Read Mongondow IBRANI 8 Bible Online

IBRANI 8 - Mongondow bible

IBRANI 8

¹Naabí in pangkoi totok onu in inouman naton: Oyúondon in Imang Moḷoben naton ná tatua inta iḻimitú nomarenta noyotakin i Allah inta totok Momulia kon soroga.

²Sia nopobayá in oaidan-Nea saḷaku Imang Moḷoben kon Tampat inta totok in Motusi kon bonu in Ḷoḷaigan i Tuhan. Ḷoḷaigan inta pinosindog i Tuhan tontaní, deemanbí intau in noposindog.

³Pomuḷoi in imang moḷoben sinantú bidon kon musti moposumba in kuruban andeka mobogoi in sosumba kon i Allah. Natua doman in Imang Moḷoben naton, musti oyúon doman in ogoi-Nea posumba.

⁴Aka Sia in nogutun kon dunia naa, dá diábí nobaḻí Imang in Sia, sin oyúon bidon in imang kon dunia naa inta moposumba in kuruban inta pinoigum in hukum agama Yahudi.

⁵Oaidan inta inaidan monia tua saḷaku imang sabanarnea in tongábí gambaran bo oḻinow in onu inta kon soroga. Tua ain bidon pinotaau i Allah kon i Musa koḻipod, kon wakutu in sia noposindog in Ḷoḷaigan i Tuhan. Nanaa in guman i Allah kon i Musa, “Pokotorop! Tua komintan in mustibí pomiaanmu podudui in gambar inta pinoontong-Ku kon inimu kon tudu in buḷud.”

⁶Táe tanaa ki Yesus in nokouḻí kon tugas imang inta momuli-mulia nongkon inta inaidan in imang mita tatua. Sin dodandian inta pinomia-Nea kon sigad i Allah bo in intau tua in dodandianbí inta totok in mopia sin pinodoyon doman kon dandi inta totok in mopia.

⁷Aka kuma bo diá in gaatnea kon dodandian inta muna, yo tantú diá bidon paraḷu mogaid bui kon dodandian inta induanea.

⁸Lantaran kinouḻíandon i Allah kon taḷá in umat-Nea, sahingga noguman in Sia nanaa: “Pokotorop, pokotorop, moiangoibí in wakutunea, Akuoi in mogaid kon dodandian mobagu takin bangusa Israel, bo takin bangusa Yohuda.

⁹Deemanbí ná dodandian inta inaidan-Ku takin mogoguyang monia wakutu in mosia dinia-Ku iḷumuai nongkon butá in Mesir. Mosia in diá tantú dinumudui kon dodandian inta inaidan-Ku takin i monia; tuamai diádon pandungon-Ku in mosia.

¹⁰Táe tanaa, naadon in dodandian inta pomiaan-Ku takin umat-Ku Israel, Kon singgai mita moiduduimai, Pirman i Tuhan: Popotonop-Ku in hukum-Ku kon bonu in pikiran monia, bo popopais-Ku domandon kon gina monia. Akuoi in mobaḻí ki Allah monia, bo mosia in mobaḻí umat-Ku.

¹¹Diá bidon paraḷu in mosia motundú kon tumpaḷa umat kon sigad monia tua, andeka mopotaau kon i utatnea, ‘Popirisayadon kon i Tuhan.’ Sin mosia komintan, adí itoi, monotaaubí kon i-Nakó.

¹²Ampungan-Kudon in taḷá mita monia, bo diá bidon umuran-Ku toropon mako in dosa mita monia.”

¹³Naonda in pinomiadon in dodandian nobagu tua, dá binaḻídon i Allah nokoyongan bo noitontumi in dodandian inta muna; bo onu inta noonggot tua in ḷagidon moyoyang.