Read Mongondow TESALONIKA 2 2 Bible Online

TESALONIKA 2 2 - Mongondow bible

TESALONIKA 2 2

¹Soaḷ koangoian i Yesus Kristus Tuhan naton, bo soaḷ posipunan kon i naton sinbá mogutun takin-Nea, naabí in totok poigumonku tanaa kon i monimu:

²Sinbá diá in moiko baḷú motoboḻingo bo moḻia-ḻiaw in gina sin mokodongog kon naadon in singgai koangoian i Tuhan bui. Degá habar tatua nongkon habar inta pinopogonú i Allah andeka tongábí nongkon totundú in intau, andeka oyúon doman in noguman kon soaḷ mita tatua in nokoimontandon in pinais nami kon surat nami.

³Naondakadon in habar dinongog monimu, yo donaaibí baḷú kopongaruan monia in moiko, sin tongábí uboḷ i monia inta moibog mopongaru kon intau ibanea. Sinbá kotaauandon monimu, kon wakutu in diápa moiangoi in singgai tatua, munapabí nanaa in mobaḻí: Mobayong in intau mobaḷui in pirisaya bo monaḷámai kon i Kristus; bo intau moraat inta ain sinantú tumuot kon naraka in mamangoidon mopoontong in oaid monia.

⁴Takin kaḷakuang sia in moḷawang bo dumodia kon bayongan inta sinumba in intau, ande bayongan ilah inta inanggap in intau ki Allah. Modapot in sia ḻimitú kon bonu in Baḷoi i Allah bo mongaku kon sia tua kain in ki Allah.

⁵Toropbí kon nodaitku bidon pinoguman intua komintan wakutu in akuoi koyota-yotakinpa monimu.

⁶Bo kinotaauanbí monimu in onu in tanaa moḷamboipa mako kon kobaḻían tua komintan. Aka moidapotdon in wakutu inta sinantú i Allah yo moiangoibí in intau moraat tatua.

⁷Ropot inta mogaid kon moraat tatua in momangkoidon umuni-uni mogaid, táe sinaha-tahangpa mako. Bain aka poyayúondon in intau inta monahang tatua,

⁸bain tua bo koontongandon in intau moraat tatua. Sahingga in aka ki Tuhan Yesus mamangoi yo ḻimodon-Nea in intau moraat tatua takin tompot inta pogirup-Nea, bo yoyangon-Nea wakutu in Sia mamangoi takin kamuliaan-Nea.

⁹Intau moraat tatua in mamangoi takin kawasa moḷoben nongkon Ibilis. Intau tatua in mogaid doman kon bayongan oaidan inta mokoherang bo inta mongotoyang táe nopuḻing in uboḷ.

¹⁰Bayongan akaḷ inta moraat pakéonnea mopoyaying kon intau mita inta mongoputú. Mongoputú in mosia sin doí motarima bo doí doman kon habar mopia inta nongkon i Allah inta mokosaḷamat kon i monia.

¹¹Tuamai popoangoian i Allah in tobatú kawasa inta mokopoyaying kon i monia, sinbá mopirisaya in mosia kon soaḷ inta diá totuu.

¹²Pangabisannea bayongan in intau inta moibog mogaid kon dosa bo inta diá mopirisaya kon inta totuu bo tongá moibog kon inta moraat in daiton toko hukumon.

¹³Utatku mita inta kinotabi i Tuhan! Kami in musti umuran mopoyaput in sukur kon i Allah popisí in moiko, sin nongkon pinomangkoianpabímai piniḻídon i Allah in moiko sin posaḷamaton.[2] Kasaḷamatan inta inaidan in Roho i Allah kon i monimu sinbá moiko in baḻíon umat i Allah inta mokudus sin mopirisaya in moiko kon habar inta mobanar nongkon i Allah.

¹⁴Tuata in mangaḻe pinogoinían i Allah kon i monimu inta pinodoyon kon pirisaya kon habar mopia inta pinoyaput nami kon i monimu. Ki Allah in nogoiní kon i monimu sin ibogon-Nea mokorasa in moiko kon kokokawasa i Tuhan naton ki Yesus Kristus.

¹⁵Tuamai, utat mita, sindogdon koroton bo umuran kadaiai in totundú mita inta mobanar inta ain pinoyaput nami kon i monimu, pinomayá inouman ande inta pinais.

¹⁶Poigumon mako ki Yesus Kristus Tuhan naton bo ki Allah ki Amá naton in umuran mopoonow bo moginrigon kon gina monimu, sinbá motaau in moiko mogaid bo mopohabar kon onu inta mopia. Motabibí in ki Allah kon i naton, bo lantaran Sia in mopia dá pinomia-Nea in kita umuran mosabar bo moharap mako kon inta mopia.