Read Mongondow YOSUA 18 Bible Online

YOSUA 18 - Mongondow bible

YOSUA 18

¹Naonda in nopotungkud mako in butá inta pinodandi i TUHAN, bayongan umat in Israel noyosipun kon Silo, bo mosia noposindog in Ḷoḷaigan Koangoian i TUHAN.

²Pitupa nosuku in bangusa Israel in diá notarima kon tonsilai butá.

³Dá ki Yosua noguman kon umat in Israel, “Modapotpa in toonu in pogoḷatan monimu, bo bain tua moiko mayá ḻimitú kon butá inta inogoi i TUHAN, Allah in mogoguyangmu, kon inimu?

⁴Pomiḻídon kon intau tumototoḷu in kon batúan in suku. Potabákudon in mosia mayá monaridi kon bayongan in butá tanaa sin momais kon sigad mita in butá mita inta koibog monia mobaḻí kapunyaan monia. Mopaḷut mako kon tua, mosia in musti mobui mangoi kon inakó.

⁵Butá tatua in musti silaion pitu. Ki Yohuda in notantú bidon kon butánea kon dotá in toḷatan, bo ki Yusup in kon butánea inta kon dotá in utuan.

⁶Gambar in sigad in butá mita inta pitu notonsilai tatua in musti pomiaan, bo ogoi kon inakó. Bain pogonikku in undi[7] sin monotaau mongo onu in sinantú i Allah kon i monimu.

⁷Tongá suku in Lewi in diá motarima kon tonsilai butá moyotakin monimu, sin oaidan saḷaku imang mita inta mogundoi kon i TUHAN tuatadon in nobaḻí tonsilai kon i monia. Bo aka suku i Gad, i Ruben bo tongosilai in suku i Manasye, totuu kon mosia in notarimadon kon tonsilainea kon dotá in pomukaan kon Ongkag in Yordan. Ki Musa mogogundoi i TUHAN, ain nobogoi in butá tatua kon i monia.”

⁸Dá ki Yosua in nobogoidon in topotundú mita tanaa kon intau mita tatua, “Bayádon taridiai in bayongan butá tanaa bo pomiaaidon kon gambar takin sigadnea mita; onda intua angoidon bui kon inakó. Bain mopogonik in akuoi in undi kon naa kon Silo sin monotaau mongo onu inta sinantú i TUHAN kon i monimu.” Naonda in notarima mako kon topotundú mita tatua nongkon i Yosua, minayádon in mosia nonaridi kon butá tatua.

⁹Bayongan in butá tatua iḻibu monia, bo poḷat pinais monia in sigad mita in butá inta pitu notonsilai tatua bo poḷat doman pinais monia in kotá mita inta kon bonunea. Onda intua mosia nobui kon i Yosua kon pinononḷoḷaigan kon Silo.

¹⁰Bo nopogonik in undi in ki Yosua sin monotaau kon onu in sinantú i TUHAN kon i monia. Nopaḷut mako kon tua ki Yosua nobogoi in tonsilai butá kon batúan in suku bangusa Israel inta diápa nokouḻí kon tonsilai butá.

¹¹Tonsilai muna tuata inta noiḷabú kon motoḷuadí mita nongkon suku i Benyamin. Butá tonsilai monia tua in noiukat kon sigad in suku Yohuda bo butá in suku buí i Yusup.

¹²Kon dotá in utuan, sigad mita in butá monia pinangkoi kon Ongkag in Yordan, bo nopobayá ná sipangkoion mita in buḷud kon dotá in utuan kon Yerikho, onda intua nopobayá ná toyopan nongin buḷud nodapot kon butá in padang gurun Bet-Awen.

¹³Botok in pinosigadan tatua minayá doman ná sipangkoion in buḷud kon dotá in toḷatan Lus (inta sinangoian Betel), bo nosiḻig kon Atarot-Adar kon buḷud kon dotá in toḷatan Bet-Horon-Hilir.

¹⁴Nongkon dotá in toyopan kon buḷud tatua, botok sigad in butá tatua nomurow ná toḷatan nopobayá ná Kiryat-Baal (inta Kiryat-Yearim). Kiryat-Baal in kapunyaan in suku Yohuda. Tuata in botok sigad in butá tatua kon dotá in toyopan.

¹⁵Sigad mita kon dotá in toḷatan pinangkoi nongkon bingkí in Kiryat-Yearim bo minayá kon bokaká mita in tubig in Me-Neptoah,

¹⁶bo dongka nosiḻig kon sipangkoion in buḷud inta noyogintayow in Ḷopá in Hinom kon popod in utuan kon Ḷopá in Repaim. Onda intua botok in sigad tatua in nopobayá ná toḷatan nongin Ḷopá in Hinom kon dotá in toḷatan kon sipangkoion mita in buḷud kon butá in Yebus, nomoḷat nopobayá ná En-Rogel,

¹⁷nomurow ná utuan kon En-Semes, bo dongka nopobayá ná Gililot kon ḷoḷan in Pononakodan in Adumim. Nopaḷut mako kon tua botok sigad tatua nosiḻig kon Batu Bohan (Bohan in ki adí i Ruben),

¹⁸bodongka nongin dotá in utuan kon sipangkoion mita in buḷud inta noyogintayow in Ḷopá in Yordan, onda intua nosiḻig kon ḷopá tatua,

¹⁹nongin utuan kon sipangkoion mita in buḷud Bet-Hogla, bo sinimpod kon dotá in utuan kon Laut Mati kon minanga in Ongkag in Yordan. Tuata in sigad kon dotá in toḷatan.

²⁰Ongkag in Yordan nobaḻí sigad kon dotá in pomukaan. Natuata in sigad mita in butá inta inogoi kon motoḷuadí mita kon bonu in suku i Benyamin sin mobaḻí kapunyaan monia.

²¹Kotá mita inta nobaḻí kapunyaan in motoḷuadí kon bonu in suku i Benyamin, kobayongnea komintan in mopuḷú bodoyowá in kotá takin ḻipú mita kon diugneamai, tuata in Yerikho, Bet-Hogla, Emek-Kezis, Bet-Araba, Zemaraim, Betel, Haawim, Para, Opra, Kepar-Haamonai, Opni, bo Geba.

²⁵Bo mopuḷú doman bo opat in kotá noiduduimai naa takin ḻipú mita inta kon diugneamai, Gibeon, Rama, Beerot, Mizpa, Kepira, Moza, Rekem, Yirpeel, Tarala, Zela, Elep, Yebus (inta Yerusalem), Gibea bo Kiryat-Yearim. Tuata in butá mita inta inogoi kon motoḷuadí mita inta kon bonu in suku i Benyamin sin binaḻí kapunyaan monia.