Read Mongondow YOSUA 24 Bible Online

YOSUA 24 - Mongondow bible

YOSUA 24

¹Ki Yosua nosipun kon bayongan suku bangusa in Israel kon Sikhem, bo nopotabá kon guhanga mita, itoi mita, hakim bo porwira mita namangoi in tayowonnea. Dá namangoidon in mosia kon tayowon i Allah.

²Onda intua ki Yosua noguman kon i monia komintan, “Indongogaipa onu inta pinoguman i TUHAN, Allah Israel kon inimu, ‘Tungkuḷ intua mogoguyangmu nogutun kon ḷoḷan in Ongkag in Eprat, bo nosumba kon dewa mita. Tobatú kon sigad monia tua tangoinea in ki Terah, ki amá i Abraham bo i Nahor.

³Bo Akuoi nogoiní kon i Abraham, mogoguyangmu tua, nongkon butá kon ḷoḷan in Ongkag in Eprat tatua, bo nopotabá kon inia noḻibu kon butá in Kanaan. Akuoi in nobogoi kon inia in buí mobayong. Dungkuḷ totok ki Ishak in inogoi-Ku kon inia,

⁴bo ki Ishak inogoian-Ku in adí doyowa, ki Yakub bo ki Esau. Buḷud in Edom in inogoi-Ku kon i Esau nobaḻí kapunyaannea, táe ki Yakub, mogoguyang monimu tua, in nomamping kon Mesir, noyotakin i adínea mita.

⁵Onda intua Akuoi nopotabá kon i Musa bo kon i Harun, bo nopoḷabú in bodito moḷoben kon butá in Mesir, bo pinoḷuai-Ku in moiko nongkon tua.

⁶Akuoi in nodia kon mogoguyangmu tua iḻumuai nongkon Mesir, bo intau in Mesir nondudur kon i monia takin kereta in parang bo tontara inta sinumakoi kon kabaḷo. Bo naonda in mogoguyang monimu nodapot kon Dagat in Gelagah,

⁷mosia in nokuani kon i-Nakó mopoigum in totuḷung. Dá tampat kon sigad monia bo in intau mita in Mesir tua binaḻí-Ku sinimindip, bo intau mita in Mesir tatua kinoḷoban-Ku in tubig in dagat nodapot in mosia noḷomot komintan. Kinotaauan bidon monimu komintan in onu inta inaidan-Ku kon intau in Mesir. Noonggot totok in mosia nogutun kon padang gurun.

⁸Bo dinia-Ku in moiko minayá in butá in intau Amori inta nogutun kon dotá in pomukaan kon Ongkag in Yordan. Mosia nonubu kon i monimu, táe pinountung-Ku in moiko nongkon i monia. Kinoagowan monimu in butá monia, bo iyopú-Ku in mosia.

⁹Bo ki datu in Moab, inta ki Balak adí i Zipor, noḷawang kon i monimu. Sia nopotabá in intau minayá kon i Bileam adí i Beor bo nopoigum sinbá ki Bileam mongutuk kon i monimu.

¹⁰Táe Akuoi in diábí dinumudui kon ibog i Bileam, dá binarakatannea in moiko. Natuata in pinogogaid-Ku noposaḷamat kon i monimu nongkon i Balak.

¹¹Onda intua moiko iḷumoḷan kon Ongkag in Yordan, bo nodapot kon Yerikho. Intau mita in Yerikho nonubu kon i monimu, natua doman intau in Amori, intau in Peris, Kanaan, Het, Girgasi, Hewi bo intau in Yebus. Táe Akuoi nopountung kon i monimu nongkon i monia komintan.

¹²Kon dodai in moiko mayá monubu kon i monia, pinopoḻingú-Ku in mosia bo pinopogonúan in ondok, nodapot in datu in Amori taya dua tua noḷagui nongkon i monimu. Deemanbí kedangmu bo deemanbí doman piotmu in nokopountung kon i monimu.

¹³Butá inta inogoi-Ku kon inimu, sinarima monimu intua takin diá irorigaanmai. Bo kotá mita inta inogoi-Ku kon inimu deemanbí moiko in noposindog intua. Táe tanaa moikodon in nogutun kon tua, bo moiko domandon in notarima kon bungai in anggur takin bungai in zaitunnea, bokaka deemanbí moiko in nopomuḷa.’ ”

¹⁴“Dá, tanaa,” ki Yosua noguman doman nanaa, “horomatonbí in ki TUHAN. Pogundoidon kon i-Nia takin gina motuḻid bo mosatia. Ḷumbúdon in toḻindua in Tuhan inta sinumba in mogoguyangmu koḻipod kon Mesopotamia bo Mesir. Tongádon ki TUHAN in pogundoian.

¹⁵Aka kuma bo moiko doí mogundoi kon i TUHAN, ponantúdon kon tosingogon in singgai naa doman ki ine in koibog monimu sumbáan: kon i ilah mita ibanea inta sinumba in mogoguyangmu kon Mesopotamia koḻipod ande kon ilah mita in intau in Amori inta butánea in pinogutunan monimu masai naa. Táe kami — akuoi bo tombonu in baḷoiku — in umuranbí mogundoi tongá kon i TUHAN.”

