Read Mongondow IBRANI 1 Bible Online

IBRANI 1 - Mongondow bible

IBRANI 1

¹Dungkuḷmai in noyagi-yagimaidon daya i Allah in mosingog kon mogoguyang naton, singog-Nea tatua in pinoyaput pinongin nabi mita.

²Táe kon singgai tumi naa in ki Adí-Neadon tontaní in pinotabá-Nea nopoyaput in singog-Nea tatua kon i naton. Ki Adí-Nea doman tanaa inta pinopodoyonan i Allah in nomia kon dunia naa. Sia in sinantú domandon i Allah motarima kon bayongan kapunyaan-Nea.

³Sia doman naa in moponiata in kamuliaan i Allah inta diá in poḻiuan tua. Bo noniatadon totok kon i-Nia in rupa i Allah tontaní. Singog-Nea inta mokawasa totok tua in pinaké-Nea moḷukad kon dunia naa. Bo naonda in sinobut-Neadon in dosa mita in intau, iḻimitúdon in Sia kon ḷoḻitúan pomomarentaan kon soroga moyotakin i Allah Pongawasa inta totok in moḷantud.

⁴Kinoḻitúanbí i Adí Allah in moḷantu-ḷantud totok nongkon malaekat mita, bo tangoi-Neabí inta pinonangoi i Allah kon i-Nia in totok in horomaton nongkon tangoi inta pinonangoi i Allah kon malaekat.

⁵Sin diábí kon dodai in onda ki Allah in noguman kon tobatúmai in malaekat, “Iko in ki Adí-Ku, singgai naa Akuoi in nobaḻí ki Amá-Mu.” Bo diábí doman kon dodai in onda ki Allah in noguman kon malaekat mita nanaa: “Akuoi in mobaḻí ki Amá-Nea, bo Sia in mobaḻí ki Adí-Ku.”

⁶Táe wakutu in ki Allah nopotabá kon i Adí-Nea guya-guyang tatua namangoi in dunia naa, ki Allah in noguman nanaa: “Bayongan in malaekat i Allah in musti mosumba kon Adí tatua.”

⁷Aka soaḷ malaekat mita, nanaa in guman i Allah, “Binaḻí i Allah in malaekat-Nea mita tompot, bo bobantung-Nea mita binaḻí-Nea dokot in tuḷu.”

⁸Táe ki Allah in noguman kon i Adí-Nea nanaa: “Ḷoḻitúan pomomarentaan-Mu, umuranbí mononoi![1] Moadil totok in pomomarenta-Mu.[2]

⁹Inta moadil in koibog-Mu bo inta motombogá in kodoí-Mu; Manangka intua ki Allah, Allah-Mu in nomiḻí kon ini-Mu; bo nobogoi in kahoromatan inta mokopoangoi kon ḷunganga in gina inta moiḻiu kon yobayat-Mu mita.”

¹⁰Ki Allah in noguman doman, “Iko, Tuhan in nongkon pinomangkoianpamai nomia kon butá, bo Iko doman in nomia kon ḷangit.

¹¹Tua mita diábí in mononoi, bo mokoyonganbí naonda bo pakeang; táe Iko in diábí mobaḷui.

¹²Dunia naa in kopíon-Mubí naonda bo ḷambung, bo baḷuian-Mubí in ibanea mako. Táe Iko in diábí mobaḷu-baḷui, bo mononoibí in kobiagan-Mu.”

¹³Diábí kon dodai in onda ki Allah in noguman kon malaekat mita: “Ḻitúdon kon dotá in koḷanan-Ku, dapot in bayongan saturu-Mu potungkudon-Ku kon tayowon-Mu.”

¹⁴Aka natua, onubí in malaekat mita tatua? Mosia tua in rohobí mita inta mobantung kon i Allah, inta pinotabá i Allah mamangoi motuḷung kon intau mita inta bain motarima kon kasaḷamatan.