Read Mongondow TESALONIKA 2 1 Bible Online

TESALONIKA 2 1 - Mongondow bible

TESALONIKA 2 1

¹Utatku mita jamaat inta kon Tesalonika, inta ain nobaḻí umat i Allah ki Amá naton bo umat i Tuhan Yesus Kristus! Kami toḷu, ki Paulus, ki Silas bo ki Timotius

²in umuran mopoigum mako in doa sinbá ki Allah ki Amá naton bo ki Tuhan Yesus Kristus mobogoi in barakat bo kobiagan motompia kon i monimu komintan.

³Nobaḻí bidon kowajiban nami mopoyaput in sukur kon i Allah lantaran moiko. Oo patusbí intua aidan nami sin pirisaya monimu kon i Kristus in tantú kodugang-kodugang bo tabi monimu kon tumpaḷa intau in moḷoben domandon.

⁴Tuamai moiko in umuran oumanon nami kon jamaat mita inta kinobayáan nami. Mosanang totok in gina nami in mongonguman kon soaḷ kororoton in pirisaya monimu kon i Kristus, umpaka pogutúon bo koantugan in roriga.

⁵Bo noniatadon kon naa kon moadilbí totok in pononantú i Allah: Lantaran moiko bo nobiagdon nororiga sin popisí noramuji tumuot kon Dunia Mobagu i Allah, dá moiko in patusdon tumuot kon dunia tatua.

⁶Onu inta irai i Allah moadil dá tua in aidan-Nea, bo tuḻían-Nea in intau inta mopoyoyigamai kon i monimu.

⁷Bo kon inimu inta tanaa mako noyoyiga — natua doman in kon inami — ki Allah in monginggamábí kon roriga tatua kon singgai ki Tuhan Yesus moponag nongkon soroga bo mokipogontong takin malaekat-Nea mita inta mongotorindog

⁸bo takin tuḷú inta kodoko-dokot. Sia in mamangoi mohukum kon intau mita inta diá mopirisaya kon i Allah bo inta doí mokidongog kon Habar Mopia i Yesus Kristus ki Tuhan naton.

⁹Mosia naa inta motarima kon hukuman mokoyoyang modapot in kopaḷutannea bo ḷumbúon koyayúon nongkon tayowon i Tuhan bo nongkon kawasa-Nea inta moḷoben;

¹⁰tua komintan in mobaḻí kon singgai koangoian-Nea kon wakutu in poḷantudon in umat-Nea in Sia bo horomaton in bayongan intau inta mopirisaya kon i-Nia. Moiko nion in moyotakinbí doman in umat mita i Allah tatua sin moiko in nopirisaya kon habar inta pinoyaput nami kon i monimu.

¹¹Tuamai in tantú sambayangan nami in moiko. Umuran poigumon nami sinbá baḻíon i Allah umat-Nea in moiko, umat inta patus mobiag podudui in koibog-Nea; tuabí in mangaḻe in pinogoinían-Nea kon i monimu. Igumon mako tua ki Allah takin kawasa-Nea in mogintompod kon ibog monimu mogaid kon inta mopia, mogintompod doman kon bayongan oaidan inta inaidan monimu pinodoyon kon pirisaya kon i Kristus.

¹²Aid monimu tatua aindon nopoḷantud kon i Tuhan naton ki Yesus Kristus, sahingga in moiko in poḷantudon doman i Tuhan Yesus lantaran pia in gina i Allah naton bo i Tuhan[1] Yesus Kristus.