Read Mongondow YOSUA 22 Bible Online

YOSUA 22 - Mongondow bible

YOSUA 22

¹Onda intua ki Yosua nogoiní kon intau mita nongkon suku i Ruben, i Gad bo tongosilai in suku Manasye inta kon dotá in pomukaan kon Ongkag in Yordan,

²bo noguman kon i monia, “Moiko ain nogaid kon bayongan yagi-yagi inta ain pinarenta i Musa, mogogundoi i TUHAN tua kon inimu. Bo moiko in dinumuduidon mita kon bayongan parentaku.

³Naa in kino oonggot diábí dodai in onda pinomayá mako monimu in tai utatmu mita, intau in Israel ibanea in mogaid tontaní. Moiko in ain totu-totuu dinumudui kon bayongan in parenta i TUHAN Allahmu.

⁴Dá podudui in dandi-Nea, ki TUHAN Allahmu ain nobogoi in kobiagan notompia kon i utatmu mita, intau in Israel ibanea. Dá, pobuidon in tanaa mako kon butámu tontaní kon dotá in pomukaan kon Ongkag in Yordan tatua inta inogoi i Musa kon inimu koḻipod.

⁵Bo ḷukadai sinbá moiko in umuran dumudui kon hukum inta pinarenta i Musa kon inimu, inta: Kotabi in ki TUHAN Allahmu, duduiaidon in koibog-Nea, duduiai in parenta-Nea mita, kosatia kon i-Nia bo posumbadon kon i-Nia takin ḻimbatú in ginamu bo takin bayongan in dimukudmu.”

⁶Onda intua ki Yosua nomarakat bo poḷat nopotabá kon i monia nobui minayá kon butá monia takin koyow, “Tanaa in moiko nobiagdon nooyúon bo moiko nobui takin nodia kon bobiagon nobarong, saḷaka, buḷawan, bitú, uatoi bo pakeang. Silai-silaidon doman in onu inta inagowmu tua kon parang kon intau mita tongosukumu ibanea.” Dá suku i Ruben, i Gad, bo suku i Manasye inta kon pomukaan kon Yordan tatua nonaḷámaidon kon intau in Israel ibanea, bo nobuat nongkon Silo kon Kanaan nopobayá in butá monia tontaní kon Gilead. Mosia nogutun kon butá tatua podudui in parenta i TUHAN pinongin i Musa. (Tongosilai in suku Manasye ain notarima kon butá nongkon i Musa, butá inta kon ḷoḷan in Ongkag in Yordan, bo tongosilai in suku Manasye ibanea in notarima nongkon i Yosua butá kon dotá in toyopan kon Ongkag in Yordan noyotakin in suku mita ibanea.)

⁷

⁸

⁹

¹⁰Naonda in suku i Ruben, i Gad, bo suku i Manasye kon dotá in pomukaan kon Yordan tatua nodapot kon Gelilot — kon dotápa in toyopan kon Ongkag in Yordan — mosia noposindogdon in mezbah tobatú inta moḷoben bo mogaga kon diug in ongkag.

¹¹Intau mita in Israel ibanea nokodongogdon kon tongobangusa monia in noguman, “Intau mita in suku i Ruben, i Gad bo i Manasye kon pomukaan kon Yordan ain noposindog in mezbah tobatú kon Gelilot kon diug in Ongkag in Yordan kon butá naton!” Dá mosia komintan in noyosipun kon Silo sin monubu kon suku mita in Israel inta kon dotá in pomukaan kon Ongkag in Yordan tatua.

¹²

¹³Bo ki Pinehas, ki adí i Imang Eleazar, pinotabá in umat in Israel minayá nokipodungkuḷ kon suku i Ruben, i Gad, bo i Manasye inta kon butá in Gilead kon Yordan kon pomukaan.

¹⁴Noyotakin i Pinehas minayá doman in mopuḷú in guhanga mita in ḻipú in bangusa Israel, — tumongo batu in kon tongo suku kon dotá in toyopan kon Ongkag in Yordan, mosia tua in tongguḷu in motoḷuadí kon bonu inanakan monia.

¹⁵Dá nodapotdon in mosia kon tampat in suku i Ruben, i Gad bo suku i Manasye kon butá in Gilead.

¹⁶Bo mosia nosingog nobaḻí toḻiu in bayongan in umat i TUHAN, mosia noguman kon intau mita inta nongkon suku i Ruben, i Gad bo i Manasye tatua, “Nongonu sin moiko in nogaid bidon kon inta moraat nanaa kon i Allah Israel? Takin nogaid kon mezbahmu tontaní, moiko in noḷawangdon kon i TUHAN! Moiko in diá bidon dinumudui kon parenta-Nea mita!

¹⁷Degá bo diádon kinotoropan monimu in dosa naton kon Peor? Kon tungkuḷ intua kita i hukum i TUHAN takin yampoi tobatú, umpakabí kita naa in umat-Nea tontaní! Nodapotpa doman in tanaa umuranpa doman in kita nobaba kon akibatnea. Diápa doman degá tugat intua?

¹⁸Bo tanaa, degá moibogdon bui in moiko monoḻikud kon i TUHAN? Aka singgai naa moiko moibog moḷawang kon i TUHAN, yo ikoḷom in Sia tumorúdon kon bayongan umat in Israel.

