Read Mongondow YOSUA 4 Bible Online

YOSUA 4 - Mongondow bible

YOSUA 4

¹Naonda in bayongan in bangusa tatua kon ḷoḷandon, ki TUHAN noguman kon i Yosua,

²“Pomiḻídon kon intau mopuḷú bodoyowá, tumongobatú in kon tongosuku.

³Pokigamaaidon in mosia kon batu mopuḷú bodoyowá nongkon yua-yuak in Ongkag in Yordan, kon tampat inta sinindogan in imang mita. Potabádon in mosia momotaan kon batu mita tatua modapot in tampat inta pononḷoḷaigan monimu naonda in doḷom.”

⁴Dá ki Yosua nogoinídon kon intau mopuḷú bodoyowá inta kinopiḻían tatua,

⁵bo noguman, “Bayádon kon yuak in Ongkag in Yordan, kon tayowon in Poti Dodandian i TUHAN Allahmu. Moiko tumpaḷa mogamá kon tumongo batu in batu nongkon tua — mopuḷú bodoyowá in kobayongnea podudui in kobayong in suku mita in bangusa Israel.

⁶Batu mita tatua in moponorop kon bangusa tanaa kon bayongan inta ain pinomia i TUHAN. Kon singgai moiduduimai aka ki adímu mita moḻibó mongo onu in mangaḻe in batu mita tatua kon inimu,

⁷dá moiko in musti moguman kon i monia kon tubig in Ongkag in Yordan nobontow kon dodai in Poti Dodandian i TUHAN dinia iḷumoḷan kon ongkag tatua. Batu mita tatua umuran moponorop kon bangusa Israel kon onu inta nobaḻí kon naa.”

⁸Taya mopuḷú bodoyowá tatua nogaidon kon onu inta pinarenta i Yosua. Pinodudui kon topotundú i TUHAN kon i Yosua, mosia nogamá kon batu mopuḷú bodoyowá kon yua-yuak in ongkag in Yordan — kobayongnea in ná doman kobayong in suku mita kon bangusa Israel — bodongka dinia monia kon tampat pinononḷoḷaigan monia.

⁹Kon yua-yuak doman in ongkag in Yordan tatua, ki Yosua nopoyoguntuḷ in batu mopuḷú bodoyowá noitongkaná kon tampat inta sinindogan in imang mita inta nomotaan kon Poti Dodandian tatua. (Batu mita tatua umuranpa doman oyúon dapot in tanaa mako.)

¹⁰Imang mita tatua umuranpabí sinimindog mako nodapot in intau mita tatua nopaḷut nogaid kon bayongan inta pinoki aid i TUHAN kon i monia pinongin i Yosua. Tua in noidudui kon topotundú mita i Musa kon i Yosua. Noḻikat in bangusa Israel iḷumoḷan kon Ongkag in Yordan.

¹¹Naonda in komintandon noiyaput kon ḷoḷan, imang mita inta nomotaan kon Poti Dodandian tatua minayá inumuna kon i monia.

¹²Podudui kon inta pinarenta i Musa, pojuang mita nongkon suku i Ruben, i Gad bo tongosilai in suku Manasye, munadon iḷumoḷan kon ongkag.

¹³Kobayong monia komintan tua in 40.000 in ḷoḷaki inta kodia-dia in pakakat in parang bo nosadiadon moparang kon tayowon i TUHAN, mosia iḷumoḷan nopobayá ná rata inta noompá kon diug in Yerikho.

¹⁴Kon singgai tatua ki TUHAN nomia kon soaḷ mita inta nopobaḻí kon bangusa Israel mohoromat kon i Yosua nobaḻí intau moḷoben. Kinoouput in kobiagannea mosia mohoromat kon inia ná pinohohoromat monia kon i Musa.

¹⁵Onda intua ki TUHAN nopotabá kon i Yosua

¹⁶momarenta kon imang mita inta nomotaan kon Poti Dodandian tatua sinbá ḷumuai nongkon Yordan.

¹⁷Inaidan i Yosua onu in pinarenta i TUHAN kon inia.

¹⁸Naonda in yaput in imang mita tatua kon bingkí in ongkag, tubig in ongkag tatua buidon noiḻig bo noiḻebetdon ná dungkuḷ.

¹⁹Umat in Israel nodapot kon ḷoḷan Ongkag in Yordan bo kon singgai noginpuḷú buḷan imitánea, bo mosia nononḷoḷaigan kon Gilgal kon dotá in pomukaan kon Yerikho.

²⁰Kon tua ki Yosua nopoyoguntuḷ in batu mopuḷú bodoyowá inta ginamá nongkon Ongkag in Yordan.

²¹Bo ki Yosua noguman kon umat in Israel, “Kon singgai moiduduimai aka ki adímu mita moḻibó mongo onu in mangaḻe in batu mita tanaa,

²²dá potaaudon kon i monia kon umat in Israel iḷumoḷan kon Ongkag in Yordan tanaa nongin butá inta noingkag.

²³Ouman kon i monia kon ki TUHAN Allahmu nopoingkag kon tubig in Ongkag in Yordan tatua sin bayáan monimu nodapot in moiko komintan noyaputdon kon ḷoḷan, naonda bo pinogogingkag-Nea kon Dagat in Gelagah sin bayáan nami,

²⁴sinbá bayongan in intau kon dunia monotaaudon kon nádomai tua in koḷoḷoben in kawasa i TUHAN. Bo bá moiko in umuran mohoromat kon i TUHAN Allahmu dapot in kopaḷutannea.”