Read Mongondow IBRANI 4 Bible Online

IBRANI 4 - Mongondow bible

IBRANI 4

¹Dandi i Allah tatua in umuranpabí pakéon, bo kita in ogoianbí in pogogaian inta pinodandi-Nea tatua. Manangka intua kita in musti umuran kiḷuka-ḷukadmai sinbá diá in tobatúmai kon sigad monimu in diá mokouḻí kon pogogaian inta pinodandi-Nea tatua.

²Sin habar tatua in pinotaaudon doman kon i naton notongkai ná kon i monia. Táe habar tatua diá in baragunanea kon i monia, sin wakutu in dinongog monia diá pinirisaya monia intua.

³Táe kita inta mopirisaya in umuranbí mokouḻí kon tampat pogogaian inta pinodandi i Allah tatua. Soaḷ tatua in noyokaan in onu inta siningog i Allah nanaa: “Akuoi in sinumorú bo nongibot, ‘kon mosia in diábí moituot bo mogogai moyotakin-Ku.’ ” Ki Allah in noguman natua umpaka oaidan-Nea in nopaḷutdon kon wakutupa in nomia kon dunia naa in Sia.

⁴Sin soaḷ singgai impitunea naa ain pinais kon Buk Motusi nanaa: “Kon singgai impitunea ki Allah nogogai in nogaid kon bayongan oaidan-Nea.”

⁵Bo oyúon doman in pinais nanaa: “Mosia in diábí tumuot kon butá tatua bo mokouḻí kon pogogaian moyotakin-Ku.”

⁶Dá mosia inta muna-munamai nokodongog kon Habar Mopia tatua, diá nokouḻí kon pogogaian tatua sin diá in mosia nopirisaya. Aka natua dá nosilang bidon kon oyúonbí in intau ibanea in motaau motarima kon pogogaian tatua.

⁷Sin ki Allah in nonantú domandon kon singgai ibanea inta sinangoian “Singgai Naa.” Bo naonda in tongonumaidon notaong noiduduimai kon tua, ki Allah in bui nosingog kon soaḷ tatua pinongin i Daud, kon bonu in tontagá inta pinais koina, nanaa, “Aka singgai naa mokodongog in moiko kon singog i Allah, yo donaai togaton in ginamu.”

⁸Aka kuma bo inogoidon i Yosua in tampat pinogogaian inta pinodandi i Allah tua, yo tantú diá bidon in ki Allah noguman bui kon soaḷ singgai ibanea nion.

⁹Manangka intua, kon umat i Allah oyúonpabí in dandi pogogogaian ná ki Allah inta nogogai doman kon singgai impitunea.

¹⁰Intau inta ain sinumuot kon tampat pogogogaian i Allah, yo sia in mogogai bidon kon bayongan in oaidannea, ná doman ki Allah inta nogogaidon kon bayongan in oaidan-Nea.

¹¹Tuamai, koḻigai in kita moramuji totu-totuu in tumuot kon tampat pogogogaian tatua, sinbá diá tobatúmai in intau kon sigad naton in diá moituot kon tampat tatua ná mosia koḻipod sin popisí in diá mopirisaya kon i Allah.

¹²Sin pirman i Allah tatua in singogbí inta nobiag bo moropot bo Siabí in moḷani-ḷanit nongkon pitow inta doyowa in matanea. Singog tatua in tumurak nodapot in nopoyotondí in jiwa bo roho; boḻikatog bo tuḷan bobubuton, sahingga in kotaauanneadon totok in raian bo niat in intau.

¹³Diábí tobatúmai in mahaḷuk in diá ontongon i Allah. Bayongan yagi-yagi komintanbí ontongon-Nea mako motarang kon tayowon-Nea. Bo mustibí tanggung jawab bo naton kon tayowon-Nea.

¹⁴Manangka intua, musti umuran in kita kumadai kon onu inta ain ináku bo pinirisaya naton sin oyúondon in Imang naton momulia bo inta moḷoben. Sia ain sinumuot dapot kon tayowon i Allah, Sia tuata in ki Yesus ki Adí i Allah.

¹⁵Imang Moḷoben naton tua in deemanbí imang inta diá umuran kotaki-takin mokorasa kon yoyiga mita naton. Sia ain sinoba kon bayongan yagi-yagi ná doman kita naa; táe diá in Sia nogaid kon dosa!

¹⁶Tuamai, koḻigai in kita dika moondo-ondok in mayá kon tayowon i Allah inta nomarenta takin pia in gina. Motabibí in ki Allah kon i naton bo ogoian-Neabí in barakat, sahingga motarimabí in kita kon totuḷung-Nea aka kon wakutuneadon.