Read Mongondow YOSUA 15 Bible Online

YOSUA 15 - Mongondow bible

YOSUA 15

¹Motoḷuadí nongkon suku in Yohuda notarima kon tonsilai butá inta noiduduimai naa in sigadnea: Kon dotá in toḷatan, butá tatua nosimbanat nodapot kon popod inta totok in kon toḷatan butá kon padang gurun Zin kon pinosigadan in Edom;

²pinangkoi kon popod in toḷatan kon Laut Mati,

³bo minayá ná toḷatan nongin oyuk mita in buḷud kon Akrabim nodapot kon Zin. Noiduduimai kon tua nongin toḷatan Kades-Barnea, minayá nongin Hezron, notakod kon Adar, onda intua nomurow nopobayá ná Karka.

⁴Nongkon tua minayá doman ná Azmon, bo notaḷug kon tapá kon pinosigadan in Mesir, onda intua nodapot kon Dagat Toyuak. Tuata in sigad kon dotá in toḷatan butá inta inogoi kon suku in Yohuda. Bo sigad doman tatua inta nobaḻí sigad kon dotá in toḷatan in bayongan butá in Israel.

⁵Kon dotá in pomukaan, sigadnea in Laut Mati, minayá ná utuan nodapot kon minanga in Ongkag in Yordan. Kon dotá in utuan, sigadnea in pinangkoi nongkon minanga in Ongkag in Yordan tatua,

⁶bo notakod kon Bet-Hogla, bo minayá ná sigad in Ḷopá in Yordan. Nongkon tua sigad in utuan notakod monik kon utuan nodapot kon Batu Bohan (Bohan in ki adí i Ruben),

⁷onda intua minayá ná Ḷopá in Roriga nodapot kon Debir, bo nomurow bui ná utuan nopobayá ná Gilgal kon tampat inta noyogintayow in oyuk mita in buḷud kon Adumim kon dotá in toḷatan in ḷopá tatua. Nongkon tua minayá bui muik kon bokaká in tubig En-Semes, bodongka nopobayá ná En-Rogel,

⁸Onda intua notakod nongin Ḷopá in Hinom ná toḷatan in buḷud, inta kinoukatan in Yerusalem, kotá in intau in Yebus. Nongkon tua sigad tatua pinotakod kon tudu in buḷud tatua kon dotá in toyopan kon Ḷopá in Hinom, kon popod in utuan Ḷopá in Repaim,

⁹onda intua minayá ná bokaká in tubig Me-Neptoah, nodapot kon kotá mita inta kon diug in Buḷud Epron. Nongkon tua in sigad in butá tatua nomurow ná Baala (inta Kiryat-Yearim),

¹⁰bo noḻibu kon dotá in toyopan Baala nopobayá ná Buḷud in Edom, bo minayá ná dotá in utuan Buḷud in Yearim (tuata in Buḷud in Kesalon), bo noponag kon Bet-Semes, onda intua minayá ná Timna.

¹¹Nongkon Timna, sigad tatua nopobayá ná dotá in utuan kon Buḷud in Ekron, bodongka nomurow nopobayá ná Sikron, noitaḻib kon Buḷud in Baala, bo nopobayá ná Yabneel, bo sinimpod kon Dagat Toyuak,

¹²inta nobaḻí botok tonsigad kon dotá in toyopan kon butá in suku Yohuda. Butá tatua in pinogutunan in intau mita inta nongkon motoḷuadí mita kon bonu in suku Yohuda.

¹³Podudui in parenta i TUHAN kon i Yosua, tongosilai in butá i Yohuda ogoi kon i Kaleb adí i Yepune nongkon suku in Yohuda. Inogoi kon inia in Hebron, kotá inta kapunyaan i Arba, ki amá i Enak.

¹⁴Buí i Enak in intau in Sesai, Ahiman bo Talmai. Inuntun i Kaleb in mosia komintan nongkon Hebron.

¹⁵Nongkon tua sia minayá nonubu kon intau mita inta nogutun kon Debir. (Kotá inta koḻipod sinangoian Kiryat-Seper.)

¹⁶Guman i Kaleb, “Ki ine in mokoagow kon Kiryat-Seper, sia in motaau motonibuḷoi i Akhsa inta adíku bobay.”

¹⁷Ki Otniel, adí i Kenas inta ki utat i Kaleb, nogagow kon butá tatua; dá inogoi i Kaleb in ki Akhsa pinobuḷoi i Otniel.

¹⁸Kon singgai pinonikaan monia, ki Otniel nodondouḷug kon i Akhsa[6] sinbá moigum kon tongosilai in butá kon i amánea. Dá noponagdon in ki Akhsa nongkon keledainea, dá ki Kaleb noḻibó kon inia mongo onu in koibognea.

