Read Mongondow YOSUA 7 Bible Online

YOSUA 7 - Mongondow bible

YOSUA 7

¹Ki TUHAN ain nomarenta kon umat in Israel kon nongkon bayongan onu inta kon kotá in Yerikho inta musti payongon, tobatúmai yo diábí in motaau gamáan. Táe parenta tatua diábí dinuduian. Ḷoḷaki tobatú inta ki Akhan in tangoinea iḻimimpatdon kon parenta tatua, dá ki TUHAN in sinumorúdon totok kon umat in Israel. (Ki amá i Akhan naa tangoinea in ki Karmi bo ki akinea in ki Zabdi nongkon inanakan i Zerah kon bonu in suku i Yohuda.)

²Kon dodai intua ki Yosua nopotabá in tongonumai in intau nongkon Yerikho minayá in Ai, kotá tobatú kon dotá in pomukaan kon Betel, kon diug in Bet-Awen. Intau mita tatua pinotabá pinoki taridian in butá tatua. Naonda in mosia nobui nongkon oaidan tatua,

³mosia nopotaau kon i Yosua. Mosia noguman, “Dikadon in kita mayá komintan monubu kon Ai. Potabádon in doyowa ande toḷu noribu in intau. Dika daiton potabá in tontara mayá intua moparang, sin nointokbí in kotá tatua.”

⁴Dá minayádon in tontara toḷu noribu bo nonubu kon kotá tatua, táe sinaḷow in mosia bo poḷat noḷagui.

⁵Intau mita in Ai nondudur kon i monia nongkon ngara in kotá in Ai nodapot kon butá pongongaḻian kon buḷawan, bo noḻimod kon degá toḷu nopuḷú bo onom in intau kon sigad monia kon oyukmai in buḷud. Dá intau mita in Israel inangoiandon in ḻia-ḻiaw in gina bo ondok.

⁶Noajar totok in gina i Yosua bo gina in itoi mita in umat Israel dá mosia nomera-merakdon kon pakeang monia, bo kino ouputdon in singgai dapot in doḷom mosia sinumungkud kon tayowon in Poti Dodandian i TUHAN poḷat nopoinggú in ḷobud kon uḷu monia nobaḻí tompoingat kon noajar totok in gina monia.

⁷Ki Yosua noguman kon i TUHAN, “O Allah TUHANku! Onu in mangaḻe in pinodiaan-Mu kon inami nodapot kon ḷoḷan in Yordan? Yo degá tongábí mobogoi kon inami kon intau mita in Amori? Sinbá matoi in kami? Mopia-piabí kon nogutun kon ḷoḷan in Yordan in kami!

⁸O TUHAN! Sinaḷowdon in musung in intau mita in Israel. Yo onu in singogonku in tanaa?

⁹Intau in Kanaan bo bayongan intau ibanea kon butá tanaa in mokodongogdon kon tua. Ḻibutandon monia bo ḻimodon in kami komintan! Yo onu in pomiaan-Mu sinbá tangoi-Mu in umuran horomaton?”

¹⁰Ki TUHAN noguman kon i Yosua, “Pobangon! Diábí in mangaḻe in tungkudanmu mako kon butá naníon!

¹¹Intau in Israel nogaidon kon dosa. Akuoi ain nomarenta sinbá mosia mokopotoindudui kon dodandian-Ku takin i monia, táe iḻimpatan monia intua! Barang mita inta musti payongon aindon ginamá monia. Mosia nonakow bo binuni monia kon sigad in pakakat mita monia sinbá diá kotaauan.

¹²Tuamai in mosia diá mokotongkod kon musung. Mosia sinaḷow in musung sin mosia tontaní aindon pinopoḷabúan in hukuman sin yopúon. Diá bidon takinan-Ku bui in moiko, aka barang mita inta diá motaau gamáan tatua diápa payongon.

¹³Pobangondon in tanaa, Yosua! Potusidon in umat in Israel bo potabádon in mosia mosadia tumayow kon i-Nakó. Parentaaidon in mosia mosadia in ikoḷom, sin Akuoi ki TUHAN Allah in Israel in mopotaau in naa kon i monia: ‘Ei intau mita in Israel! Barang mita inta ain pinoki payong-Ku kon i monimu, oyúonpa in kon i monimu. Aka diápa ḷumbúon monimu in barang mita tatua, yo diábí in moiko mokotongkod kon musung!’

