Read Mongondow TIMOTIUS 2 1 Bible Online

TIMOTIUS 2 1 - Mongondow bible

TIMOTIUS 2 1

¹Uḻe Timotius adíku inta totok in kinotabiku! Akuoi, ki Paulus, nomais kon surat tanaa, mopoigum mako doa sinbá ki Allah inta ki Amá naton bo ki Yesus Kristus, Tuhan naton in umuran mobogoi kon inimu in barakat, totabi bo kobiagan motompia. Pinoduduibí kon ibog i Allah akuoi naa in nobaḻí rasul i Kristus Yesus bo poḷat pinotabá mopotaau in daḷan kobiagan inta pinodandi i Allah. Kobiagan tatua in sinarimadon naton sin kita ain notobatú i Kristus Yesus.

³Akuoi mopoyaput in sukur kon i Allah inta binantunganku takin gina motuḻid bo modarit ná inta inaidan in mogoguyangku tungkuḷ intua. Umuranku sambayangan in moiko pomuḷoi in kotoropanku doḷom ande singgai.

⁴Tantúku kotoropan koajar in ginamu, tuamai in moibogdon totok in akuoi mokipodungkuḷ kon inimu bá mosanangdon in ginaku.

⁵Umuran kotoropanku in kopopirisayamu kon i Kristus inta totu-totuu tua naonda bo kopopirisaya i baaymu ki Lois bo ki inámu ki Eunike. Bo moyakinbí totok in akuoi kon kopopirisayamu nion ná bí doman onda bo kopopirisaya monia tua.

⁶Manangka intua tantúku bui ponorop kon inimu sinbá umuranmu pakéon kopiraan in totabi inta inogoi i Allah kon inimu wakutu in binarakatanku in iko.

⁷Sin Roho inta inogoi i Allah kon i naton in deemanbí bá moondok in kita, táe Rohobí inta mobogoi in ropot bo mopuḻing in tabi bo mokotahang kon gina in kita.

⁸Manangka intua dikabí moondok in mopotaau bo moguman kon onu inta inaidan i Tuhan naton. Dika doman mooyá, sin akuoi in pinobonu kon ponjara popisíbí in mopirisaya kon i-Nia, táe pakébí in ropot inta inogoi i Allah motanggung moyotakin kon roriga sin mopoyaput in Habar Mopia tatua.

⁹Ki Allah in noposaḷamat bo nogoiní kon i naton bá mobaḻí umat inta kinotabi-Nea. Tua in inaidan-Nea, deemanbí pinodoyon kon oaid naton mopia, táe pinodoyon-Neabí kon makusud-Nea tontaní bo totabi-Nea inta pinongin i Kristus Yesus kon wakutupa in dunia naa diápa pinomia.

¹⁰Bo masa in tanaa pinoontongdon i Allah in totabi-Nea tatua kon i naton. Pinotabá-Nea namangoi in Datu Mopoposaḷamat naton ki Yesus Kristus. Sia inta ain nonaḷow kon kawasa in popatoi. Tuata inta pinotaau kon Habar Mopia tatua.

¹¹Bo popisíbí in mopoyaput in Habar Mopia tatua dá inoiní i Allah in akuoi mobaḻí rasul bo guru.

¹²Tuamai akuoi in nokorasa kon bayongan roriga tatua, táe akuoi in umuranbí moyakin sin kinotaauankubí totok ki ine in pinirisayaku tua. Moyakinbí in akuoi kon onu inta ain inogoi-Nea pinoki aid kon inakó[1] tantúbí koḷukadan-Nea modapot in Singgai Pangabisan.

¹³Duduiaibí totu-totuu in totundú noitutui inta ain inogoiku kon inimu. Dika umukat kon onu inta ain pinirisayamu bo kon tabi inta ain nobaḻí kapunyaan naton, sin kita in notobatúdon i Kristus Yesus.

¹⁴Takin totuḷung in Roho i Allah inta umuran kotaki-takin naton, umurai ḷukadai kopira in onu inta ain inogoi i Tuhan kon inimu, sin koboḻibí totok intua.

¹⁵Bá kotaauanmu kon bayongan intau inta kon Asia Kecil ain nonaḷámai kon inakó. Umpaka ki Pigelus bo ki Hermogenes.

¹⁶Táe tombonu in baḷoi i Onesiporus in umuran namangoi moposanang in ginaku, dá poigumonku mako ki Tuhan in tantú mobogoi in barakat kon i monia, sin umpakabí kon bonu in ponjara akuoi táe ki Onesiporus bo tombonu in baḷoinea tua in diábí mooyá in namangoi mokipodungkuḷ kon inakó.

¹⁷Wakutu in ki Onesiporus noiyaputdon kon Rum, baḷunea sinayak in akuoi nodapot noyodungkuḷ in kami.

¹⁸Bo kinotaauanmu bidon totok wakutu in akuoi kon Epesus, mobayong totok in totuḷungnea kon inakó. Dá akuoi in tongá tantú mopoigum mako in doa sinbá ki Allah in umuran mobogoi in barakat bo totabi kon inia kon wakutu in singgai ponantúandon i Tuhan kon bayongan intau.