¹⁶Dá umat in Israel tatua notubag, “Kami in diábí mokoimontanmai in monaḷámai kon i TUHAN sin mayá mogundoi kon ilah mita ibanea!

¹⁷Ki TUHAN Allah natondon inta nopoḷuat kon mogoguyang naton bo kon inaton doman tontaní nongkon pinononggataan kon Mesir. Kita in nokoontongdon kon inta mokoherang mita inta pinomia i TUHAN. Ki TUHAN in umuranbí moḷukad kon i naton kon binayáan naton, sinumaḻib kon butá mita in intau mita ibanea.

¹⁸Bo naonda in kita sinumuot kon butá tanaa, ki TUHAN nopoguntun kon bayongan intau in Amori inta nogutun kon naa. Dá, kami in moibogbí mogundoi kon i TUHAN, sin Sia tuata in ki Allah naton!”

¹⁹Bo ki Yosua noguman, “Táe moiko in dikabo diá mokosanggup mogundoi kon i TUHAN, sin Sia tua in ki Allah inta mokudus, bo tongábí Sia in ki TUHAN. Sia in doíbí toḻinduaan. Aka moiko monaḷámai kon i-Nia bo mogundoi kon ilah mita ibanea, diá bidon ampungan-Nea in dosamu, sedang bo ḷawangon bo hukumon-Neabí in moiko. Yompaton-Neabí in moiko, umpakabí koḻipod in mopia in Sia kon inimu.”

²¹Dá intau mita in Israel tatua notubag, “Dia! Kami in diábí mogundoi kon ilah mita ibanea. Kami in mogundoibí tongá kon i TUHAN!”

²²Bo ki Yosua noguman, “Moikodon tontaní in nobaḻí sakusinea kon moiko ain nonimpod kon tosingogon kon tongábí mogundoi kon i TUHAN.” “Totuu,” tubag monia, “kamidon tontaní in sakusinea.”

²³“Aka natua, yo ḷumbúdon in ilah mita in bangusa ibanea inta nion kon inimu,” guman i Yosua, “bo podandidon kon moiko in mosatiabí kon i TUHAN, Allah in Israel.”

²⁴Bo intau mita tatua noguman kon i Yosua, “Kami in tongábí mogundoi kon i TUHAN, Allah naton. Kami in dumuduibí kon parenta-Nea mita.”

²⁵Dá kon singgai tatua kon Sikhem ki Yosua nomia kon dodandian takin umat in Israel; bo kon tua in sia nobogoi kon i monia in hukum bo atorang mita inta musti duduian monia.

²⁶Bayongan in hukum bo atorang mita tatua pinaisnea kon bonu in buk Hukum i Allah. Onda intua sia nogamá kon batu moḷoben tobatú, bo pinosindognea kon ḻimonag in kayu moḷoben kon tampat inta ain sinantú kon i TUHAN.

²⁷Nopaḷut mako kon tua ki Yosua noguman kon bayongan in intau kon tua, “Batu tanaa in mobaḻí sakusi naton. Bayongan in tosingogon inta siningog i TUHAN kon inaton, aindon siningog kon tayowon in batu tanaa. Dá batudon tanaa in mobaḻí sakusi kon i monimu, sin moponorop kon i monimu sinbá diá moḷawang kon i Allahmu.”

²⁸Nopaḷut mako kon tua ki Yosua nopotabádon kon intau mita tatua nobui; bo mosia nobuidon kon butá kapunyaan monia tontaní.

²⁹Noiduduimai kon tua ki Yosua adí i Nun mogogundoi i TUHAN tua, minatoi kon dodai in umurdon mogatut bo mopuḷú notaong.

³⁰Sia iḷobong kon butá kapunyaannea tontaní kon Timnat-Serah kon Buḷud in Epraim kon dotá in utuan kon Buḷud in Gaas.

³¹Kon dodai in ki Yosua nobiagpa, umat in Israel umuranbí nogundoi kon i TUHAN. Bo naonda in sia minatoi mosia in umuranbí doman nogundoi kon i TUHAN kon dodai in kon sigad monia tua oyúonpa in itoi mita inta ain nokoontong tontaní kon bayongan in yagi-yagi inta ain pinomia i TUHAN kon umat in Israel.

³²Tuḷan mita i Yusup dinia in umat in Israel nongkon Mesir, iḷobong kon Sikhem kon butá inta ain sinaḷui i Yakub mogatut in doit saḷaka nongkon i adí mita i Hemor, ki amá i Sikhem. Butá tatua pinononsilai kon buí i Yusup.

³³Onda intua ki Eleazar adí i Harun minatoi domandon, bo iḷobong kon Gibea, kotá inta noiukat kon buḷud i Epraim. Kotá tatua ain inogoi kon i Pinehas, adí i Eleazar.