Read Mongondow YOSUA 6 Bible Online

YOSUA 6 - Mongondow bible

YOSUA 6

¹Ḷoḻingkop in kotá mita in Yerikho totokdon in iḷukadan komintan bo iḻingkopan kinopira sinbá intau in Israel diá mokotuot. Diá tobatúmai intau in ogoi tumuot ande ḷumuai kon kotá tatua.

²Ki TUHAN noguman kon i Yosua, “Tanaa ogoi-Kudon kon inimu in Yerikho takin datu bo bayongan in rayatnea inta mongobarani tatua.

³Iko takin tontaramu in musti mopipid moḻibu kon kotá tatua muḷoi in singgai komintan kon bonu in onom nosinggai.

⁴Imang pitu, motukid in torompet, musti mayá kon muna in Poti Dodandian. Kon singgai noginpitu, iko takin tontaramu in musti moḻibu kon kotá tatua kopitu bo kon dodai doman intua imang mita musti mogirup kon torompetnea.

⁵Onda intua imang mita tatua musti mogirup kon torompetnea koonggoton. Naonda in kodongogan monimu in singognea inta moonggot tua, bayongan in tontara musti morogiow koropoton totok, dá dinding in kotá tatua in moumpagdon. Bo moiko komintan in baḷúdon tumuot kon kotá tatua.”

⁶Dá ki Yosua in nogoiní kon imang mita, bo noguman, “Buatdon in Poti Dodandian tatua; pitu nongkon sigad monimu in musti mayá kon munanea kodia-dia in torompet.”

⁷Bo ki Yosua nopotabádon kon tontaranea mita nopipid noḻibu kon kotá tatua, inunaan in pipidan in pongawal kon muna inta minayá inumuna kon Poti Dodandian i TUHAN.

⁸Pinodudui kon parenta i Yosua, nobuatdon in pipidan pongawal kon muna inumuna kon imang mita inta mogogirup kon torompet, dinuduian in imang mita inta nomotaan kon Poti Dodandian, bo sinimpodan in pipidan pongawal kon tumi. Koyogot in mosia minayá, torompet umuranbí inirup.

¹⁰Bayongan in tontara pinarentaandon kon diá morogiow bo diábí moposingo-singog aka diápa in ki Yosua mobogoi in parenta.

¹¹Natuata in pinogogator i Yosua kon tontaranea mita nodia kon Poti Dodandian noḻibu kon kotá tatua tosinggai in komintan, onda intua mobuidon kon pinononḷoḷaigan, bo mogogai kon tua.

¹²Nopoikoḷomai kon singgai, subupa totok, ki Yosua nobangon bo kon induaneadon in imang mita takin tontaranea mita nopipid noḻibu kon kotá tatua kon bonu in pipidan ná singgai dungkuḷ: Kon dungkuḷ totok in pipidan pongawal kon muna, dinuduian in imang pitu inta mogogirup kon torompet, bo dinuduian in imang mita inta nomotaan kon Poti Dodandian, bo sinimpodan in pipidan pongawal kon tumi. Bo torompet umuran inirup.

¹⁴Kon singgai nogindua mosia in noḻibudon bui kon kotá tatua komintan bodongka nobui kon pinononḷoḷaigan. Natuata in inaidan monia kon bonu in onom nosinggai.

¹⁵Kon singgai noginpitu mosia nobangon doḷo-doḷom kon dodai in mata in singgai bagu nomuká, bo nopipid noḻibu kopitu kon kotá in Yerikho tatua ná biasamai. Tongá kon singgai noginpitu tatua, mosia noḻibu dapot in kopitu.

¹⁶Naonda in noginpitu noḻibu, naonda in imang mita nogirup kon torompet monia, ki Yosua nobogoi in parenta kon bayongan in tontara sinbá morogiowdon totok. Ki Yosua noguman, “Ki TUHAN ain nobogoi in kotá tanaa kon inimu!

¹⁷Bayongan in kotá takin tombonunea musti daiton monimu payongon mobaḻí sosumba kon i TUHAN. Tongá ki Rahab, bobay sundaḷ takin ginaḷumnea in pomayádon mako in mobiag, sin sia in notuḷungdon kon toimata mita naton.

¹⁸Diábí in motaau mogamá kon onuka inta musti payongon. Aka mogamá in moiko kon tua, dá pinononḷoḷaigan in Israel koantugan in bodito.

¹⁹Bayongan in pakakat saḷaka, buḷawan, tambaga bo uatoi musti ogoi kon i TUHAN, bo musti tagúon kon bonu in tampat pototagúan kon kapunyaan i TUHAN.”

²⁰Bo imang mita nogirupdon kon torompetnea. Bo naonda in kinodongogan in intau mita in Israel in torompet tatua, mosia norogiow noropot totok, bo dinding in kotá in Yerikho norumbun. Bayongan in tontara in Israel baḷúdon noponik, bo sinumuot in kotá tatua bo nogagow.

²¹Bayongan intau kon kotá tatua, noguod noguyang, ḷoḷaki bobay, komintan iḻimod in pitow. Bayongan in bobiagon sapi, domba bo keledai sinoko ḻimod doman.

²²Bo kon intau doyowa inta ain nobaḻí toimata, ki Yosua noguman, “Bayádon kon baḷoi in bobay inta sundaḷ tatua, bo diádon in sia ḷumuai moyotakin in ginaḷumnea ná inta ain pinodandi monimu kon inia.”

²³Dá toimata doyowa tatua in minayádon, bo nodia kon i Rahab iḻumuai noyotakin i amá bo i inánea, i utatnea mita, bo ginaḷumnea mita ibanea. Komintan ginaḷum i Rahab takin bobantung mita monia in dinia iḻumuai minayá in tampat inta moaman kon diug in pinononḷoḷaigan in Israel.

²⁴Onda intua tontara in Israel nonurubdon kon bayongan kotá tatua takin bayongan in tombonunea, koḻikudbí in buḷawan, saḷaka, tambaga bo uatoi. Pakakat mita tatua ginamá monia bo dinia kon tampat pototagúan kon kapunyaan i TUHAN.

²⁵Táe ki Rahab bobay sundaḷ tatua takin bayongan ginaḷumnea in pinomayádon mako i Yosua nobiag, sin sia in notuḷungdon kon toimatanea doyowa inta pinotabánea namangoi in Yerikho. (Dapot in singgai in naa buí i Rahab oyúonpabí in kon Israel.)

²⁶Kon dodai intua ki Yosua nopoḷuai in parenta nanaa, “Ki inekabí in moḷongasi moposindog bui in kotá in Yerikho tanaa, yo kotugatan in kutuk i TUHAN. Ki ine in momia kon datoḷannea yo kopatoianbí in adínea guya-guyang; bo ki ine in mopoguḻit in ḷoḻingkopnea mita yo kopatoianbí in adínea muit.”

²⁷Ki TUHAN umuran kotaki-takin i Yosua, bo tangoi i Yosua kino tango-tangoiandon kon butá tatua.