Read Mongondow YOSUA 23 Bible Online

YOSUA 23 - Mongondow bible

YOSUA 23

¹Noonggot naonda in ki TUHAN nobogoi in kobiagan notompia kon umat in Israel; mosia in diá bidon sinuyayow in musung. Kon dodai intua ki Yosua nogoguyangdon totok.

²Dá inoinínea in bayongan umat in Israel, guhanga mita, itoi mita, hakim mita, bo porwira mita, bo noguman, “Akuoi naa in nogoguyangdon.

³Moiko in ain nokoontong kon bayongan inta inaidan i TUHAN Allahmu kon bayongan bangusa kon naa sin kopiaan monimu. Inta noparang noyotakin monimu in ki TUHAN Allahmubí tontaní.

⁴Butá mita in bangusa inta kinotaḷáanpa, ná doman tua in butá in bayongan bangusa inta ain sinaḷowku, tuata in butá inta nosimbanat nongkon dotá in pomukaan kon Ongkag in Yordan nopobayá ná toyopan nodapot kon Dagat Toyuak, bayongan intua aindon sinilaiku kon inimu sin mobaḻí kapunyaanmu.

⁵Ki TUHAN, Allahmu in mopoguntun bo monaḷow kon bangusa mita tatua, bo moḷagui in mosia kon i monimu aka moiko mayá monubu kon i monia. Mouḻí bidon monimu in butá monia, ná inta ain pinodandi i TUHAN Allahmu kon inimu.

⁶Tuamai, ḷukadai sinbá moiko in umuran dumudui bo mopobayá in bayongan inta pinais kon bonu in Buk Hukum i Musa. Dika ḻimimpat kon tobatúmai in hukum mita tatua.

⁷Aka natua dá moiko in diádon moyobauk in bangusa mita inta nogutunpa kon sigad monimu. Moiko in diábí monangoi kon tangoi in dewa mita monia ande mongibot podoyon kon tangoi tatua. Bo moiko in diábí doman moibada ande tumungkud kon tayowon in dewa mita tatua.

⁸Moiko in mustibí umuran mosatia kon i TUHAN, ná inta ain inaidan monimu dapot in tanaa.

⁹Bangusa mita inta moḷoben bo moropot aindon pinoguntun i TUHAN sin kopiaan monimu; diábí tobatúmai in nongkon i monia in mokotahang monayow kon i monimu.

¹⁰Intau tobatú nongkon sigad monimu mokotaḷowbí kon ribuan in intau, sin ki TUHAN Allahmubí in moparang kon kopiaan monimu, ná inta ain pinodandi-Nea.

¹¹Tuamai, in toropbí in motabi kon i TUHAN Allahmu.

¹²Aka moiko bo diá mosatia bo moyobaukdon in bangusa mita inta nogutunpa kon sigad monimu, bo moiko in motonibuḷoi monia,

¹³yo torop, kon notantú bidon kon ki TUHAN Allahmu in diábí mopoguntun in bangusa mita tatua sin kopiaan monimu. Sedang bo mosia tua in totokbí in mokobahaya kon i monimu, sin mosia tua in mobaḻídon naonda bo poyogaḷap kon i monimu. Pororigaandon totok monia in moiko; sin mosia in mobaḻídon naonda bo sambok kon ḻikudmu ande naonda bo dugi kon bonu in matamu. Moiko in umurandon mororiga modapot in diádon intau tobatúmai in kon sigad monimu in kotaḷáan kon butá inta mopia naa inta inogoi i TUHAN Allahmu kon inimu.

¹⁴Tanaa in wakutukudon matoi. Moiko komintan, in nonotaaudon totu-totuu kon ki TUHAN Allahmu ain nobogoi kon inimu in bayongan inta mopia inta pinodandi-Nea. Bayongan inta pinodandi-Nea ain inintompodan-Nea, diá tobatúmai in kinoḻiongan-Nea.

¹⁵Táe naonda in pinonompod-Nea kon dandi-Nea yo natua doman pogogaid-Nea kon onu inta pinogogondok-Nea kon i monimu.

¹⁶Aka moiko ḻimimpat kon dodandian inta ain pinarenta i TUHAN Allahmu kon inimu sinbá duduian, bo moiko mayá moibada kon toḻindua mita in Tuhan bo poḷat mosumba kon toḻindua mita in TUHAN tua, dá tumorú in ki TUHAN, bo mohukum kon i monimu. Diábí moonggot bo moiko komintan moyopú nongkon butá inta mopia naa, butá inta inogoi i TUHAN kon inimu.”