotá tatua ná doman pinogogaidnea kon i datu in Yerikho.

³¹Onda intua ki Yosua takin tontaranea minayá nongkon Libna nopobayá in Lakhis. Kinopung monia in kotá tatua bo dongka sinubu.

³²Ki TUHAN nopountung kon intau in Israel nongkon i Lakhis kon pinoparangan kon singgai nogindua. Onu in inaidan monia kon Libna, inaidan doman monia kon Lakhis; diábí in tobatúmai intau in pinomayá mako nobiag, komintanbí iḻimod.

³³Ki Horam, datu in Gezer namangoi notuḷung kon i Lakhis, táe sinaḷow doman i Yosua in sia bo tontaranea mita; diá tobatúmai in kinotaḷáan, nodait minatoi.

³⁴Noiduduimai kon tua, ki Yosua bo tontaranea bui minayá nongkon Lakhis nopobayá ná Eglon bo nongopung poḷat nonubu kon kotá tatua.

³⁵Kon singgai doman tatua kinoagowan monia in Eglon, bo noḻimod kon bayongan in intau kon tua ná inta inaidan monia kon Lakhis.

³⁶Nongkon Eglon, ki Yosua bo tontaranea notakod kon buḷud bo minayá in kotá in Hebron, bo nonubu

³⁷poḷat nogagow kon kotá tatua. Datunea bo bayongan in intau kon kotá tatua bo kon kotá mita ibanea inta kon diugneamai, nodaitbí iḻimod. Ki Yosua in norimumud kon bayongan in kotá tatua ná pinogogaidnea kon kotá in Eglon. Diá tobatúmai in pinomayánea mako in nobiag kon tua.

³⁸Nopaḷut mako kon tua, ki Yosua bo tontaranea nobui bo minayá nonubu kon Debir.

³⁹Kotá tatua bo datunea bo bayongan in kotá inta noyodiugmai kon tua inagow i Yosua. Bayongan in intau kon tua iḻimod. Inaidanmai i Yosua in Debir bo datunea ná pinogogaidnea kon Hebron bo Libna takin datunea.

⁴⁰Bayongan in butá tatua pinotungkud i Yosua. Sia nonaḷow kon bayongan in datu mita inta kon buḷud, kon oyuk mita in buḷud kon dotá in pomukaan, kon sipangkoion mita in buḷud kon dotá in toyopan, bo kon ḷopá mita kon dotá in toḷatan. Diábí in tobatúmai in intau in pinomayánea mako nobiag; komintanbí iḻimod. Tua in pinoduduibí kon parenta i TUHAN, Allah in Israel.

⁴¹Ki Yosua nonaḷow kon i monia, nongkon Kades-Barnea kon dotá in toḷatan nodapot in Gaza kon diug in bingkí in pintad, noituot doman in bayongan butá in Gosyen, turus nodapot kon Gibeon kon Utuan.

⁴²Tongá komintan noparang, ki Yosua nokotaḷowdon kon bayongan in datu tatua bo nogagow kon bayongan butá inta kon bonu in kawasa monia, sin ki TUHAN, Allah Israel, noparang noyotakin in Israel.

⁴³Nopaḷut mako kon tua, ki Yosua nobuidon takin in tontaranea kon pinononḷoḷaigan kon Gilgal.