Read Mongondow TIMOTIUS 1 1 Bible Online

TIMOTIUS 1 1 - Mongondow bible

TIMOTIUS 1 1

¹Timotius, adíku kon bonu in pirisaya kon i Tuhan! Surat tanaa in nongkon inakó, ki Paulus inta nobaḻí rasul i Yesus Kristus podudui in ibog i Allah, inta Mopoposaḷamat naton, bo podudui in parenta i Yesus Kristus oandoḷan kobiagan naton. Poigumon mako tua, ki Allah ki Amá naton bo ki Yesus Kristus, ki Tuhan naton in umuran mobogoi in barakat, totabi bo kobiagan motompia kon inimu.

³Wakutu in akúon mayádon in Makedonia, pinakisakudon in iko sinbá umuranpa mogutun kon Epesus. Kon tua iko in mayá mononggina kon intau mita inta motundúmai kon soaḷ mita inta nongoitaḷá, sinbá gogaiandon monia in aid mita ná tatua.

⁴Poguman kon i monia kon donaaibí tongá umuran monarukiramai kon ouman mita inta diá totuu bo soaḷ ouman kinobaḻian inta diá in gogainea. Tua komintan in tongábí mokopomuká kon ropatoi inta diá in baragunanea bo deemanbí inta mokobiag motompia podudui in kasaḷamatan inta inogoi i Allah kon intau inta mopirisaya kon i-Nia.

⁵Akuoi in mononggina nanaa sinbá intau kopakéandon in gina modarit motuḻid bo totu-totuudon mopirisaya kon i Tuhan, sahingga in oyúondon in totabian kon tumpaḷa intau.

⁶Sin oyúon intau in diádon nobiag natua, bo dongkadon tantú mobobayowan kon soaḷ inta diá in baragunanea.

⁷Mosia tua inta moibog totok mobaḻí mototundú kon hukum i Musa bokaka mosia tontaní in diábí doman momangaḻe kon onu inta siningog ande sinundú monia tua.

⁸Kinotaauan bidon naton kon hukum i Musa tua in mopirabí aka aidan podudui kon onu inta sinundú.

⁹Tantú mustibí kotaauan naton kon hukum i Musa in pinomia deemanbí pinopomakusud kon intau mita inta mopia, táe kon i moniabí inta moibog momaḷawang kon hukum, kon i monia inta moraat, kon i monia inta diá mopirisaya kon i Tuhan, kon i monia inta umuran mogaid kon inta noitaḷá, kon i monia inta tongá umuran morai kon in dunia naa, kon i monia inta diá nonotaau in agama, kon i monia inta moḷoḻimod kon guyanga ḷoḷaki bo bobay, bo inta kino ḻimo-ḻimodnea kon intau,

¹⁰pinopomakusud doman kon i monia inta mokotor in oaid, kon i monia inta mongibog kon tumpaḷa ḷoḷaki, kon i monia inta banselang, kon i monia inta mongouboḷ bo kon i monia inta umuran mongonguman kon diá totuu, bo oaid mita inta diá kinoibog in totundú inta mobanar.

¹¹Totundú tatua in pinaisdon kon bonu in habar mopia inta pinoki poyaput magí-mako i Allah kon inakó, tuata in Habar Mopia inta nongkon i Allah inta moḷoben bo inta patus dayowon.

¹²Akuoi in mosukur kon i Kristus Yesus Tuhan naton, sin akuoi in inogoian-Neadon in ropot mogaid kon oaidan-Nea, bo inanggap-Neadon in akuoi patus pokiaidan in oaidan tatua,

¹³umpakabí tungkuḷ intua akuoi naa in umuran moponapud in diá totuu bo momogutú poḷat doman moningkuḻe kon i-Nia. Táe sinotabibí i Allah in akuoi, sin dodai intua akuoi in diápa mopirisaya, sahingga in diábí kinotaauanku onu in pinomiaku tatua, noitutui ande noitaḷá.

¹⁴Bo moḷobenbí totok in totabi i Tuhan naton kon i nakó. Inogoian-Nea in akuoi in pirisaya moḷoben bo tabi kon tumpaḷa intau inta ain notobatú i Kristus Yesus.

¹⁵Totuubí in singog tanaa, tuamai in patusbí tarimaan bo pirisayaan komintan: “Kon ki Kristus ain namangoi in dunia naa sin moposaḷamat kon intau baradosa.” Bo akuoibí naa in intau inta totok in binaradosa bo inta totok doman in moraat.

¹⁶Táe popisíbí in kaadaanku natua, dá sinotabi i Allah in akuoi bo bá moniatadon in kososabar i Kristus Yesus kon inakó, intau inta totok in binaradosa. Bo naadon in mobaḻí contoh kon bayongan in intau inta aka mopirisayadon kon i-Nia bo inta mokouḻí kon kobiagan mopia bo mononoi.

¹⁷Ki Allahbí tua in Datu inta nongkon pinomangkoianmai modapot in kopaḷutan in dunia naa, inta patus horomaton bo dayowon sin tongábí Sia in Allah inta mononoi, inta diá koontongan bo inta totobatú! Amin.

¹⁸Timotius, adíku! Oaidan tanaa in inogoiku kon inimu pinodudui kon koyow i Allah inta ain pinoyaput in nabi mita kon jamaat soaḷ iko. Baḻídon baḷunmu in koyow i Allah tatua in mogaid kon bayongan oaidan inta mopia. Poramuji totu-totuu takin umuran kumadai kon inta moitutui bo paké in gina motuḻid bo modarit.

¹⁹Sin oyúondon in intau inta doídon dumudui kon ibog in ginanea inta mopia bo modarit, sahingga in nogoguyaatdon in pirisaya monia.

²⁰Kon sigad monia tua in ki Himeneus bo ki Aleksander. Taya dua tua in pinosarakankudon kon Ibilis, sinbá mosia mobalajardon mogogai in mohojat kon i Allah.