Read Mongondow YOSUA 12 Bible Online

YOSUA 12 - Mongondow bible

YOSUA 12

¹Butá inta kon dotá in pomukaan kon Yordan, nongkon Ḷopá in Ongkag Arnon bo notakod monik kon Ḷopá in Yordan nodapot kon nouput in Buḷud in Hermon kon dotá in utuan, aindon inagow bo iḻitúan in intau Israel. Doyowa in datu in sinaḷow monia.

²Tobatú in tangoinea in ki Sihon, datu in Amori inta noiḻitú kon Hesybon. Butá inta kon bonu in kawasanea in tongobotak in butá in Gilead; inta nongkon Aroër (kon bingkí in Ḷopá in Arnon) bo kotá inta kon yua-yuak in ḷopá tatua nodapot in kinoouput in Ongkag in Yabok inta kon pinosigadan in butá in bangusa Amon;

³Noitakin doman in butá Ḷopá in Yordan kon dotá in pomukaan, nongkon Danow Galilea nopobayá ná toḷatan nodapot kon Bet-Yesimot (kon dotá in pomukaan kon Laut Mati), minayá turus kon sipangkoion in Buḷud in Pisga.

⁴Datu ibanea inta sinaḷow in intau in Israel in ki Datu Og nongkon butá in Basan, inta noiḻitú kon Asytarot bo Edrei. Sia in intau tobatú inta ki agat in bangusa Repaim.[3]

⁵Butá kinawasanea in nongkon Buḷud in Hermon, Salkha, bo bayongan in Basan nodapot in kinoyoyayú in butá in Gesur bo Maakha; bo noitakin doman in tobotak in butá in Gilead nodapot in kinoouput in butá inta kinawasa i Datu Sihon kon kotá in Hesybon.

⁶Tuata in datu doyowa inta sinaḷow i Musa bo in intau in Israel. Butá in datu mita tatua inogoi i Musa, mogogundoi i TUHAN, kon suku i Ruben, Gad, bo tongobotak in suku Manasye, sin mobaḻí butá kapunyaan monia.

⁷Datu mita inta sinaḷow i Yosua bo in bangusa Israel tuata in bayongan datu mita kon butá inta kon dotá in toyopan Ongkag in Yordan, nongkon Baal-Gad kon Ḷopá in Libanon minayá nodapot kon Buḷud Ḷogat kon dotá in toḷatan kon diug in Edom. Butá tatua in sinila-silai i Yosua kon suku mita in bangusa Israel sin baḻíon butá kapunyaan monia.

⁸Butá tatua in nongkon buḷud, kon sipangkoion in buḷud kon dotá in toyopan, Ḷopá in Yordan butá inta kon sipangkoion in buḷudnea, butá mita inta kon oyuk mita kon dotá in pomukaan, bo butá in padang gurun kon dotá in toḷatan. Butá mita tatua in pinogogutunandon in intau in bangusa Het, Amori, Kanaan, Peris, Hewi bo Yebus.

⁹Datu mita inta sinaḷow, kobayongnea in toḷu nopuḷú bo mita; mosia tua in datu mita inta nongkon kotá tanaa: Yerikho, Ai (kon diug in Betel), Yerusalem, Hebron, Yarmut, Lakhis, Eglon, Gezer, Debir, Geder, Horma, Arad, Libna, Adulam, Makeda, Betel, Tapuah, Heper, Apek, Lasaron, Madon, Hazor, Simron-Meron, Akhsap, Taanakh, Megido, Kedes, Yokneam (kon Karmel), Dor (kon pintad) Goyim (kon Galilea) bo Tirza.