¹⁹Ki Akhsa in notubag, “Koibogku in butá inta oyúon doman in bokaká, sin butá inta inogoi i amá kon inakó tua diá in tubig.” Dá inogoiandon doman i Kaleb in sia in butá inta oyúon in bokaká kon dotá in uḷuan bo bokaká inta kon dotá in sioḷan.

²⁰Noiduduimai naa in butá inta inogoi kon motoḷuadí mita inta kon bonu in suku Yohuda sin mobaḻí kapunyaan monia.

²¹Kotá mita inta totok in moyayú kon dotá in toḷatan, inta nobaḻí kapunyaan i Yohuda, tuata inta noiukat kon pinosigadan in Edom, tua komintan doyowa nopuḷú bo siow in kotá, noituot domandon in ḻipú mita inta kon diugneamai. Kotá mita tatua in: Kabzeel, Eder, Yagur, Kina, Dimona, Adada, Kedes, Hazor, Yitnan, Zip, Telem, Bealot, Hazor-Hadata, Keriot-Hezron (tuata in Hazor), Amam, Sema, Molada, Hazar-Gada, Hesmon, Bet-Pelet, Hazar-Sual, Bersyeba, Baala, Iyim, Ezem, Eltolad, Khesil, Horma, Ziklag, Madmana, Sansana, Lebaot, Silhim, Ain bo Rimon.

³³Kotá mita, noitakin doman in ḻipú mita kon diugneamai, inta noiukat kon sipangkoion mita in buḷud, kobayongnea komintan in mopuḷú bo opat in kotá, tuata in: Esytaol, Zora, Asna, Zanoah, En-Ganim, Tapuah, Enam, Yarmut, Adulam, Sokho, Azeka, Saaraim, Aditaim, Gedera bo Gederotaim.

³⁷Bo mopuḷú doman bo onom in kotá noiduduimai naa takin ḻipú mita kon diugnea: Zenan, Hadasa, Migdal-Gad, Dilean, Mizpa, Yokteel, Lakhis, Bozkat, Eglon, Khabon, Lahmas, Khitlis, Gederot, Bet-Dagon, Naama bo Makeda.

⁴²Bo siow doman in kotá noiduduimai naa, noitakin doman in ḻipú mita inta kon diugneamai: Libna, Eter, Asan, Yiptah, Asna, Nezib, Kehila, Akhzib bo Maresa.

⁴⁵Bo Ekron takin kotá mita mointok bo ḻipúnea mita,

⁴⁶takin bayongan in kotá bo ḻipú mita kon diug in Asdod, nongkon Ekron nodapot kon Dagat Toyuak.

⁴⁷Ná doman tua in Asdod bo Gaza takin kotá mita mointok bo ḻipúnea mita inta noibaya-bayá mako nodapot kon diug in tapá kon pinosigadan in Mesir bo pintad in Dagat Toyuak.

⁴⁸Kon butá kon buḷud in mopuḷú bomitá in kotá bo ḻipú mita kon diugneamai: Samir, Yatir, Sokho, Dana, Kiryat-Sana (inta Debir), Anab, Estemoa, Anim, Gosyen, Holon bo Gilo.

⁵²Bo siow doman in kotá noiduduimai naa, noitakin doman in ḻipú kon diugneamai: Arab, Duma, Esan, Yanum, Bet-Tapuah, Apeka, Humta, Kiryat-Arba (inta Hebron) bo Zior.

⁵⁵Bo mopuḷú doman in kotá noiduduimai noitakin doman in ḻipú mita kon diugnea: Maon, Karmel, Zip, Yuta, Yizreel, Yokdeam, Zanoah, Kain, Gibea bo Timna.

⁵⁸Bo kotá onom noiduduimai doman naa, noitakin in ḻipú mita inta kon diugneamai: Halhul, Bet-Zur, Gedor, Maarat, Bet-Anot bo Eltekon.

⁶⁰Bo kotá doman doyowa noiduduimai naa takin ḻipú mita inta kon diugneamai: Kotá in Kiryat-Baal, (tuata in Kiryat-Yearim) bo Kotá in Raba.

⁶¹Kon butá in padang gurun, onom in kotá noiduduimai naa takin ḻipú mita kon diugneamai: Bet-Araba, Midin, Sekhakha, Nibsan, Kotá in Simuton bo En-Gedi.

⁶³Kotá in Yerusalem noitakin doman kon kapunyaan i Yohuda, táe intau in Yohuda in diábí mokountun kon intau mita in Yebus inta nogutun kon tua. Dapot in tanaa intau mita in Yebus nogutunpabí noyotakin in intau in Yohuda kon kotá tatua.