¹⁹Aka butámu tua nonajis bo diá patus baḻíon tampat poibadaan kon i TUHAN, dá pomampingdon mangoi kon butá i TUHAN, inta pinoposindogan in Ḷoḷaigan i TUHAN. Poigumdon kon tongosilai in butá nami, táe dikabí in moḷawang kon i TUHAN ande moḷawang kon inami takin modugang momia kon mezbah tobatú, bokaka koyongandon oyúon in mezbah i TUHAN Allah naton.

²⁰Torop, in ki Akhan ki adí i Zerah in doí dinumudui kon parenta i TUHAN soaḷ pakakat mita inta musti ḷoḷangon, bo onu in nobaḻí? Bayongan umat in Israel i hukum! Bokaka inta dinosa in tongábí ki Akhan, táe inta minatoi in deemanbí tongá sia-sia mita!”

²¹Bo intau mita in suku i Ruben, i Gad, bo suku i Manasye inta kon dotá in pomukaan tatua notubag,

²²“Inta Totok in Mokawasa tuata in ki TUHAN! Inta Totok in Mokawasa tuata in ki TUHAN! Kinotaauan-Neabí kon nongonubí sin kami in nomiabí kon natua, bo ibogon nami sinbá kotaauan doman monimu mongo nongonu sin pinomiabí nami in natua! Aka kuma bo pinomia nami intua sin moḷawang kon i TUHAN andeka kami in diádon mopirisaya kon i-Nia, dá pobiódon mako in kami matoi tanaa doman mako!

²³Ki TUHANdon tontaní in mohukum kon inami, aka kami in niat moḷawang kon i TUHAN bo moposindog in mezbah nami tontaní sin moposumba in kuruban payongon ande kuruban gandum ande kuruban yoyobayatan kon tudunea.

²⁴Deemanbí tua in niat nami, Utat mita! Kami in noposindog in mezbah tatua, popisíbí in mogagawang in kami dikabo kon singgai moiduduimai buí monimu in moguman kon buí nami, ‘Moiko in diábí kohubungan onu bo onu i TUHAN, Allah in Israel!

²⁵Indoiai, pinoukat-Nea in Ongkag in Yordan tanaa kon yua-yuak naton sin mopotondí kon inami bo kon i monimu intau mita i Ruben bo i Gad. Totuu kon moiko nion in diábí kohubungan takin i TUHAN.’ Dá onu in mobaḻí kon singgai moiduduimai? Notantú bidon kon buí monimu in momaḻídon kon buí nami mogogaidon moibada kon i TUHAN.

²⁶Dá kami in noposindog in mezbah, deemanbí pakéon mopokuruban in kuruban payongon ande sosumba mita nami ibanea,

²⁷táe mobaḻí tomponuot kon i naton posi botak, bo kon buí naton kon singgai moiduduimai, kon totuubí kon kami naa in noibadabí kon i TUHAN kon Ḷoḷaigan Koangoian-Nea takin kodia-dia in kuruban payongon, sosumba mita bo kuruban yoyobayatan. Takin natua buí monimu diádon in moguman kon buí nami in diá kohubungan takin i TUHAN.

²⁸Dá, niat nami in: aka kuma buí monimu in moguman natua, dá buí nami in motaaudon moguman, ‘Indoiai in mezbah tatua! Mogoguyang nami in noposindogdon in mezbah tobatú inta notombatangan in mezbah i TUHAN, deemanbí pobogoian kon kuruban payongon ande pobogoian kon sosumba, táe baḻíon tomponuot kon i naton posibotak.’

²⁹Popirisayadon, kami in doíbí moḷawang kon i TUHAN ande mogogai mogundoi kon i-Nia takin modugang kon mezbah ibanea sin pobogoian kon kuruban payongon ande kuruban gandum ande pobogoian kon sosumba, bokaka mezbah i TUHAN Allah naton oyúondon kon tayowon in Ḷoḷaigan koangoian i TUHAN.”

³⁰Bayongan in inta pinoguman in intau mita nongkon suku i Ruben, i Gad bo suku i Manasye kon dotá in pomukaan tatua dinongog i Imang Pinehas bo in guhanga mita in ḻipú intau in Israel inta mopuḷú nongkon dotá in toyopan kon Ongkag in Yordan. Dá nopiadon in gina monia in nokodongog kon tua.

³¹Dá guman i Pinehas, adí i Imang Eleazar, kon intau mita in suku i Ruben, i Gad bo i Manasye kon Pomukaan, “Naa bo kinotaauandon nami kon ki TUHAN nonakindon kon i naton, sin moiko in diábí noḷawang kon i-Nia. Moiko in noposaḷamatdon kon umat in Israel nongkon hukuman i TUHAN.”

³²Nopaḷut mako kon tua nobuatdon in ki Pinehas takin guhanga mita in ḻipú intau in Israel tatua. Mosia in nonaḷámaidon kon intau mita in Ruben bo Gad tatua kon Gilead, bo nobuidon kon Kanaan, onda intua nopotaau in pelekara tatua kon umat in Israel.

³³Dá nopiadon in gina in umat tatua in nokodongogmai kon tua, nodapot in mosia nodayow kon i Allah. Mosia in diá bidon nongonguman kon niat monia monubu kon intau mita in Ruben bo Gad, bo moyompat kon butá monia.

³⁴Imbuitnea mako suku in Ruben bo i Gad noguman, “Mezbah tanaa in mobaḻí sakusi kon i naton komintan kon ki TUHAN tua in ki Allah.” Dá sinangoian monia in mezbah tatua “Sakusi”.