Read Mongondow YOSUA 11 Bible Online

YOSUA 11 - Mongondow bible

YOSUA 11

¹Naonda in ki Datu Yabin inta nongkon Hazor nokodongog kon habar kinountungan mita in Israel, nopotabá in sia kon intau minayá kon i Datu Yobab nongkon kotá in Madon, kon datu mita inta kon kotá in Simron bo Akhsap,

²kon datu mita kon buḷud mita kon dotá in utuan, kon Ḷopá in Yordan kon dotá in toḷatan kon Galilea, kon butá inta kon pangkoi in buḷud, bo kon butá inta kon pintad kon diug in Dor.

³Sia in nopotabá doman in intau minayá kon intau in Kanaan inta kon dotá in toyopan bo kon dotá in pomukaan kon Yordan, kon intau in Amori, Het, Peris, bo intau in Yebus inta kon buḷud mita, bo kon intau in Hewi kon sipangkoion in Buḷud in Hermon kon butá in Mizpa.

⁴Dá namangoidon in datu mita tatua takin bayongan in tontara monia inta totok in mobayong nádon bungaion kon pintad. Kabaḷo bo kereta in parang monia in mobarong domandon totok.

⁵Bayongan in datu mita tatua noyopakat bo namangoi noyotakin nononḷoḷaigan kon diug in Tapá in Merom sin monubu kon Israel.

⁶Ki TUHAN noguman kon i Yosua, “Dika moondok kon i monia. Ikoḷom kon oras ná tanaa, mosia tua in komintandon ḻimodon-Ku sin motuḷung kon Israel. Kabaḷo monia in musti pengkoḷanmu, bo kereta mita in parang monia in musti turubon mu.”

⁷Dá ki Yosua takin bayongan in tontaranea nonubu kon musung tatua dinumaḻi-daḻí kon diug in Tapá in Merom.

⁸Bo Israel in pinopountung i TUHAN nongkon i monia. Intau in Israel nonubu bo nondudur kon i monia nodapot in Misrepot-Maim bo Sidon kon dotá in utuan, bo nodapot in Ḷopá in Mizpa kon dotá in pomukaan. Pinoparangan diápa doman mooyong nodapot in diádon tobatúmai in musung in kinotaḻiban — nodaitdon minatoi.

⁹Ki Yosua in nopoaid intua kon i monia pinodudui kon onu inta pinarenta i TUHAN: pinengkoḷannea in kabaḷo monia, bo nonurub kon kereta mita in parang monia.

¹⁰Naonda in ki Yosua nobui, baintua bo nogagow kon Hazor inta kon tungkuḷ intua totok in moropot kon sigad in bayongan in dodatuan kon tua. Kotá tatua in sinurub, bo datu takin bayongan in intaunea sinoko ḻimod; diá tobatúmai in pinomayá mako nobiag.

¹²Bayongan in kotá mita tatua inagow i Yosua, bo datunea mita in dinomok bo iḻimod pinodudui kon parenta i Musa, mogogundoi i TUHAN tua.

¹³Táe kotá mita inta pinosindog kon tudu in buḷud mita inta ain irimumud, diábí in tobatúmai in sinurub intau in Israel, koḻikudbí in Hazor inta sinurub i Yosua tontaní.

¹⁴Bayongan in intau kon bonu in kotá tatua iḻimod; diá in tobatúmai in pinomayá mako nobiag. Táe bayongan in pakakat mita inta koboḻi bo bobiagon monia in ginamá in intau in Israel nobaḻí kapunyaan monia.

¹⁵Bayongan inta pinarenta i TUHAN kon i Musa, mogogundoinea, aindon pinoguman i Musa kon i Yosua, bo inaidan doman i Yosua; diábí in tobatúmai in diá inaidannea.

¹⁶Ki Yosua in nogagow kon bayongan in butá tatua — kon buḷud, kon sipangkoion in buḷud, pinomayá kon utuan ande inta kon toḷatan; bo bayongan doman butá in Gosyen, takin Ḷopá in Yordan.

¹⁷Kooḷad in butá tatua in pinangkoi nongkon Buḷud Noḷogat kon dotá in toḷatan kon diug in Edom, nodapot kon utuan kinoyoyayú in Baal Gad kon Ḷopá in Libanon kon dotá in toḷatan Buḷud in Hermon. Noonggot totok in ki Yosua noparang takin datu mita kon butá tatua, táe kon buitnea nodomok bo noḻimod in sia kon i monia komintan.

¹⁹Nongkon kotá mita kon bayongan in butá tatua, diábí in tobatúmai in kotá in nogaid kon dodandian yoyobayatan takin Israel, koḻikudbí in Gibeon, kotá in bangusa in Hewi. Bayongan doman kotá ibanea sinaḷow doman monia kon bonu in parang.

²⁰Binaḻí i TUHAN in mosia motontogat in gina bo momarang kon intau in Israel, sinbá mosia yopúon, bo ḻimodon takin diá in ampung podudui in parenta i TUHAN kon i Musa.

²¹Kon tungkuḷ doman intua ki Yosua minayá noyopú kon bangusa in Enak, bangusa inta intaunea in mongoḷoben bo moitoi inta nogutun kon buḷud — kon Hebron, Debir, Anab, bo kon bayongan in buḷud in Yohuda bo Israel. Mosia iḻimod komintan i Yosua, bo kotá mita monia in pinayong.

²²Diá in tobatúmai in nongkon bangusa in Enak tatua in sinonggagatan kon butá in Israel, tongádon kon Gaza, Gad, bo kon Asdod in oyúonpa.

²³Bayongan in butá tatua inagow i Yosua pinodudui kon parenta i TUHAN kon i Musa, bo inogoi kon intau in Israel nobaḻí kapunyaan monia. Butá tatua in sinila-silai, bo batúan in suku nokouḻí kon tongosilai. Bangusa Israel nogogaidon noparang bo butánea in noaman bo nobiag notompia.