Read Mongondow YOSUA 16 Bible Online

YOSUA 16 - Mongondow bible

YOSUA 16

¹Botok mita in sigad in butá inta inogoi kon buí i Yusup, in pinangkoi kon Ongkag in Yordan kon diug in Yerikho, dotá in pomukaan kon bokaká mita in tubig in Yerikho nodapot kon padang gurun. Nongkon Yerikho, botok tatua in notakod nodapot kon Betel kon butá kon buḷud.

²Nongkon Betel, botok tatua in pinomoḷat ná Lus, pinongin Atarot, inta tampat pinogutunan in intau in Arki.

³Nongkon tua botok tatua pinobayá ná Toyopan kon butá in inanakan i Yaplet, nodapot kon Bet-Horon-Hilir, minayá nodapot kon Gezer, bo nopaḷuput kon Dagat Toyuak.

⁴Tuata in butá mita inta inogoi kon suku in Manasye bo Epraim, buí i Yusup, sin mobaḻí kapunyaan monia.

⁵Moiduduimai naa in sigad mita in butá inta inogoi kon motoḷuadí mita inta kon bonu in suku Epraim. Kon dotá in pomukaan, botok tonsigad in butá monia pinangkoi nongkon Atarot-Adar nodapot kon Bet-Horon-Hulu,

⁶bo minayá ná Dagat Toyuak. Mikhmetat in noiukat kon dotá in utuan. Kon dotá in pomukaannea, botok in sigad tatua nomurow pinobayá ná Taanat-Silo, bo sinumaḻib kon tua nongkon dotá in pomukaan nopobayá ná Yanoah.

⁷Nongkon tua botok tatua nosiḻig kon Atarot bo Naharat, bo nongin Yerikho sinimpodan kon Ongkag in Yordan.

⁸Kon dotá in toyopan, botok sigad in Epraim tatua pinangkoi kon Tapuah nodapot kon tapá in Ongkag in Kana, bo sinimpod kon Dagat Toyuak. Tuata in butá inta inogoi kon motoḷuadí mita nongkon suku Epraim, sin mobaḻí kapunyaan monia,

⁹noituot doman in tongonumai in kotá mointok bo ḻipú inta noiukat kon bonu in butá i Manasye.

¹⁰Táe suku Epraim diábí noguntun kon intau in Kanaan nongkon butá in Gezer. Tuamai nodapot kon tanaa mako intau in Kanaan nogutunpabí doman kon Gezer noyotakin in intau in Epraim, táe mosia pinakisa nogaid nobaḻí ata kon intau in Epraim.