Read Mongondow TIMOTIUS 1 3 Bible Online

TIMOTIUS 1 3 - Mongondow bible

TIMOTIUS 1 3

¹Totuubí in singog tanaa: “Intau inta moibog mobaḻí itoi kon jamaat, yo sia tua in moibog in oaidan inta totok in mopia.”

²Tuamai intau inta mobaḻí itoi kon jamaat in mustibí intau inta motuḻid in gina, tongá tobatú in ki buḷoinea,[2] mokokawasa kon ibog in gina, mobijaksana, mopia in oaid, moibog motuḷung kon bayongan in intau bo motaau motundú kon inta mopia kon intau ibanea;

³donaaibí in intau inta umuran moḷoḷangu, ande intau inta moibo-ibog moropatoi, táe intaubí inta moaḷus in dodia bo pososingognea bo inta moibog doman in dodamean, bo diá dinoit.

⁴Sia in musti motaau monompia kon tombonu in baḷoinea, motaau modidik kon i adínea mita sinbá motoindudui bo mohoromat kon inia.

⁵Sin aka intau tatua diá motaau monompia kon tombonu in baḷoinea tontaní, yo naondabí in sia monompia kon jamaat i Allah?

⁶Intau inta mobaḻí itoi kon jamaat, in deemanbí intau inta bagu nopirisaya kon i Kristus, sin dikabo mobaḻí in sia mokaḷakuang, sahingga in kutukon ná Ibilis koḻipod.

⁷Musti mopia in tangoinea kon tayowon in intau mobayong sin aka diá mopia yo singkuḻeonbí in bayongan intau sahingga in kokawasaandon in Ibilis in sia.

⁸Natua doman in mobobantung mita in jamaat, mustibí in mosia intau inta mopia bo mojujur; diá dinoit bo diá umuran monginum kon inta mokoḷoḷangu.

⁹Takin gina modarit bo motuḻid mosia in musti umuran kumadai kon totundú inta pinirisaya in intau Keresten inta ain pinoniata i Allah.

¹⁰Munapa ujion in mosia tua. Aka kotaauandon kon motuḻidbí in gina monia, bain tua bo motaau in mosia mobantung kon jamaat.

¹¹Ná doman tua, ki buḷoi monia bobay[3] in mustibí intau mopia deemanbí intau inta maya-mayá mako mongonguman kon uboḷ. Mosia in mustibí intau inta mokokotahang kon bibig bo motaau doman pirisayaanmai kon bayongan in yagi-yagi.

¹²Intau inta mobaḻí mobobantung kon jamaat, mustibí tongá tobatú in ki buḷoinea.[4] Bo musti doman motaau modidik kon i adínea mita bo mopia monompia kon kobobiag in tombonu in baḷoinea.

¹³Intau mita inta mopia in pobobantung monia kon jamaat, horomatonbí bo mobaranidon totok in mongonguman kon pirisaya monia kon i Kristus Yesus.

¹⁴Igumonku mako tua, diádon moonggot in akuoi bo mayá mokipodungkuḷ kon inimu. Umpakabí natua, táe akuoi in nomaispabí kon surat tanaa kon inimu,

¹⁵sinbá aka akuoi diápa ḷagi moiangoi, yo kotaauanmudon naonda in kobobiag naton saḷaku ki adí mita i Allah, mangaḻenea kon naa jamaat i Allah inta nobiag. Jamaat tanaa inta nobaḻí oigi pinonuḻid bo dumodudui kon totundú inta totuu nongkon i Allah.

¹⁶Diábí tobatúmai in motaau momayow, kon moḷobenbí totok in onu inta noibunipa kon agama naton naa: Sia namangoi in dunia naa sinumon rupa intau, bo inakubí in Roho i Allah[5], bo inontong in malaekat mita. Habarnea pinowayadon kon sigad in bayongan bangusa, bo Sia in pinirisaya in bayongan intau kon dunia naa poḷat sinintak namonik in soroga.