Read Mongondow IBRANI 2 Bible Online

IBRANI 2 - Mongondow bible

IBRANI 2

¹Manangka intua, mustidon totu-totuu in kita kumadai kon totundú mita inta ain dinongog naton, sinbá diá mobaḷui in pirisaya naton.

²Sin koyow mita inta pinoyaput in malaekat mita kon mogoguyang naton in totuubí in nouḻí magí. Intau mita inta diá dinumudui bo inta doí nopoaid in koyow tatua, mokouḻíbí kon hukuman podudui in oaid monia.

³Apapa doman oyúon in kasaḷamatan inta motoya-toyang nongkon koyow mita tatua! Aka tongá pomayá mako naton in kasaḷamatan tatua, dá tantú diábí in kotaḻiban hukuman tatua in kita. Sin ki Tuhanbí tontaní in muna-munamai noguman kon kasaḷamatan tatua. Bo intau inta muna-munamai nokodongog kon Habar tatua in noguman doman kon i naton kon totuubí mita in habar tatua.

⁴Koḻikud intua, iniropotan doman i Allah in bayongan inta ain inouman in intau mita tatua takin nopoontong in noyagi-yagimai aid inta mokoherang totok kon intau bo soaḷ mita inta diá in poḻiuan bo poḷat nosila-silai mako kon onu inta pinonotabi in Roho i Allah podudui in ibog-Nea tontaní.

⁵Malaekat mita in diábí inogoian i Allah in kawasa momarenta kon dunia mobagu singgai moiduduimai, dunia inta yogot oumanon naton tanaa.

⁶Sedang bo kon Buk Motusi oyúon in pinais nanaa, “O Tuhan, onubí intau tua, sahingga in umuran-Mu toropon in sia? Intau in tongábí doman komangoi intau biasa, táe umuran-Mu tarukiraan mako in sia!

⁷Kon bonu in wakutu notoyong binaḻí-Mu in sia topí noḻin ompá nongkon malaekat. Táe noiduduimai kon tua inogoian-Mudon in tampat inta momulia bo totok in ihoromat in sia,[3]

⁸bo binaḻí-Mu domandon mongongawasa in sia kon bayongan in yagi-yagi.” Yo aka pinogumandon kon intau in binaḻídon i Allah “mongongawasa kon bayongan in yagi-yagi”. dá tua in mangaḻenea kon diábí in tobatúmai in diá kinawasa in intau. Umpaka natua, tanaa in diápabí inontong naton intau mongawasa kon bayongan in yagi-yagi.

⁹Táe inontongdon naton in ki Yesus in nongawasa! Sia in binaḻídon topí noḻin ompá notoyong nongkon malaekat mita, sinbá podoyon kon kopopia in gina i Allah Sia in motaau matoi kon kopontingan in bayongan intau. Inontong naton in tanaa, kon Sia ain inogoian in ḷoḻitúan inta momulia bo inta ihoromat sin Sia in notarimadon kon roriga dapot in minatoi.

¹⁰Totuu kon patus bidon in ki Allah inta nomia kon bayongan in yagi-yagi mopobayá in onu inta imakusud-Nea tontaní. Binaḻí-Nea in ki Yesus mopoposaḷamat inta nosompurna pinodoyon kon daḷan inta totok in moyoyiga. Tua in daya i Allah sinbá mobayong intau in motaau oiníon-Nea mayá in tampat inta mopia totok takin i Yesus. Sin Siabí in nobuká kon daḷan kon i monia sinbá mosia in motaau posaḷamaton.

¹¹Ki Yesus in nondarit kon bayongan in dosa intau; siabí tontaní in nondarit. Mosia inta dinaritandon tua in nogaḷumdon kon Amá inta totobatú. Tuamai in ki Yesus diá mooyá in mongaku kon i monia saḷaku ki utat-Nea mita.

¹²Ki Yesus in noguman kon i Allah, “Popotaau-Kubí kon i utat-Ku mita in tangoi-Mu. Dayowon-Ku in Iko kon poyodungkuḷan monia.”

¹³Ki Yesus in noguman doman nanaa: “Ki Allah in nobaḻí oandoḷan in pirisaya-Ku.” Bo Sia in noguman doman nanaa, “Naadon Akuoi noyotakin in adí mita inta ain inogoi i Allah kon i-Nakó.”

¹⁴Lantaran intau mita inta sinangoi-Nea adí tua, tongábí intau ilo-ilow inta mato-matoipabí, dá ki Yesus sinumongkaidon kon i monia bo nobiag naonda bo kaadaan intau. Tua pinomia-Nea, sinbá kinopatoian-Nea tua mokorimumud kon Ibilis inta nongawasa kon popatoi.

¹⁵Tua in cara-Nea moposaḷamat kon intau mita inta umuran kinawasaan in ondok kon soaḷ popatoi.

¹⁶Dá noniata bidon kon deemanbí malaekat mita in sinuḷungan-Nea táe buíbí i Abraham.

¹⁷Mangaḻenea kon naa kon bayongan in yagi-yagi Sia in musti mobaḻí naonda bo ki utat-Nea mita, sahingga notaau in Sia nobaḻí Imang Moḷoben inta motoindudui kon i Allah bo kototabi. Tua in pomiaan-Nea sinbá ampungandon dosa in intau.

¹⁸Bo popisí in Sia tontaní nokorasadon kon roriga bo sobaan, dá motaaudon in Sia motuḷung kon intau mita inta kinoantugan in sobaan.