Read Mongondow TIMOTIUS 1 6 Bible Online

TIMOTIUS 1 6 - Mongondow bible

TIMOTIUS 1 6

¹Intau mita in Keresten inta nobaḻídon ata in mustibí tantú mohoromat kon i tuangnea, sinbá tangoi i Allah bo inta sinundú i Allah kon i naton in diá singkuḻeon intau.

²Aka ki tuang monia tua bo intau in Keresten yo dikabí in diá pandungon in sia, malahan ata tatua in mustibí mokopopira in mobantung kon inia, sin ki tuang inta pinobantungannea tatua tumpaḷa intau mopirisaya inta kinotabi i Allah. Naa komintan in musti tundúonmu bo pononggina kon i monia.

³Aka ki ine in motundú kon totundú tolaeng inta diá notongkai in totundú inta sinundú naton bo doí doman kon totundú mobanar inta nongkon i Yesus Kristus Tuhan naton, bo inta pinobayá in agama naton,

⁴yo intau tatua in mododia bo diá doman nonotaau kon onu bo onu! Panyaki in intau natua in moibo-ibog mobobayowan kon soaḷ istila mita sahingga in mokopomuká kon intoi, ropatoi, mosiponapudan in diá totuu, mosicurigaan,

⁵bo umuran moyogenggeng. Raian in intau mita natua ain nobangkung bo diádon motaau pirisayaanmai. Inanggap monia in agama naa in motaaubí potayakan kon kauntungan tontaní.

⁶Totuubí kon agama tua in mobogoibí in kauntungan moḷoben, aka intau tatua in umuran moorop in onu inta oyúon kon inia.

⁷Sin diábí tobatúmai in dinia naton wakutu in namangoi in dunia naa, ná doman tua, diábí doman in tobatúmai in diaan naton aka ḷumuaidon nongkon dunia naa!

⁸Dá, aka oyúonpa in kaanon bo pakeang yo mobaḻídon intua.

⁹Táe intau inta moibog mobaḻí mooyúon tombodokondon in ibognea inta diá in baragunanea bo inta mokogoguyaat kon inia. Ibog mita tatua in mokorimumud bo mokobodito kon inia.

¹⁰Sin pomangkoian in bayongan inta moraat naa in ibogbí kon doit. Aindon tongonumai degá in intau inta umuran moramuji motayak kon doit, sahingga in diádon dinumudui kon totundú in agama Keresten, dá tongádon roriga in moiantug kon i monia bo inta mokoajar doman kon gina in kodungkuḷan monia tua.

¹¹Táe iko inta ain piniḻí i Allah, mokopoyayúdon kon tua komintan. Tayakdon in onu inta mopia kon tayowon i Tuhan, aidai in onu inta moitutui, posambayang bo mokopotantú kon pirisaya kon i Kristus, kotabibí in tumpaḷa intau, mobalajar mosabar bo aidai in onu inta mokosanang kon gina in intau.

¹²Poramujidon totu-totuu mobiag saḷaku intau inta mopirisaya kon i Kristus. Mobiag mobanar bá mouḻímu in kobiagan mononoi. Sin tuabí in mangaḻe in pinogoinían i Allah kon inimu bo tua doman komintan inta umuran inakumu kon tayowon in intau moantó.

¹³Bo tanaa mako, kon tayowon i Allah inta ain nobogoi in kobiagan kon bayongan in yagi-yagi, bo kon tayowon i Kristus Yesus inta ain noguman kon onu in totuu kon i Pontius Pilatus. Poigumonku in naa kon inimu:

¹⁴Duduiaibí in bayongan parenta tanaa, dikabí tobatúmai in taḻiban modapot kon singgai koangoian bui i Tuhan naton ki Yesus Kristus.

¹⁵Ki Allahbí tontaní in nonantú kon singgai koangoian-Nea. Sin tongábí Sia in mongongawasa kon dunia naa. Moḷantud totok in Sia, Sia Datu in bayongan datu, bo Tuhan in bayongan Tuang.

¹⁶Tongábí Sia in diá kokawasaan in popatoi bo inta nobiag kon sindar inta diá motaau diugan i inekabí. Diábí in tobatúmai intau mokoontong kon i-Nia, bo totuubí kon diábí ontongon intau in Sia. Tongábí Sia in patus horomaton sin kawasa-Nea in noiḻiu kon bayongan kawasa kon dunia naa modapot in kopaḷutan dunia naa! Amin.

¹⁷Ponoropdon kon intau mita inta nobiag nooyúon, bá mosia in diá dumodia bo diá mopodoyon in kobiagan monia kon barang mita inta modai-daitbí, ná kaoyúonan in dunia naa. Mosia in mustibí mopodoyon in kobiagan monia kon i Allah inta ain nobogoi in bayongan yagi-yagi kon i naton inta diádon koiapan in kobayongnea, inta pakéonmai naton muḷoi in singgai.

¹⁸Ponorop domandon kon i monia sinbá mosia in mopoontong in aid inta mopia. Kobayongdon in mogaid kon inta mopia, mokopopia kon gina bo moibog mobogoi.

¹⁹Aka natua in aidan monia, yo momangkoidon in mosia mosipun kon kapunyaan inta mobaḻí baḷun mopia kon singgai moiduduimai. Bo aka natua mosia in mokouḻí doman kon kobiagan mononoi ná inta kinoibog i Allah.

²⁰Uḻe Timotius, adíku, onu inta pinoki aidku bo inta pinogumanku kon inimu, yo ḷukadai totok intua kopira! Donaai tongá mongonguman kon soaḷ inta diá in mangaḻenea bo inta moraat, dika tongá mobobayowan kon soaḷ mita inta sinangoian “Pongotahuan”.

²¹Sin oyúondon in intau inta motundú kon natua sahingga in doídon mosia dinumudui kon onu inta sinundú i Kristus Yesus. Igumon mako ki Allah in umuran mobogoi in barakat bo totabi kon i monimu komintan. Horomat nami, Ki Paulus