Read Mongondow IBRANI 10 Bible Online

IBRANI 10 - Mongondow bible

IBRANI 10

¹Hukum in agama Yahudi tongábí nobogoi in gambaran inta diá nosilang kon soaḷ mita mopia inta kon singgai moiduduimai, deemanbí gambaran inta totokanea nongkon soaḷ mita tatua. Sin hukum mita tatua in diábí mokosompurna kon intau inta mamangoi mosumba kon i Allah takin kodia-dia in barang inta posumba. Umpakabí pomuḷoi in taong umuran moposumba in kuruban mita natua.

²Sin aka kuma intau mita inta nosumba kon i Allah tua bo totu-totuudon dinaritan nongkon dosa, yo diá bidon in porasaan monia kon dinosapa, bo diá bidon moposumba bui in kuruban.

³Táe noniata magí, yo kuruban mita inta pinosumba pomuḷoi in taong tua in tongábí moponorop bui kon intau mita kon bayongan dosa monia.

⁴Sin diábí doman dugú in sapi bo dugú in bembé mokopopat kon dosa.

⁵Tuamai naonda in ki Kristus namangoi in dunia naa, Sia in noguman kon i Allah nanaa: “Iko in doí bidon in kuruban bo sosumba; táe sinadia-Mudon in awak kon i-Nakó.

⁶Iko doídon in kuruban tubáan andeka kuruban potobut kon dosa.

⁷Bo Akuoi in noguman nanaa, ‘Naadon in Akuoi, o Allah! Akuoi in namangoi sin mogaid kon onu inta kinoibog-Mu, ná inta pinais kon Buk Motusi soaḷ Akuoi.’ ”

⁸Dungkuḷ ki Kristus in noguman nanaa, “Iko in doídon in kuruban bo sosumba; bo doí bidon Iko in kuruban mahaḷuk inta sinubá saḷaku sosumba bo kuruban inta potobut kon dosa.” Ki Kristus in nosingog natua, umpaka bayongan in kuruban tatua pinosumba pinodudui kon hukum agama in Yahudi.

⁹Nopaḷut mako kon tua ki Kristus in noguman, “Naadon in Akuoi, o Allah! Akuoi in namangoi sin mogaid kon onu inta kinoibog-Mu.” Dá bayongan in kuruban inta muna tua in komintandon pinopatan i Allah bo binaḷuian in kuruban i Kristus.

¹⁰Inaidandon i Yesus Kristus in onu inta kinoibog i Allah. Pinosumba-Neadon in awak-Nea tontaní saḷaku kuruban. Sia in noposumba in awak-Nea tatua tongábí komintan modapot in kopaḷutan dunia naa, táe onu in inaidan-Nea tatua, nondaritbí kon i naton nongkon bayongan in dosa.

¹¹Pomuḷoi in singgai imang intau Yahudi umuran mogaid kon oaidan monia saḷaku imang bo umuran doman mopobui-buimai in moposumba in kuruban mita ná inta biasamai pinosumba monia. Táe totuubí kon kuruban mita tatua in diábí mokopopat kon dosa.

¹²Táe ki Kristus in tongábí komintan noposumba in kuruban potobut kon dosa, bo kuruban tatua in umuranbí pakéon modapotkabí in kopaḷutan dunia naa. Naonda in nopaḷut mako noposumba in kuruban tatua, ki Kristus in iḻimitú kon dotá in koḷanan i Allah bo nomarenta noyotakin-Nea.

¹³Bo tanaa mako, ki Kristus in mogoḷat mako modapot in bayongan saturu-Nea potungkudon i Allah kon tayowon-Nea.

¹⁴Dá kuruban tobatú tatua inta inaidan i Kristus noposompurnadon kon intau mita inta ain dinaritan nongkon dosa.

¹⁵Kon soaḷ mita tatua Roho i Allah ain bidon doman noguman kon i naton nanaa,

¹⁶“ ‘Naadon in dodandian inta inaidan-Ku takin i monia kon singgai mita moiduduimai,’ ki Tuhan in noguman doman nanaa, ‘Hukum-Ku mita in potonop-Kudon kon bonu in gina monia, bo popopais-Kudon kon bonu in raian monia.’ ”

¹⁷Ki Allah in noguman doman nanaa, “Ḻiongon-Ku bidon in bayongan dosa monia bo aid mita monia inta mongoraat.”

¹⁸Aka, dosa mita bo aid mita mongoraat aindon inampungan, dá diá bidon paraḷu moposumba in kuruban sin potobut kon dosa.

¹⁹Yo uḻe utat mita, dugú i Yesus tua in nobogoidon in kabaranian kon i naton in tanaa tumuot kon Yuang Totok Motusi.