¹⁴Tuamai, Yosua, potaaudon kon i monia kon ikoḷom doḷo-doḷom mosia in tokopirikisaan kon batúan in suku. Aka tundúon-Ku in suku tobatú, dá bayongan inanakan kon bonu in suku tatua musti mamangoi in muna tumongo inanakan. Bo aka Akuoi motundú kon toinanakan, dá bayongan motoḷuadí kon inanakan tatua mamangoi in muna tumongo motoḷuadí. Bo aka Akuoi motundú kon motoḷuadí tobatú, dá kon batúandon intau in mamangoi.

¹⁵Bo ki ine inta noniatadon kon ain notagú kon barang inta ilarang tatua dá mustidon tubáan kopayongon moyotakin in motoḷuadínea bo bayongan kapunyaannea; sin siadon tuata inta iḻimimpat kon dodandian bo nomiadon kon moraat moḷoben kon yua-yuak in umat in Israel.”

¹⁶Nopoikoḷomai kon singgai, subupa totok, ki Yosua nopotabádon kon umat in Israel namangoi in muna, tumongo suku, dá sukudon i Yohuda in kinotugatan.

¹⁷Bo ki Yosua nogoiní kon suku in Yohuda namangoi in muna, tumongo inanakan, bo inanakan i Zerahdon in kinotugatan. Onda intua inanakan i Zerah inoiní namangoi in muna, namangoi tumongo motoḷuadí, bo motoḷuadídon i Zabdi in kinotugatan.

¹⁸Onda intua ki Yosua nogoiní kon motoḷuadí i Zabdi namangoi in muna, tumongo batu; dá ki Akhan, ki adí i Karmi, ki ompu i Zabdi in kinotugatan.

¹⁹Ki Yosua noguman kon i Akhan, “Adíku, pongakudon bo pogumandon kosilang kon naa kon tayowon i TUHAN, Allah in Israel, onu inta ain inaidanmu. Potaaudon kon inakó, dikadon bunion.”

²⁰“Totuu,” guman i Akhan, “Akuoi ain nogaid kon dosa kon i TUHAN, Allah in Israel. Naa in inaidanku:

²¹Kon sigad in barang mita inta inagow naton, akuoi nokoontong kon jubah tobatú inta totuu mogaga, pinomia in Babilonia, bo saḷaka doman mita doyowa nokilo, bo buḷawan tobatú noiḻiu kon tobotak in kilo. Moibog totok in akuoi in barang mita tatua, dá ginamáku bo iḷobongku kon butá kon ḷoḷaiganku; saḷaka in kon ḻimonag totok.”

²²Bo iḻimikatdon in ki Yosua nopotabá in intau minayá in ḷoḷaigan i Akhan. Bo noniata magí dá barang mita inta ilarang tatua komintan kon tua, binuni kon bonu in butá, bo saḷaka in kon ḻimonag totok.

²³Ginamá monia in barang mita tatua bo dinia kon i Yosua bo kon bayongan intau in Israel. Bo barang mita tatua inukat kon tayowon i TUHAN.

²⁴Onda intua ki Yosua bo bayongan umat in Israel nodomokdon kon i Akhan, bo dinia pinobayá in Ḷopá in Roriga pinoyotakin i adínea mita, sapinea, keledai, domba, ḷoḷaigan, bo bayongan in kapunyaannea takin saḷaka, jubah bo buḷawan inta sinakownea.

²⁵Bo ki Yosua noguman kon i Akhan, “Nongonu sin iko in nopoangoibí in roriga kon inaton? Tanaa ki TUHAN mopoangoidon in roriga kon inimu!” Dá ki Akhan takin mosia motoḷuadínea inarabdon in bayongan umat in Israel in batu nodapot in minatoi. Komintan kapunyaannea, bo barang mita inta sinakownea nodaitdon sinubá nodapot in nopayong komintan.

²⁶Nopaḷut mako kon tua binumbunandon monia in tampat tatua in batu inta mobarong totok bo dapot in tanaa oyúonpa doman intua. Tuamai in tampat tatua in sinangoianpa Ḷopá in Roriga. Dá noobotdon in torú i TUHAN.