²⁰Binukatandon i Yesus in daḷan mobagu bayáan naton, daḷan inta mobogoi in kobiagan. Daḷan tatua in mongin gorden inta awak i Yesus tontaní.

²¹Bo tanaa oyúondon in Imang momulia naton inta nobaḻí itoi kon Baḷoi Allah.

²²Tuamai, koḻigai dimiugdon in kita kon i Allah takin gina motuḻid bo totu-totuudon mopirisaya sin gina naton in dinaritandon nongkon raian mita inta mongoraat, bo awak naton in dinaritan domandon in tubig inta modarit totok.

²³Koḻigai in kita mokopotantú kon pirisaya bo umuran kumadai kon onu inta inakudon naton bo inta i harap mako naton, sin Sia inta nodandi in tantúbí mobogoi in onu inta ain pinodandi-Nea tatua.

²⁴Bo kita in mustibí mosiindoian, sinbá umuran motaau mosiponoropan kon bá motabi kon tumpaḷa intau bo momia doman kon soaḷ mita inta mopia.

²⁵Kita in musti umuran moyosipun moyotakin bo umuran mosambayang. Donaai mokopomaḷat ná intau ibanea. Mustibí doman umuran in kita mositongginaan, sin kinotaauan bidon naton kon diá bidon moonggot bo mamangoi bui in ki Tuhan.

²⁶Sin aka habar inta mobanar nongkon i Allah ain pinotaau kon i naton, táe umuranpa doman tumuod in kita in mogaid kon dosa, dá diá bidon in kuruban inta pomopat kon dosa naton.

²⁷Dongka bidon tobatú in sinadia kon i naton, tuata in tumayow kon pongadilan i Allah bo tuḷu in torú-Nea inta momokak kon intau mita inta moḷawang kon i-Nia!

²⁸Intau inta doí dumudui kon hukum inta inogoi Musa, hukumon matoi bo diábí ampungannea, aka doyowa andeka toḷu in intau mobogoi in kosakusian, bo oyúon in bukti kon sia in kotaḷá.

²⁹Táe umpaka natua, hukumanbí kon intau inta moritak kon i Adí i Allah in moboga-bogat, bo kon i monia doman inta nonganggap nohina in dugú dodandian i Allah, dugú inta pinodoyon kon kinopatoian i Kristus sin nondarit kon inia nongkon dosanea mita. Sia in nohojat doman kon Roho inta mobogoi in totabi.

³⁰Sin kinotaauan bidon naton ki ine in Sia inta noguman, “Akuoi in motuḻíbí! Akuoi in mohukumbí!” Bo inta noguman doman nanaa, “Hakimonbí i Tuhan in umat-Nea.”

³¹Totokdon mokoondok aka kon bonudon in kawasa i Allah inta nobiag!

³²Toropka in kaadaan monimu koḻipod. Kon wakutu in moiko notarima kon bayag inta pinonindar i Allah, moiko in tantú nokorasa kon yoyiga, táe umuran nobakuat totok in moiko.

³³Mokakit in singkuḻeon in moiko bo baḻíon monia yambá kon tayowon intau mobayong. Oyúon doman moitakin in moiko mororiga takin intau mita inta iroriga doman natua.

³⁴Bo moiko in noitakin doman nokorasa kon koajar in gina monia inta kinurung kon ponjara. Bo wakutu in kapunyaan monimu nodait inagow, diá noyaat in gina monimu, sin kinotaauandon monimu kon oyúonpabí in mopia-pia nongkon tua bo inta mononoi totok.

³⁵Manangka intua, dikabí ukatan monimu in onu inta ain pinirisaya monimu sin aka moiko umuran mopirisaya, dá moḷobenbí in mangaḻe inaidanmu tua!

³⁶Mokoposabarbí in moiko, sinbá motaaupa mogaid kon onu inta kinoibog i Allah, sahingga in tarimaanbí monimu in onu inta pinodandi i Allah tua.

³⁷Sin kon Buk Motusi ain pinais nanaa: “Nodiugdon totok in wakutunea, dá Sia inta sinango-tangoi moiangoi tua, in ḷagidon moiangoi; Diá bidon baḷu-baḷuian-Nea in wakutu koangoian-Nea.

³⁸Bo umat-Ku inta mobanar in mopirisayabí bo mobiag; táe aka oyúon in kon sigad monia tua in nobaḷui in pirisaya, dá diábí mosanang in gina-Ku kon inia tua.”

³⁹Kita naa in deemanbí umat inta mobaḷu-baḷui in pirisaya bo inta diá koharapan. Táe umatbí inta mopirisaya kon i Allah bo inta posaḷamaton.